ວັນທີ 6 ພຶດສະພາ 2019 ຢູ່ຫ້ອງວ່າການແຂວງໄຊຍະບູລີ ໄດ້ຈັດກອງປະຊຸມປຶກສາຫາລືກ່ຽວກັບການຄ້າຊາຍແດນ ແລະ ການທ່ອງທ່ຽວລະ ຫວ່າງ ແຂວງໄຊຍະບູລີ ສປປ ລາວ ນໍາໂດຍ ທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີ ພ້ອມດ້ວຍພະແນກການທີ່ກ່ຽວຂ້ອງ ກັບ ຈັງຫວັດພິດສະນຸໂລກ ຣາຊະອານາຈັກໄທ ນໍາໂດຍ ທ່ານ ບຸນຊັບ ພານິດສະການ ຜູ້ອໍານວຍການມະຫາວິທະຍາໄລທະເລສວນ ພ້ອມດ້ວຍຄະນະ.
ທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີ ໄດ້ກ່າວຕ້ອນຮັບທີມງານຂອງຜູ້ອໍານວຍການມະຫາວິທະຍາໄລທະເລສວນ ຈັງຫວັດພິດສະນຸໂລກ ພ້ອມດ້ວຍຄະນະທີ່ມາຢ້ຽມຢາມ ແລະ ເຮັດວຽກຢູ່ແຂວງໄຊຍະບູລີຄັ້ງນີ້ ພ້ອມທັງໄດ້ລາຍງານສະພາບຈຸດພິເສດຂອງແຂວງ ແລະ ການພົວພັນຮ່ວມມືລະ ຫວ່າງ ແຂວງໄຊຍະບູລີ ແລະ ບັນດາຈັງຫວັດຂອງໄທ ທີ່ມີຊາຍແດນຕິດຈອດກັບ ແຂວງໄຊຍະບູລີ ເຊິ່ງໄລຍະຜ່ານມາແຂວງໄຊຍະບູລີ ແມ່ນໄດ້ມີການປະຊຸມຮ່ວມມືກັບບັນດາຈັງຫວັດຂອງໄທ ກ່ຽວກັບການຮັກສາຄວາມສະຫງົບຕາມຊາຍແດນ, ການເຂົ້າ – ອອກຜ່ານດ່ານຕ່າງໆ, ການຄ້າ, ການທ່ອງທ່ຽວ ແລະ ອື່ນໆ ອັນເຮັດໃຫ້ຊາຍແດນດັ່ງກ່າວມີຄວາມສະຫງົບປອດໄພຮອບດ້ານ, ເຮັດໃຫ້ການຄ້າ – ການທ່ອງທ່ຽວ ແລະ ການໄປ – ມາຂອງປະຊາຊົນທັງສອງຊາດແມ່ນມີ ຄວາມສະດວກຂຶ້ນເທື່ອລະກ້າວ.
ໂອກາດດັ່ງກ່າວ ທ່ານ ບຸນຊັບພານິດ ໄດ້ສະເໜີຈຸດປະສົງ ເພື່ອສຶກສາຄວາມເປັນໄປໄດ້ຂອງການເຊື່ອມໂຍງລະ ຫວ່າງ ໄທ, ລາວ ແລະ ຈີນ ໂດຍຜ່ານເສັ້ນທາງຫຼວງຂອງແຂວງໄຊຍະບູລີ ເພື່ອໄປສູ່ເສັ້ນທາງລົດໄຟ ລາວ – ຈີນ ເຊິ່ງມີສະຖານີຢູ່ແຂວງຫຼວງພະບາງ, ສຶກສາໂຄງການວິໄຈໄລຍະສອງກ່ຽວກັບການເຊື່ອມໂຍງການໄປ – ມາ, ການແລກປ່ຽນສິນຄ້າຂອງປະຊາຊົນໂດຍຜ່ານດ່ານແຫ່ງຕ່າງໆ, ສຶກສາເບິ່ງລະບົບເສັ້ນທາງເພື່ອຈະນໍາສົ່ງສິນຄ້າ ໂດຍສະເພາະແມ່ນອາຫານທະເລທີ່ຈະສົ່ງໄປຈໍາໜ່າຍຢູ່ບັນດາແຂວງພາກເໜືອຂອງລາວ ແລະ ບັນດາແຂວງຂອງ ສປ ຈີນ ທີ່ບໍ່ຕິດກັບທະເລ ໂດຍອາໄສລົດໄຟ ລາວ – ຈີນ.
ຈາກນັ້ນ, ທັງສອງຝ່າຍກໍໄດ້ປຶກສາຫາລືກັນກ່ຽວກັບການຄ້າ, ການທ່ອງທ່ຽວທາງທໍາມະຊາດ ແລະ ວັດທະນະທໍາ ທີ່ແຂວງໄຊຍະບູລີ, ປຶກສາຫາລືກ່ຽວກັບການປັບປຸງບັນດາດ່ານຂອງທັງສອງຝ່າຍທີ່ຍັງບໍ່ໄດ້ມາດຖານ ເພື່ອອໍານວຍ ຄວາມສະດວກໃນການເຂົ້າ – ອອກ, ການຂົນສົ່ງສິນຄ້າ ແລະ ອື່ນໆ.
( ໂດຍ: ອຸ່ນເຮືອນ ໂພທິລັກ )
