ຄາວານີ ຄວ້າລາງວັນນັກເຕະດີເດັ່ນຂອງ ລີກເອິງ

ເອດິນສັນ ຄາວານີ ດາວຍິງຂອງ ປາຣີ ແຊັງແຊກແມງ ຄວ້າລາງວັນນັກເຕະດີເດັ່ນຂອງ ລີກເອິງ ຝຣັ່ງ ປະຈໍາລະດູການນີ້ໄປຄອງເປັນທີ່ຮຽບຮ້ອຍຈາກການປະກາດເມື່ອວັນທີ 15 ພຶດສະພາ ທີ່ຜ່ານມາ; ຂະນະທີ່ນັກເຕະຂອງ ໂມນາໂກ ກວາດລາງວັນປະຈໍາ ລີກເອິງ ໄດ້ຫຼາຍທີ່ສຸດ.

ກອງໜ້າຊາວອູຣູກວາຍ ສ້າງຜົນງານໄດ້ຢ່າງໂດດເດັ່ນໃນລະດູການນີ້ ໂດຍຫຼ້າສຸດຍິງປະຕູໃນລີກໄປແລ້ວ 35 ປະຕູ ຈາກການລົງສະໜາມ 35 ນັດ ເຖິງວ່າ ປາຣີ ແຊງແຊກແມງ ກໍາລັງຈະປິດສາກຕໍາແໜ່ງດ້ວຍຮອງແຊັມ ໃນລະດູການນີ້ກໍ່ຕາມ.

ຂະນະທີ່ນັກເຕະຂອງ ໂມນາໂກ ກວາດລາງວັນໄດ້ຫຼາຍທີ່ສຸດໃນປີນີ້ ນໍາໂດຍ: ຄີລຽນ ເອມບັບເປ ດາວເດັ່ນອາຍຸພຽງ 18 ປີ ຄວ້າລາງວັນນັກເຕະດາວເດັ່ນປະຈໍາລະດູການນີ້ຈາກການລະເບີດຟອມຍິງໄດ້ 14 ປະຕູ ກັບ 11 ແອສຊິສ ( ຈ່າຍໃຫ້ໝູ່ຍິງ ); ດານິເຢລ ຊູບາຊິຊ ຜູ້ຮັກສາປະຕູເພື່ອນຮ່ວມທີມໄດ້ຮັບລາງວັນຜູ້ຮັກສາປະຕູດີເດັ່ນ ແລະ ເລໂອນາໂດ ຊາດິມ ຜູ້ຈັດການທີມຂອງ ໂມນາໂກ ຄວ້າລາງວັນຜູ້ຈັດການທີມດີເດັ່ນຫຼັງພາທີມສ້າງຜົນງານໄດ້ຢ່າງຮ້ອນແຮງ ແລະ ຈໍ່ຈະຄວ້າແຊັມລະດູການນີ້.

%d bloggers like this: