ເປີດໂຕ ພີເຄພີ ອາພາດເມັນ

ກຸ່ມບໍລິສັດ ພູເຂົາເພັດ ຫຼື PKP ເຊິ່ງເລີ່ມຕົ້ນທຸລະກິດຈາກການເປີດຮ້ານຄຳພູເຂົາເພັດ ເຊິ່ງເປັນການໃຫ້ບໍລິການເຄື່ອງປະດັບ ຄຳ ແລະ ເພັດ ມາຫຼາຍກວ່າ 18 ປີ ທີ່ໄດ້ຮັບຄວາມເຊື່ອຖືຈາກສັງຄົມຕະຫຼອດມາ. ນອກຈາກຮ້ານຄຳແລ້ວ PKP ກໍ່ຍັງໄດ້ເປີດໃຫ້ບໍລິການທຸລະກິດດ້ານອື່ນຕາມມາ ເຊັ່ນ: PKP ນຳເຂົ້າ ແລະ ສົ່ງອອກວັດຖຸມີຄ່າ ຈໍາກັດຜູ້ດຽວ, PKP ເທເລຄອມ, PKP ແລກປ່ຽນເງິນຕາຕ່າງປະເທດ ແລະ ຫຼ້າສຸດໄດ້ເປີດ PKP ອາພາດເມັນຂຶ້ນ.

ງານເປີດໂຕ PKP ອາພາດເມັ້ນ ໄດ້ຈັດຂຶ້ນໃນວັນທີ 2 ກໍລະກົດ 2017 ທີ່ຜ່ານມາ ໂດຍການເຂົ້າຮ່ວມຂອງ ທ່ານ ນາງ ຄູນມີ ທຳມະວົງ ຜູ້ອຳນວຍການ ກຸ່ມບໍລິສັດ ພູເຂົາເພັດ, ທ່ານ ນາງ ເພັດມາລີ ທຳມະວົງ ຮອງຜູ້ອຳນວຍການກຸ່ມບໍລິສັດ ພູເຂົາເພັດ ແລະ ແຂກຈາກພາກສ່ວນຕ່າງໆເຂົ້າຮ່ວມ.

ທ່ານ ນາງ ເພັດມາລີ ທຳມະວົງ ໄດ້ກ່າວວ່າ: ຜູ້ບໍລິຫານກຸ່ມບໍລິສັດ PKP ໄດ້ເລັ່ງເຫັນເຖິງຄວາມສະດວກສະບາຍໃນການໃຊ້ຊີວິດຂອງຄົນເມືອງໃຫຍ່ ແລະ ເພື່ອເປັນການຂະຫຍາຍຮາກຖານຄວາມແຂງແກ່ນຂອງບໍລິສັດ ຈຶ່ງໄດ້ລົງມືສ້າງອາພາດເມັນແຫ່ງນີ້ຂຶ້ນໃນປີ 2015 ແລະ ການກໍ່ສ້າງກໍ່ໄດ້ສຳເລັດໃນເດືອນມິຖຸນາ 2017 ເຊິ່ງຕັ້ງຢູ່ທີ່ບ້ານນາຄຳ ເມືອງສີໂຄດຕະບອງ ນະຄອນຫຼວງວຽງຈັນ.

PKP ອາພາດເມັນ ມີທັງໝົດ 7 ຊັ້ນ ປະກອບມີ 19 ຫ້ອງນອນ, ຕັ້ງຢູ່ໃຈກາງເມືອງ ມີໂຄງສ້າງທີ່ໄດ້ມາດຕະຖານ ແລະ ມີຄວາມປອດໄພເປັນຢ່າງສູງ, ເນັ້ນ ຄວາມສະດວກສະບາຍຂອງລູກຄ້າ ທຸກໆພື້ນທີ່ສາມາດໃຊ້ງານໄດ້ຢ່າງລົງຕົວ ພ້ອມທັງເຟີນີເຈີຄົບຊຸດ ເຊິ່ງໄດ້ຮັບການອອກແບບ ແລະ ຕົກແຕ່ງພາຍໃນ ໂດຍທີມງານຈາກປະເທດຝຣັ່ງ, ອຸປະກອນທີ່ນຳໃຊ້ລ້ວນແຕ່ນຳເຂົ້າຈາກຕ່າງປະເທດ ແລະ ສະຖານທີ່ຈອດລົດທີ່ກວ້າງຂວາງ.

%d bloggers like this: