ເລວານ ຍິງໃຫ້ກັບ ບາເຢິນ ຄົບ 100 ປະຕູແລ້ວ ຫຼັງຊ່ວຍທີມ ຖະຫຼົ່ມ ແຟຣງເຟິດ 3 – 0

ໂຣເບີດ ເລວານດອຟສະກີ ກອງໜ້າຂອງ ບາເຢິນ ມິວນິກ ສ້າງສະຖິຕິຍິງປະຕູຄົບ 100 ປະຕູໃຫ້ກັບຕົ້ນສັງກັດເປັນທີ່ຮຽບຮ້ອຍຈາກການຫຼິ້ນພຽງ 136 ນັດ ໂດຍໄດ້ຈາກການເໝົາຄົນດຽວ 2 ປະຕູ ໃນການແຂ່ງຂັນບານເຕະ ບຸນເດສລີກາ ເຢຍລະມັນ ນັດທີ່ ບາເຢິນ ມິວນິກ ເປີດສະໜາມ ອັລລິອັນ ອາຣີນາ ເອົາຊະນະ ໄອທຣັດ ແຟຣງເຟິດ 3 – 0 ເມື່ອວັນເສົາ ທີ 11 ມີນາ ທີ່ຜ່ານມາ.
2 ປະຕູໃນເກມດັ່ງກ່າວຂອງ ເລວານດອຟສະກີ ເປັນປະຕູທີ່ເຮັດໃຫ້ກັບ ບາເຢິນ ຂຶ້ນນໍາ 1 – 0 ໃນນາທີໆ 38 ແລະ ປະຕູຕອກຢໍ້າໄຊຊະນະ 3 – 0 ໃນນາທີໆ 55 ສົ່ງຜົນໃຫ້ຍິງປະຕູໃນລີກລະດູການນີ້ໄປແລ້ວ 21 ປະຕູ ແລະ ຫາກນັບລວມທຸກລາຍການກໍ່ຖືວ່າເປັນປະຕູທີ 33 ຈາກການລົງຫຼິ້ນພຽງ 36 ນັດ ເຊິ່ງຫາກນັບປະຕູລວມໃນໄລຍະທີ່ຍ້າຍມາຫຼິ້ນໃຫ້ກັບ ບາເຢິນ ມິວນິກ ເມື່ອປີ 2014 ລາວລົງຫຼິ້ນໃຫ້ກັບ ບາເຢິນ ຄົບ 136 ນັດ ລວມທຸກລາຍການສາມາດຍິງໄປແລ້ວ 100 ປະຕູ, ຂະນະທີ່ ແກດ ມຸລເລີ ຕໍານານດາວຍິງຊາວເຢຍລະມັນ ຍັງເປັນເຈົ້າຂອງຕໍາແໜ່ງດາວຍິງສູງສຸດຕະຫຼອດການຂອງ ບາເຢິນ ມິວນິກ ດ້ວຍຈໍານວນ 525 ປະຕູ.
ສໍາລັບໄຊຊະນະດັ່ງກ່າວຍັງສົ່ງຜົນໃຫ້ ບາເຢິນ ມິວນິກ ເກັບເພີ່ມເປັນ 59 ຄະແນນ ຈາກການລົງສະໜາມ 24 ນັດ ໜີຫ່າງອັນດັບ 2 ຢ່າງ ລິບຊິກ ເຖິງ 10 ຄະແນນ, ສ່ວນ ແຟຣງເຟີດ ຍັງມີ 35 ຄະແນນ ຢຶດອັນດັບທີ 6 ຂອງຕາຕະລາງຄະແນນລວມຕໍ່ໄປ.

%d bloggers like this: