ໂມນາໂກ ຝັນເປັນຈິງຄວ້າແຊັມ ລີກເອິງ ຄັ້ງທໍາອິດໃນຮອບ 17 ປີ

ຫຼັງຈາກທີ່ ປາຣີ ແຊງແຊກແມງ ຄອງແຊັມມາເຖິງ 4 ລະດູການຕິດຕໍ່ກັນ, ໃນທີ່ສຸດແຊັມ ລີກເອິງ ກໍ່ປ່ຽນມືມາເປັນຂອງ ໂມນາໂກ ຈົນໄດ້ ລວມທັງຍັງເປັນແຊັມຄັ້ງທໍາອິດໃນຮອບ 17 ປີຂອງພວກເຂົາຫຼັງລົງສະໜາມນັດຫຼ້າສຸດເປີດບ້ານຊະນະ ແຊງ ເອຕຽນ 2 – 0 ເມື່ອວັນພຸດ ທີ 17 ພຶດສະພາ ທີ່ຜ່ານມາ.

ກ່ອນໜ້ານີ້ ໂມນາໂກ ມີ 89 ຄະແນນ ຈາກການລົງສະໜາມ 36 ນັດ ຫຼາຍກວ່າ ປາຣີ ແຊງແຊກແມງ ທີ່ເປັນອັນດັບ 2 ຢູ່ 3 ຄະແນນ ໂດຍທີ່ ປາຣີ ແຊງແຊກແມງ ລົງຫຼິ້ນຫຼາຍກວ່າ 1 ນັດ ເຊິ່ງນັ້ນໝາຍຄວາມວ່າຖ້າຫາກພວກເຂົາເກັບເພີ່ມໄດ້ຢ່າງໜ້ອຍ 1 ຄະແນນ ກໍ່ຈະໄດ້ແຊັມແບບເປັນທາງການທັນທີ.

ທ້າຍທີ່ສຸດແລ້ວ ໂມນາໂກ ກໍ່ເຖິງຂັ້ນຊະນະ ແລະ ຄວ້າແຊັມໄປເລີຍຫຼັງຈາກພວກເຂົາໄດ້ປະຕູຈາກ ຄີລຽນ ເອັມບັບເປ ໃນນາທີໆ 19 ແລະ ວາແລ ແຊກແມງ ໃນໄລຍະທົດເວລາບາດເຈັບຂອງເຄິ່ງເວລາທີ 2 ຊ່ວຍໃຫ້ທີມເປີດບ້ານຊະນະ ແຊງ ເອຕຽນ 2 – 0 ເຮັດໃຫ້ທີມເກັບເພີ່ມເປັນ 92 ຄະແນນ ໜີຫ່າງອັນດັບ 2 ເຖິງ 6 ຄະແນນ ຄວ້າແຊັມໄປຄອງໄດ້ສຳເລັດ ເພາະເຫຼືອການແຂ່ງຂັນພຽງນັດດຽວ ເຊິ່ງນັ້ນຖືເປັນແຊັມລີກສູງສຸດສະໄໝທໍາອິດຂອງພວກເຂົາໃນຮອບ 17 ປີ ແລະ ແຊັມ ລີກເອິງ ສະໄໝທີ 8 ອີກດ້ວຍ.

ທັງນີ້, ຖືວ່າ ໂມນາໂກ ໄດ້ແຊັມໄປແບບຊະນະໃຈແຟນບານຫຼາຍຄົນ ເພາະຕອນນີ້ພວກເຂົາສາມາດຍິງປະຕູໃນລີກໄດ້ເຖິງ 104 ປະຕູ ໂດຍປັດຈຸບັນ ຣາດາເມລ ຟັລເກົາ ກອງໜ້າຊາວໂກລົມບີ ເປັນດາວຍິງສູງສຸດຂອງທີມໃນລີກຈາກການຍິງໄປແລ້ວ 21 ປະຕູ.

%d bloggers like this: