ຄິວລົດແທັກຊີສະໜາມບິນເລືອກຄະນະບໍລິຫານງານຊຸດໃໝ່

100

ຄິວປະຈຳສະໜາມບິນສາກົນວັດໄຕ ສະມາຄົມຂົນສົ່ງໂດຍສານແທັກຊີ ນະຄອນຫຼວງວຽງຈັນ ຈັດການເລືອກຕັ້ງຄະນະບໍລິຫານງານ ຫຼື ຫົວໜ້າຄິວ ຊຸດໃໝ່ ປະຈຳປີ 2019 ໂດຍງານເລືອກຄະນະໄດ້ຈັດຂຶ້ນໃນວັນທີ 1 ພຶດສະພາຜ່ານມາ ທີ່ສະມາຄົມດັ່ງກ່າວ ( ສະໜາມບິນສາກົນວັດໄຕ ) ນະຄອນຫຼວງວຽງຈັນ ໂດຍໃຫ້ການເຂົ້າຮ່ວມຂອງ ທ່ານ ສີວອນ   ຊັບທະວີ ຫົວໜ້າຂະແໜງຄຸ້ມຄອງການຂົນສົ່ງ ພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ແລະ ທ່ານ ຄຳປະສົງ ພານມີໄຊ ປະທານສະມາຄົມຂົນສົ່ງໂດຍສານແທັກຊີ ນະຄອນຫຼວງວຽງຈັນ, ມີຄະນະບໍລິຫານງານຄິວສະໜາມບິນສາກົນວັດໄຕ ຊຸດເກົ່າ ແລະ ຊຸດໃໝ່ ພ້ອມດ້ວຍແຂກທີ່ຖືກເຊີນ ແລະ ສະມາຊິກ 60 ກວ່າຄົນ.

ທ່ານ ອ້ອມ ພິລາວັນ ຫົວໜ້າຄິວປະຈຳສະໜາມບິນສາກົນວັດໄຕ ຊຸດເກົ່າ ໄດ້ລາຍງານຜົນງານທີ່ໄດ້ປະຕິບັດໜ້າທີ່ໃນ 2 ສະໄໝ ຜ່ານມາ ( ສະໄໝລະ 4 ປີ ) ວ່າ: ນັບແຕ່ເດືອນກຸມພາ 2012 ທີ່ໄດ້ຖືກເລືອກໃຫ້ເປັນຫົວໜ້າຄິວປະຈຳສະໜາມບິນ ເປັນຄັ້ງທຳອິດ ຈົນເຖິງປີ 2015 ກໍໝົດວາລະການດຳລົງຕຳແໜ່ງ. ຫຼັງຈາກນັ້ນ, ກໍໄດ້ມີການເລືອກຕັ້ງ ແລະ ໄດ້ຖືກເລືອກເປັນຫົວໜ້າຄິວ ສະໄໝທີ 2 ( 2016 – 2019 ) ເຊິ່ງການບໍລິຫານງານຂອງຄິວປະຈຳສະໜາມບິນໃນໄລຍະຜ່ານມາ ແມ່ນໄດ້ເນັ້ນເລື່ອງຄວາມເປັນລະບຽບຮຽບຮ້ອຍຂອງສະມາຊິກເປັນຫຼັກ ເປັນຕົ້ນແມ່ນເລື່ອງລະບຽບວິໄນ, ມີ ຄວາມສັດຊື່ບໍລິສຸດ ແລະ ມີ ຄວາມຍຸຕິທຳໃນການບໍລິການຮັບໃຊ້ມວນຊົນ, ນັກທ່ອງທ່ຽວທັງພາຍໃນ ແລະ ຕ່າງປະເທດ ທີ່ເດີນທາງມາທ່ຽວໃນນະຄອນຫຼວງວຽງຈັນ ກໍຄື ສປປ ລາວ.

ໃນພິທີໄດ້ມີການປ່ອນບັດຄັດເລືອກຄະນະບໍລິຫານຄິວຊຸດໃໝ່ ໂດຍມີຜູ້ລົງສະໝັກທັງໝົດ 7 ທ່ານ ເລືອກເອົາພຽງ 3 ທ່ານ. ຜ່ານການນັບຄະແນນຕົວຈິງ ຜົນ ປາກົດວ່າ ເລືອກໄດ້ ທ່ານ ສີພັນດອນ ພົງສະຫວັດ ເປັນຫົວໜ້າຄິວຄົນໃໝ່, ທ່ານ ກົງຄຳ ສິງສະຫວັດດີ ແລະ ທ່ານ ກົງເດືອນ ຈັນທະລາໄຊ ເປັນຄະນະ.

ໂອກາດດຽວກັນ, ທ່ານ ສີວອນ ຊັບທະວີ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຄະນະບໍລິຫານງານຄິວປະຈຳສະໜາມບິນສາກົນວັດໄຕ ຊຸດເກົ່າ ທີ່ໄດ້ນຳພາສະມາຊິກຮັບໃຊ້ມວນຊົນຢ່່າງມີ ຄວາມຍຸຕິທຳ ພ້ອມທັງໄດ້ເນັ້ນໜັກໃຫ້ຄະນະຄິວສະໜາມບິນຊຸດໃໝ່ ສືບຕໍ່ຊີ້ນຳ – ນຳພາວຽກງານຢ່າງມີຜົນສຳເລັດ ເປັນຕົ້ນແມ່ນ: ໃຫ້ປະຕິບັດລະບຽບການຂັບຂີ່ທາງບົກຢ່າງເຄັ່ງຄັດ, ມີມາລະຍາດໃນການຂັບຂີ່, ໃຫ້ກຽດເຊິ່ງກັນ ແລະ ກັນ ເພື່ອເຮັດແນວໃດໃຫ້ນັກທ່ອງທ່ຽວ ຫຼື ຜູ້ໂດຍສານມີ ຄວາມປອດໄພຮອບດ້ານ ແລະ ໄປເຖິງຈຸດໝາຍດ້ວຍ ຄວາມສະຫວັດດີພາບ.

( ຂ່າວ: ສຸລິນ )