“ອົງພຣະພຸດທະໂພຄາຣິຍະມະຫາມຸນີ” ກຳລັງເຄື່ອນຍ້າຍຈາກຫວຽດນາມມາຫຼວງພະບາງ

38

ພິທີ ອະຣາທະນາເຄື່ອນຍ້າຍ “ອົງພຣະພຸດທະໂພຄາຣິຍະມະຫາມຸນີ” ສ້າງດ້ວຍຫີນອ່ອນ ຈາກ ນະຄອນດານັງ ສສ.ຫວຽດນາມ ມາປະທັບຢູ່ ນະຄອນ ຫຼວງພະບາງ ສປປ ລາວ ເລີ່ມຂື້ນ ໃນວັນທີ 9 ພຶດສະພາ ພສ 2562 ຄສ 2019 ນີ້ “ອົງພຣະພຸດທະໂພຄາຣິຍະມະຫາມຸນີ” ມີຄວາມໝາຍວ່າ: ພຣະພຸດທະເຈົ້າ ອົງປະທານອະຣິຍະຊັບເປັນພອນ, ໜ້າຕັກກວ້າງ 309 ຊັງຕີແມັດ ລວງສູງ 509 ຊັງຕີແມັດ ນໍ້າໜັກ 38 ໂຕນ, ປະຕິມາກຳທີ່ໃຊ້ຫີນອ່ອນ ແກະສະຫຼັກເປັນອົງພຣະພຸດທະເຈົ້າສິລະປະແບບລ້ານຊ້າງ-ຈາມ ແລະປະສົມປະສານ ມູນຄ່າການກໍ່ສ້າງ 70.000 ໂດລາສະຫະລັດ.

ຂະບວນຂົນສົ່ງ ໄດ້ເຄື່ອນຈາກໂຮງງານຫີນອ່ອນ ນະຄອນດານັງ ສູ່ ດ່ານສາກົນລາວບ໋າວຊາຍແດນ ຫາ ເມືອງເຊໂປນ ແຂວງສະຫວັນນະເຂດ ຫາ ນະຄອນ ຫຼວງວຽງຈັນ ແລະນະຄອນ ຫຼວງພະບາງ ລະຫວ່າງ ວັນທີ 09 ຫາ 11 ພຶດສະພາ 2019.

ເພື່ອນຳໄປປະດິດສະຖານໄວ້ທີ່ ວັດພູຄວາຍໂພຄາຣາມ ບ້ານນາສ້າງເຫວີຍ ນະຄອນ ຫຼວງພຣະບາງ ແຂວງຫຼວງພຣະບາງ, ພະພຸດທະຮູບດັ່ງກ່າວ ນຳພາກໍ່ສ້າງໂດຍ: ສາທຸໃຫຍ່ ຈັນທະຣິນ ຈິນນະທັມໂມ ກຳມະການສູນກາງ ອົງການພຸດທະສາສະໜາສຳພັນລາວ, ຮອງປະທານ ອົງການພຸດທະສາສະໜາສຳພັນລາວ ແຂວງຫຼວງພຣະບາງ, ເຈົ້າອະທິການວັດພູຄວາຍໂພຄາຣາມ, ພ້ອມດ້ວຍພໍ່ແມ່ຄູບາອາຈານ ແລະອອກຕົນຍາດໂຍມຜູ້ມີຈິດສັດທາຮ່ວມສ້າງ.

ສຳລັບປະຊາຊົນ ຫຼື ພຸດທະບໍລິສັດ ທີ່ມີຈິດໃຈໃສສັດທາ ສາມາດສົມທົບທືນເປັນເຈົ້າພາບເຈົ້າສັດທາ ຮ່ວມບຸນໄດ້ຕະຫຼອດເສັ້ນທາງ ຫຼື ຕິດຕໍ່ທີ່ເບີໂທລະສັບ: +856-20-5567-3785, 9993-0305, 5600-6534, 030-5876-947.