ຈັບກຸ່ມຄ້າຂາຍຢາເສບຕິດ ພ້ອມຢາໄອ 2 ກິໂລ - Laoedaily

ຈັບກຸ່ມຄ້າຂາຍຢາເສບຕິດ ພ້ອມຢາໄອ 2 ກິໂລ

ການຄ້າຂາຍມີຫຼາຍທາງ ແຕ່ເປັນຫຍັງຕ້ອງເລືອກທາງລັດທີ່ຈະພາໄປສູ່ຄຸກບ່ອນທີ່ທຸກຄົນບໍ່ເພິ່ງປາຖະໜາ ທັງທີ່ຮູ້ດີວ່າ ຢາເສບຕິດເປັນພິດຕໍ່ສັງຄົມ ແຕ່ກໍຍັງມີຄົນເສບ, ຄ້າ ແລະ ຂາຍເປັນຈໍານວນຫຼາຍ.

ຕາມເຈົ້າໜ້າທີ່ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດແຈ້ງໃຫ້ຮູ້ ໃນຫຼາຍກໍລະນີທີ່ໃຫ້ສັງຄົມເກີດຄວາມບໍສະຫງົບສຸກ ມີການອາລະວາດ ປຸ້ນຈີ້ ໂຫດຮ້າຍໄປກວ່ານັ້ນເກີດການຄາດຕະກໍາກັນ ສາເຫດສ່ວນຫຼາຍແມ່ນມາຈາກການເສບຢາເສບຕິດທັງນັ້ນ ແລະ ທາງເຈົ້າໜ້າທີ່ຜູ້ຮັບຜິດຊອບ ມີການກວດພົບສະກັດກັ້ນບັນຫາ ການຄ້າຂາຍຢາເສບຕິດຢູ່ຕະຫຼອດເວລາ ດັ່ງເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຈຳປາສັກ ບຸກຈັບກຸມເປົ້າໝາຍຄ້າຂາຍຢາເສບຕິດໄດ້ 4 ຄົນພ້ອມຂອງກາງຢາໄອ 2 ກິໂລ.

ໃນຄັ້ງວັນທີ 25 ເມສາ 2019 ນີ້ ເວລາ 12:00 ໂມງ ທາງເຈົ້າໜ້າທີ່ໄດ້ຮັບລາຍງານຈາກພົນລະເມືອງດີວ່າໄດ້ມີກຸ່ມຄົນບໍ່ດີຈຳນວນໜຶ່ງເຄື່ອນໄຫວຄ້າຂາຍຢາເສບຕິດຢູ່ເຂດ ບ້ານສະໜາມໄຊ ນະຄອນປາກເຊ ແຂວງຈຳປາສັກ ຫຼັງຈາກນັ້ນເຈົ້າໜ້າທີ່ພະແນກຕຳຫຼວດສະກັດກັ້ນຕ້ານຢາເສບຕິດ ປກສ ແຂວງ ຈຶ່ງໄດ້ຈັດຕັ້ງກຳລັງວິຊາສະເພາະລົງກວດກາສະຖານທີ່ດັ່ງກ່າວ,ເຫັນວ່າມີມູນຄວາມຈິງ.

ຈາກນັ້ນຈິ່ງໄດ້ມີການປະສານສົມທົບກັບພາກສ່ວນທີ່ກ່ຽວຂ້ອງ, ກັບ ປກສ ນະຄອນປາກເຊ ລົງມ້າງຄະດີດັ່ງກ່າວ ສາມາດກັກຕົວເປົ້າໝາຍໄດ້ 4 ຄົນ ໃນນັ້ນມີທ້າວ ເພັດດາວັນສີຫາລາດອາຍຸ 43 ປີສັນຊາດລາວອາຊີບກຳມະກອນ ຢູ່ບ້ານສະໜາມໄຊນະຄອນປາເຊ ແຂວງຈຳປາສັກ, ທ້າວ ນິລະຄອນ ແສງໄຊຍະວົງອາຍຸ 25 ປີສັນຊາດລາວອາຊີບກຳມະກອນຢູ່ບ້ານໜອງເຊື່ອມ ເມືອງໄຊທານີນະຄອນຫຼວງວຽງຈັນ, ທ້າວ ໃບດາວັນດວງແກ້ວມະນີອາຍຸ 46 ປີສັນຊາດລາວອາຊີບກຳມະກອນຢູ່ບ້ານພະຂາວ ເມືອງໄຊທານີນະຄອນຫຼວງວຽງຈັນ, ທ້າວຈັນທະວົງ ໄຊຍະວົງອາຍຸ 21 ປີສັນຊາດລາວອາຊີບກຳມະກອນ ຢູ່ ບ້ານພະຂາວ ເມືອງໄຊທານີ ນະຄອນຫຼວງວຽງຈັນ.

ທັງ 4 ຄົນຖືກເຈົ້າໜ້າທີ່ກັກຕົວ ພ້ອມຂອງກາງຢາໄອຈຳນວນ 2 ກິໂລໂທລະສັບມືຖື 4 ໜ່ວຍລົດຕູ້ສະຕາແລັກ 1 ຄັນ, ລົດຈັກ 1 ຄັນ ປັດຈຸບັນຄະດີດັ່ງກ່າວແມ່ນຢູ່ໃນຂັ້ນຕອນດຳເນີນການສືບສວນສອບສວນຂະຫຍາຍຜົນ ເພື່ອຊອກຫາຜູ້ຮ່ວມຂະບວນການມາດຳເນີນຄະດີຕາມລະບຽບກົດໝາຍບ້ານເມືອງ.

 

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ