ເມືອງຫາດຊາຍຟອງ ເປີດງານວາງສະແດງສິນຄ້າປະຈຳປີ - Laoedaily

ເມືອງຫາດຊາຍຟອງ ເປີດງານວາງສະແດງສິນຄ້າປະຈຳປີ

ເມືອງຫາດຊາຍຟອງ ນະຄອນຫຼວງວຽງຈັນ ໄດ້ຈັດງານວາງສະແດງ ແລະ ຂາຍຜະລິດຕະພັນສິນຄ້າກະສິກຳ, ອຸດສາຫະກຳ, ຫັດຖະກຳຂອງຄອບຄົວຕົວແບບ ແລະ ໂອດ໊ອບ ຄັ້ງທີ 5 ປະຈຳປີ 2019 ໂດຍນຳສິນຄ້າທີ່ເປັນທ່າແຮງຂອງເມືອງ 35 ຫົວໜ່ວຍ ລວມມູນຄ່າເກືອບ 1 ຕື້ກີບ ມາວາງສະແດງ ທັງເປັນການສົ່ງເສີມຜູ້ຜະລິດພາຍໃນເມືອງ.

ພິທີເປີດງານດັ່ງກ່າວມີຂຶ້ນໃນວັນທີ 30 ມັງກອນ 2019 ທີ່ກໍາແພງເມືອງວຽງຈັນບູຮານ ບ້ານໜອງໄຮ ເມືອງຫາດຊາຍຟອງ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫຼວງວຽງຈັນ, ທ່ານ ວົງເດືອນ ບຸນຍະແສງ ເຈົ້າເມືອງໆຫາດຊາຍຟອງ, ທ່ານ ສົມປະສົງ ສະຫງວນວົງ ຮອງຫົວໜ້າພະແນກອຸດສາຫະກໍາ ແລະ ການຄ້າ, ມີເຈົ້າເມືອງອ້ອມຂ້າງ, ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ວັນທະນູສິນ ອິນທະສີນາ ຫົວໜ້າຫ້ອງການອຸດສາຫະກໍາ ແລະ ການຄ້າ ເມືອງຫາດຊາຍຟອງ ກ່າວວ່າ: ການຈັດງານວາງສະແດງສິນຄ້າຄັ້ງນີ້ ກໍເພື່ອເປັນການເປີດກວ້າງແລກປ່ຽນປະສົບການ, ເຕັກນິກການຜະລິດແນໃສ່ເຮັດໃຫ້ສິນຄ້າມີຄຸນນະພາບດີຂຶ້ນລະຫວ່າງຜູ້ຜະລິດດ້ວຍກັນເອງ. ພ້ອມກັນນັ້ນ, ກໍເປັນການດຶງດູດນັກທ່ອງທ່ຽວ, ດຶງດູດນັກລົງທຶນເຂົ້າມາພັດທະນາເມືອງຫາດຊາຍຟອງໃຫ້ຂະຫຍາຍຕົວຂຶ້ນເລື້ອຍໆ. ນອກຈາກນີ້, ກໍຍັງເປັນການສົ່ງເສີມການຜະລິດຂອງປະຊາຊົນພາຍໃນເມືອງຫາດຊາຍຟອງ ຕາມທິດຊີ້ນໍາ 1 ເມືອງ 1 ຜະລິດຕະພັນ. ພາຍໃນງານມີສິນຄ້າ 35 ຫົວໜ່ວຍ. ໃນນີ້, ເປັນສິນຄ້າໂອດ໊ອບ 6 ຫົວໜ່ວຍ ລວມມູນຄ່າສິນຄ້າທັງໝົດເກືອບ 1 ຕື້ກີບ.

ທ່ານ ສີວຽງຄໍາ ທໍາມະວົງ ເຈົ້າຂອງສະຖານທີ່ຈັດງານ ໃຫ້ຮູ້ວ່າ: ການກະກຽມສະຖານທີ່ເພື່ອຮອງຮັບງານດັ່ງກ່າວນີ້ແມ່ນວຽກທີ່ພວກເຮົາເອົາໃຈໃສ່ຢ່າງຕັ້ງໜ້າ ເພື່ອຢາກໃຫ້ງານອອກມາດີ, ພາຍໃນງານໄດ້ມີການກະກຽມກິດຈະກໍາຫຼາກຫຼາຍຢ່າງໃຫ້ລູກຄ້າທີ່ມາໃນງານໄດ້ຮ່ວມມ່ວນຊື່ນໄປນໍາກັນ, ມີທັງການສະແດງສິລະປະ, ການຂັບລໍາ, ການຮ້ອງເພງ ແລະ ຍັງມີຮ້ານຄ້າທີ່ຂາຍອາຫານການກິນໄວ້ບໍລິການທຸກທ່ານໂດຍງານຕະຫຼາດນັດຈະດໍາເນີນໄປຈົນເຖິງວັນທີ 3 ກຸມພາ 2019 ນີ້.

ແມ່ ດວງໃຈ ເຈົ້າຂອງຜະລິດຕະພັນ ນໍ້າປາແດກແມ່ດວງໃຈ ທີ່ເປັນໜຶ່ງໃນຄອບຄົວຕົວແບບຂອງເມືອງຫາດຊາຍຟອງ ໃຫ້ຮູ້ວ່າ: ນໍ້າປາແດກແມ່ດວງໃຈ ໄດ້ຄິດຄົ້ນສູດຂຶ້ນມາເອງ, ວັດຖຸດິບທຸກຢ່າງແມ່ນມາຈາກທໍາມະຊາດ 100% ແລະ ສະອາດຖືກຫຼັກອະນາໄມແນ່ນອນ ຈຶ່ງໄດ້ຖືກຮັບຮອງເປັນຄອບຄົວຕົວແບບຂອງເມືອງ ແລະ ທຸກເທື່ອທີ່ມີງານວາງສະແດງສິນຄ້າ ກໍຈະຖືກຮັບເຊີນນໍາເອົາສິນຄ້າໄປວາງຈຳໜ່າຍເຮັດໃຫ້ເປັນຊ່ອງທາງທີ່ດີໃນການໂຄສະນາສິນຄ້າໃຫ້ສັງຄົມໄດ້ຮູ້ຈັກ ແລະ ຍອມຮັບໃນຜະລິດຕະພັນຂອງເຮົາ, ເວົ້າລວມກໍເປັນການເອກອ້າງຫົວຄິດປະດິດສ້າງໃນການຜະລິດສິນຄ້າອອກສູ່ສາຍຕາມວນຊົນທັງພາຍໃນ ແລະ ຕ່າງປະເທດນໍາອີກ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ