ອາເມຣິກາ – ຈີນ ໃຊ້ງົບທາງທະຫານຫຼາຍທີ່ສຸດໃນໂລກ

96

ງົບປະມານທາງທະຫານ ອາເມຣິກາ ປີ 2018 ເພີ່ມຂຶ້ນຄັ້ງທໍາອິດ ໃນຮອບ 7 ປີ ສືບເນື່ອງມາຈາກນະໂຍບາຍລັດຖະບານຂອງ ທ່ານ ໂດນັນ ທຣໍາ ປະທານາທິບໍດີ, ຂະນະທີີ່ ຈີນ ນໍາມາເປັນອັນດັບສອງ; ສ່ວນງົບປະມານທະຫານທົ່ວໂລກ ໃນປີ 2018 ເພີ່ມຂຶ້ນ 2,6% ມາຢູ່ທີ່ 1,8 ພັນຕຶື້ໂດລາ ເພີ່ມຂຶ້ນສອງປີຊ້ອນ.

ສະເພາະ ອາເມຣິກາ ປະເທດດຽວຕົວເລກຢູ່ທີ່ 649 ຕື້ໂດລາ, ຂະນະທີ່ຄ່າໃຊ້ຈ່າຍທາງທະຫານຂອງ ຈີນ ກໍຫຼາຍເຊັ່ນກັນ ໂດຍສອງປະເທດນີ້ຈຶ່ງເປັນຕົວຊຸກຍູ້ໃຫ້ຕົວເລກທົ່ວໂລກສູງຂຶ້ນ.

ຄ່າໃຊ້ຈ່າຍດ້ານການທະຫານຂອງ ຈີນ ເພີ່ມຂຶ້ນ 83% ນັບຕັ້ງແຕ່ປີ 2009 ຢູ່ໃນຕໍາແໜ່ງທີ່ສອງຕາມມາດ້ວຍ ຊາອຸດິດ ອາຣັບບີ ແລະ ອິນເດຍ ທີ່ກໍາລັງປັບປຸງກອງທັບໃຫ້ທັນສະໄໝ ແລະ ຝຣັ່ງ. ຄ່າໃຊ້ຈ່າຍຂອງ 5 ປະເທດ ຄິດເປັນ 60% ຂອງທົ່ວໂລກ, ສ່ວນອັນດັບ 6 – 10 ປະກອບມີ: ຣັດເຊຍ, ອັງກິດ, ເຢຍລະມັນ, ຍີ່ປຸ່ນ ແລະ ສ.ເກົາຫຼີ.

ໃນອາຊຽນປະເທດທີ່ຕິດກຸ່ມອັນດັບ ປະກອບມີ: ສິງກະໂປ ຕິດອັນດັບ 22 ຂອງໂລກ ໃຊ້ຈ່າຍ 10,8 ຕື້ໂດລາ ຫຼື 3,1% ຂອງ ຈີດີພີ ຕາມມາດ້ວຍ ອິນໂດເນເຊຍ ອັນດັບ 26 ໃຊ້ຈ່າຍ 7,4 ຕື້ໂດລາ ຫຼື 0,7% ຂອງ ຈີດີພີ ຕາມມາດ້ວຍໄທ ແລະ ຫວຽດນາມ ອັນດັບ 35 ຕົວເລກຢູ່ທີ່ 5,5 ຕື້ໂດລາ ຫຼື 2,3% ຂອງ ຈີດີພີ.