ໂຮງແຮມສະບາຍດີ ເນັ້ນບໍລິການທີ່ເປັນເລີດ ແລະ ລາຄາທີເປັນກັນເອງ

ດັ່ງທີ່ຮູ້ກັນດີແລ້ວວ່າເມືອງວັງວຽງ ໜຶ່ງໃນຈຸດນັດພົບຂອງບັນດານັກທ່ອງທ່ຽວໃນທົ່ວໂລກ ແລະ ມີຫຼາຍຜູ້ປະກອບການພ້ອມຮັບບໍລິການແຂກເຂົ້າເມືອງ. ຍ້ອນແນວນັ້ນ, ຜູ້ເຮັດທຸລະກິດຂະແໜງດຽວກັນຕ້ອງມີການປັບຕົວເພື່ອຮັບມືກັບການແຂ່ງຂັນ ເຊັ່ນ: ດ້ານໂຮງແຮມ ກໍ່ຕ້ອງມີຈຸດເດັ່ນ ຫຼື ຍຸດທະວິທີໃນການດຶງດູດລູກຄ້າ ເພື່ອບໍ່ໃຫ້ກິດຈະການມີການສະດຸດ; ອີກດ້ານໜຶ່ງແມ່ນສ້າງຄວາມເຂັ້ມແຂງໃຫ້ກັບຮາກຖານທຸລະກິດຄຽງຄູ່ກັບການຂະຫຍາຍຕົວຂອງຂະແໜງການທ່ອງທ່ຽວ.
ມື້ນີ້ ໜັງສືພິມ ເສດຖະກິດ – ການຄ້າ ຍິນດີນໍາສະເໜີອີກໜຶ່ງທຸລະກິດບໍລິການ ຄື: ໂຮງແຮມ ສະບາຍດີ ທີ່ຕັ້ງຢູ່ເມືອງວັງວຽງ ແຂວງວຽງຈັນ ເຊິ່ງເປັນໜຶ່ງໃນສະຖານທີ່ພັກລະດັບດີອັນເປັນທີ່ຮູ້ຈັກຂອງນັກທ່ອງທ່ຽວທັງພາຍໃນ ແລະ ຕ່າງປະເທດ.

ທ່ານ wooseokjang

ທ່ານ wooseokjang ເຈົ້າຂອງໂຮງແຮມໄດ້ໃຫ້ສໍາພາດກັບທີມຂ່າວ ວ່າ: ໂຮງແຮມ ສະບາຍດີ ມີຄວາມເໝາະສົມທີ່ສຸດໃນດ້ານສະຖານທີ່ຕັ້ງ ເພາະຢູ່ເຂດໃນເມືອງໃກ້ກັບສາຍນ້ຳຊອງ ແລະ ສາມາດຊົມວິວພູຜາສະທ້ອນແສງອາທິດໃນຍາມເຊົ້າ ຫຼື ກ່ອນຕາເວັນລັບຂອບຟ້າຍາມແລງ ເຊິ່ງນັກທ່ອງທ່ຽວທີ່ເຂົ້າມາພັກຜ່ອນສ່ວນຫຼາຍກໍ່ແມ່ນຢາກສຳຜັດກັບທຳມະຊາດ. ນອກຈາກນັ້ນ, ໂຮງແຮມພວກເຮົາຍັງໃສ່ໃຈທາງດ້ານການຕົກແຕ່ງທີ່ງົດງາມທັນສະໄໝ, ການບໍລິການດີ, ໃສ່ໃຈທຸກລາຍລະອຽດຂອງລູກຄ້າທີ່ມາໃຊ້ບໍລິການ ທີ່ສໍາຄັນດ້ານຄວາມສະອາດຖືວ່າເປັນສິ່ງທີ່ໃສ່ໃຈເປັນພິເສດ ໂດຍໃນປັດຈຸບັນການບໍລິການທາງໂຮງແຮມ ສະບາຍດີ ຖືວ່າຈັັດຢູ່ໃນລະດັບ 3 ດາວ ແຕ່ເມື່ອທຽບໃສ່ຄ່າບໍລິການແລ້ວຖືວ່າເກັບໃນລາຄາທີ່ຖືກ.


ດ້ວຍຈຸດພິເສດດ້ານທີ່ຕັ້ງເໝາະສົມ, ຄວາມສະອາດສວຍງາມ, ການບໍລິການດີ ແລະ ລາຄາເໝາະສົມ ເຮັດໃຫ້ໂຮງແຮມ ສະບາຍດີ ມີແຂກເຂົ້າພັກຕະຫຼອດບໍ່ວ່າຈະເປັນລະດູແລ້ງ ຫຼື ລະດູຝົນ; ໃນໄລຍະປັດຈຸບັນນີ້ຖືວ່າໃຫ້ເຂົ້າສູ່ລະດູການທ່ອງທ່ຽວເຮັດໃຫ້ຈຳນວນນັກທ່ອງທ່ຽວຄ່ອຍໆເພີ່ມຂຶ້ນ ເຊິ່ງລູກຄ້າຂອງໂຮງແຮມ ສະບາຍດີ ແມ່ນຈະມາຈາກປະເທດເກົາຫຼີ 40%, ໄທ 20%, ຝຣັ່ງ 20% ແລະ ຄົນລາວ ໂດຍສະເພາະແມ່ນລູກຄ້າຈາກປະເທດ ສ.ເກົາຫຼີ ຈະມາພັກກັບທາງໂຮງແຮມແຫ່ງນີ້ຫຼາຍເປັນພິເສດ. ສຳລັບແຂກພາຍໃນປະເທດສ່ວນໃຫຍ່ຈະເປັນໄລຍະວັນສຸກ ຫາ ວັນອາທິດ ເຊິ່ງເປັນໄລຍະພັກຈາກວຽກງານແລ້ວຈະພາກັນມາແບບຄອບຄົວ.
ເຈົ້າຂອງໂຮງແຮມ ສະບາຍດີ ເວົ້າວ່າ: ຂ້າພະເຈົ້າຄິດວ່າຈຳນວນໂຮງແຮມໃນປັດຈຸບັນຖືວ່າຍັງມີໜ້ອຍ ຈຶ່ງເຮັດໃຫ້ຍັງບໍ່ພໍກັບການຮອງຮັບນັກທ່ອງທ່ຽວເທົ່າທີ່ຄວນ, ໂຮງແຮມ ສະບາຍດີ ປັດຈຸບັນນີ້ມີທັງໝົດ 43 ຫ້ອງ ສາມາດຮອງຮັບລູກຄ້າທີ່ຈະເຂົ້າພັກສູງສຸດໄດ້ 114 ຄົນ ແລະ ມີການບໍລິການແບບຄົບວົງຈອນ ແລະ ຍັງມີຮ້ານອາຫານຕິດກັບໂຮງແຮມ ອໍານວຍຄວາມສະດວກຕໍ່ແຂກທີ່ເຂົ້າພັກນໍາອີກ.
ສໍາລັບລາຄາບໍລິການທາງເຈົ້າຂອງໂຮງແຮມກໍ່ມີການປັບປ່ຽນເປັນໄລຍະເພື່ອສ້າງຄວາມສົນໃຈໃຫ້ກັບແຂກເປັນຕົ້ນ ໃນໄລຍະໜ້າຝົນແບບນີ້ໄດ້ປັບຫຼຸດລາຄາຫ້ອງພັກຈາກລາຄາປົກກະຕິ 300,000 ກີບ ມາເປັນ 200,000 ກີບ.

ສຳລັບຮ້ານອາຫານປາຣີຊຽນ ( Parisien cafe ) ແມ່ນມີອາຫານຫຼາກຫຼາຍຢ່າງໃຫ້ເລືອກບໍລິໂພກ ທັງອາຫານລາວ, ໄທ, ອີຕາລີ… ໂດຍພໍ່ຄົວມືອາຊີບໃນສະຖານທີ່ຂອງຮ້ານອາຫານຍັງມີລາຍການສ້າງສັນຄວາມມ່ວນຊື່ນ ໂດຍການເຊີນນັກຮ້ອງ – ນັກສະແດງເຂົ້າມາສ້າງສີສັນເປັນໄລຍະ ທຸກໆຄໍ່າຄືນທາງຮ້ານອາຫານກໍ່ມີດົນຕີເສບສົດເພື່ອບໍ່ໃຫ້ແຂກ ຫຼື ນັກທ່ອງທ່ຽວທີ່ເຂົ້າພັກຮູ້ສຶກງຽບເຫງົາ ແລະ ບໍ່ຈໍາເປັນຕ້ອງໄປລໍາບາກໃນການຊອກອາຫານ ແລະ ເຄື່ອງດື່ມ.

ແນວໃດກໍ່ຕາມ ທາງເຈົ້າຂອງໂຮງແຮມ ສະບາຍດີ ກໍ່ຍັງເນັ້ນການບໍລິການທີ່ໃຫ້ຄວາມຮູ້ສຶກເປັນຄອບຄົວ ທຸກຢ່າງສາມາດລົມກັນໄດ້ຖືເອົາຄວາມຕ້ອງການຂອງລູກຄ້າເປັນຫົວໃຈຫຼັກໃນການໃຫ້ບໍລິການ ພ້ອມທັງຍັງມີການຮັບຟັງຄວາມຄິດເຫັນຂອງລູກຄ້າ ເພື່ອນຳມາປັບປຸງ ແລະ ແກ້ໄຂຢູ່ຕະຫຼອດເວລາ.
ສຳລັບທ່ານໃດທີ່ຕ້ອງການໄປທ່ຽວເມືອງວັງວຽງ ກຳລັງຊອກຫາບ່ອນພັກທີ່ມີຄວາມຄົບຖ້ວນຂອງການໃຫ້ບໍລິການ ພ້ອມທັງຄວາມສະດວກສະບາຍ ແລະ ລາຄາທີ່ເປັນກາງ ສາມາດເຂົ້າໄປຕິດຕໍ່ສອບຖາມຂໍ້ມູນກັບທາງໂຮງແຮມ ສະບາຍດີ ໄດ້ ໂດຍໂຮງແຮມ ສະບາຍດີ ຕັ້ງຢູ່ທີ່ບ້ານເມືອງຊອງ ເມືອງວັງວຽງ ແຂວງວຽງຈັນ.

%d bloggers like this: