ເຕືອນ! ເຝົ້າລະວັງໄຂ້ເລືອດອອກ ຜ່ານມາ 4 ເດືອນ ທົ່ວປະເທດມີຜູ້ຕິດເຊື້ອຫຼາຍເກືອບ 500 ກໍລະນີ

ກ້າວເຂົ້າສູ່ໜ້າຝົນສິ່ງໜຶ່ງທີ່ໜ້າເປັນຫ່ວງກໍ່ຄືພະຍາດທີ່ມັກລະບາດ ນັ້ນກໍ່ຄືພະຍາດໄຂ້ເລືອດອອກ ຫຼື ໄຂ້ຍຸງລາຍ ເຊິ່ງແຕ່ລະປີມີຄົນເຈັບນັບເປັນຈໍານວນຫຼວງຫຼາຍ ແລະ ບາງປີກໍ່ຮຸນແຮງເຖິງຂັ້ນມີຄົນເສຍຊີວິດຍ້ອນຫຼາຍສິບຄົນ ກະທົບຕໍ່ເສດຖະກິດ – ຊີວິດ ແລະ ສັງຄົມ; ຂະນະທີ່ 4 ເດືອນຕົ້ນປີ 2018 ນີ້ ມີຈໍານວນຜູ້ຕິດເຊື້ອໄປແລ້ວເກືອບ 500 ກໍລະນີໃນຂອບເຂດທົ່ວປະເທດ.

ທ່ານ ດຣ. ອ່ອນຈັນ ແກ້ວສະຫວັນ ຫົວໜ້າສູນວິເຄາະ ແລະ ລະບາດວິທະຍາ ( ສວລ ) ກະຊວງສາທາລະນະສຸກ ໃຫ້ຮູ້ວ່າ: ໃນເມື່ອກ່ອນການລະບາດຂອງພະຍາດໄຂ້ເລືອດອອກແມ່ນມີສະເພາະລະດູຝົນ ແລະ ເກີດໃນເດັກນ້ອຍເປັນສ່ວນຫຼາຍ ແຕ່ປັດຈຸບັນແມ່ນສາມາດເກີດຂຶ້ນໄດ້ທຸກຍາມບໍ່ຈຳກັດເພດ – ໄວ ໂດຍມີຍຸງລາຍເປັນພາຫະນຳເຊື້ອເປັນຕົ້ນ ໃນໄລຍະລະດູຝົນທີ່ມີນ້ຳຖ້ວມຂັງຈະກາຍເປັນແຫຼ່ງແຜ່ຂະຫຍາຍໜອນນ້ຳເປັນຈຳນວນຫຼາຍ ຈຶ່ງເຮັດໃຫ້ໄລຍະນີ້ຈົນຮອດເດືອນຕຸລາຈະມີການກວດພົບຄົນເຈັບຫຼາຍກວ່າປົກກະຕິ ຈຶ່ງຕ້ອງໄດ້ມີການເຝົ້າລະວັງຢ່າງໃກ້ຊິດ ແລະ ພະຍາດທີ່ຕິດຕໍ່ກັນ 5 ຄົນຂຶ້ນໄປ ແມ່ນຈະກາຍເປັນພະຍາດລະບາດ.

ສະເພາະພາຍໃນ 18 ອາທິດກໍ່ຄື 4 ເດືອນກວ່າ ໃນປີ 2018 ນີ້ ( ວັນທີ 30 ທັນວາ 2017 – ວັນທີ 9 ພຶດສະພາ 2018 ) ທົ່ວປະເທດມີຄົນເຈັບເປັນພະຍາດໄຂ້ເລືອດອອກແລ້ວ 490 ກໍລະນີ ແລະ ຕົວເລກຜູ້ເສຍຊີວິດ 1 ຄົນ. ໃນນັ້ນ, ແຂວງອັດຕະປືມີຕົວເລກຜູ້ເຈັບຫຼາຍເຖິງ 257 ຄົນ ເສຍຊີວິດ 1 ຄົນ, ຮອງລົງມາແມ່ນນະຄອນຫຼວງວຽງຈັນ ມີ 54 ຄົນ, ຈຳປາສັກ 53 ຄົນ ແລະ ແຂວງອື່ນໆອີກຈຳນວນໜຶ່ງ.

ສຳລັບຕົວເລກຄົນເຈັບເປັນໄຂ້ເລືອດອອກ ໃນປີ 2017 ມີ 11.068 ຄົນ ເສຍຊີວິດ 14 ຄົນ; ປີ 2016 ເຈັບ 5.618 ຄົນ ເສຍຊີວິດ 10 ຄົນ; ປີ 2015 ເຈັບ 1.959 ຄົນ ບໍ່ມີຜູ້ເສຍຊີວິດ; ປີ 2014 ເຈັບ 1.716 ຄົນ ບໍ່ມີຜູ້ເສຍຊີວິດ; ປີ 2013 ມີຜູ້ເຈັບ 44.250 ຄົນ ເສຍຊີວິດ 95 ຄົນ, ຖືວ່າປີ 2013 ມີຕົວເລກຜູ້ເຈັບ ແລະ ເສຍຊີວິດຫຼາຍກວ່າໝູ່ ເຊິ່ງນັບແຕ່ນັ້ນມາຂະແໜງສາທາທົ່ວປະເທດກໍ່ໄດ້ລົງສົມທົບກັບອຳນາດການປົກຄອງເມືອງ, ບ້ານ ເຝົ້າລະວັງ ແລະ ອະນາໄມເຂດອ້ອມແອ້ມເຮືອນຊານ ກຳຈັດການແຜ່ພັນຂອງຍຸງອັນຊ່ວຍໃຫ້ມີຜູ້ເຈັບເປັນໄຂ້ຍຸງມີຈຳນວນຫຼຸດລົງໃນແຕ່ລະປີ.

ທ່ານໄດ້ກ່າວຕື່ມວ່າ: ນອກຈາກພະຍາດໄຂ້ເລືອດອອກແລ້ວ ພວກເຮົາຍັງມີການເຝົ້າລະວັງ 17 ອາການ ແລະ ພະຍາດທີ່ສູນຂອງພວກເຮົາໄດ້ຮ່ວມມືກັບຂະແໜງການອື່ນໆ ເປັນຕົ້ນແມ່ນສູນວິໄຈພະຍາດສັດຂອງກະຊວງກະສິກຳ – ປ່າໄມ້ ໃນການຈັດຕັ້ງປະຕິບັດວຽກງານເຝົ້າລະວັງ ແລະ ໂຕ້ຕອບຕໍ່ພະຍາດທີ່ເກີດຈາກສັດສູ່ຄົນມີ 5 ພະຍາດ ຄື: ພະຍາດໄຂ້ຫວັດສັດປີກ, ພະຍາດວໍ້, ພະຍາດລໍຊໍ, ໄຂ້ຍ່ຽວໜູ ແລະ ພະຍາດໄຂ້ເລືອດດຳ.

ສະເພາະໄລຍະຝົນນີ້ເພື່ອປ້ອງກັນ ແລະ ສະກັດກັ້ນໃນການລະບາດຂອງໄຂ້ເລືອດອອກ ສູນວິເຄາະ ແລະ ລະບາດວິທະຍາ ( ສວລ ) ແມ່ນຈະລົງກວດກາທຳລາຍແຫຼ່ງເພາະພັນຍຸງແຕ່ລະບ້ານທີ່ກວດພົບ, ພົ່ນຢາ, ປ່ອຍປາຫາງນົກຍຸງ, ຊອກຫາກໍລະນີຄົນເຈັບທົ່ວປະເທດ, ເອົາໃຈໃສ່ໃນການລາຍງານກໍລະນີຄົນເຈັບພ້ອມລົງກວດຄົນເຈັບທີ່ເປັນກຸ່ມສ່ຽງ ເພື່ອນຳສົ່ງໂຮງໝໍໃຫ້ທັນການ ໂດຍມີທ່ານໝໍຊ່ຽວຊານລົງກວດ ແລະ ແນະນຳປະຊາຊົນບໍ່ໃຫ້ໄປປິ່ນປົວຕາມຄລີນິກເອກະຊົນ ໂດຍແນະນຳໃຫ້ປະຊາຊົນໄປກວດຕາມໂຮງໝໍແຂວງ ຫຼື ໂຮງໝໍສູນກາງເພື່ອຄວາມແນ່ນອນ. ໃນກໍລະນີກຸ່ມສ່ຽງເປັນໄຂ້ເລືອດອອກຈະຕ້ອງໄດ້ມີການກວດ 3 ພະຍາດ ຄື: ພະຍາດໄຂ້ເລືອດອອກ, ພະຍາດຈີກູນຄຸນຢາ ແລະ ພະຍາດຊິກາ. ພະຍາດໄຂ້ເລືອດອອກຈະມີ 3 ໄລຍະ ຄື: ໄຂ້ເລືອດອອກບໍ່ມີອາການເຕືອນ ( ຈະມີອາການເປັນໄຂ້ຫວັດທຳມະດາ ), ໄຂ້ເລືອດອອກມີອາການເຕືອນ ( ຈະມີອາການຮາກຕໍ່ເນື່ອງ ຫຼື ມີອາການເຈັບທ້ອງ ) ແລະ ໄຂ້ເລືອດອອກຮ້າຍແຮງ ( ໂດຍຈະຮ້າຍແຮງຈົນຂຶ້ນສະໝອງ, ທຳລາຍຕັບ, ຫົວໃຈ ແລະ ອະໄວຍະວະອື່ນໆ ).

ທ່ານ ນາງ ສຈ. ດຣ ດວງດາວ ສຸກອາລຸນ ຮອງຜູ້ອຳນວຍການ ໂຮງໝໍມະໂຫສົດ ນະຄອນຫຼວງວຽງຈັນ ໃຫ້ຮູ້ວ່າ: ໂຮງໝໍມະໂຫສົດເປັນໂຮງໝໍສູນກາງທີ່ມີຄົນເຂົ້າມາໃຊ້ບໍລິການຫຼາຍ ສຳລັບການກຽມພ້ອມໃນການຮັບມືກັບຜູ້ເຈັບເປັນໄຂ້ເລືອດອອກໃນລະດູຝົນທີ່ຈະມາເຖິງ ແມ່ນພວກເຮົາມີການກຽມພ້ອມທັງວຽກງານປ້ອງກັນ ແລະ ວຽກງານປິ່ນປົວ.

ທ່ານ ຄຳສິງ ແກ້ວທອງກຸ ຜູ້ອຳນວຍການ ໂຮງໝໍແຂວງຈຳປາສັກ ໄດ້ໃຫ້ສຳພາດວ່າ: ສຳລັບໂຮງໝໍແຂວງຈຳປາສັກ ແມ່ນໄດ້ມີການກຽມພ້ອມໃນການຮັບມືກັບພະຍາດໄຂ້ເລືອດອອກທີ່ຈະລະບາດໃນລະດູຝົນນີ້ ໂດຍທາງໂຮງໝໍໄດ້ມີການແຕ່ງຕັ້ງໜ່ວຍງານແພດ ເພື່ອຮັບມືກັບຄົນເຈັບທີ່ຈະເຂົ້າມາປິ່ນປົວເວົ້າລວມ, ເວົ້າສະເພາະແມ່ນມີທັງຂະແໜງເດັກນ້ອຍ ແລະ ຜູ້ໃຫຍ່, ກຽມດ້ານເຄື່ອງມືອຸປະກອນຕ່າງໆ, ມີຄວາມພ້ອມດ້ານຢາ ແລະ ພວກເຮົາໄດ້ມີການຝຶກອົບຮົມດ້ານເຕັກນິກໃຫ້ກັບພະນັກງານ.

ໂຮງໝໍແຂວງຈຳປາສັກ ແມ່ນໂຮງໝໍ 250 ຕຽງ ຖ້າຫາກວ່າມີຈຳນວນຄົນເຈັບເພີ່ມຂຶ້ນຫຼາຍ ພວກເຮົາກໍ່ຈະໃຊ້ມາດຕະການຕຽງເສີມໃສ່ຫ້ອງປະຊຸມ ເຊິ່ງສາມາດເພີ່ມອີກ 30 – 40 ຕຽງ. ສະນັ້ນ, ເວົ້າເລື່ອງ ຄວາມພ້ອມໃນການຮັບມືກັບການລະບາດຂອງໄຂ້ເລືອດອອກໃນລະດູຝົນນີ້ແມ່ນພວກເຮົາມີຄວາມພ້ອມໃຫ້ບໍລິການ, ທ່ານ ຄຳສິງ ແກ້ວທອງກຸ ກ່າວ.

ດ້ານຂະແໜງຕ້ານໄຂ້ຍຸງ ພະແນກສາທາລະນະສຸກ ແຂວງເຊກອງ ໃຫ້ຮູ້ວ່າ: ທາງແຂວງກໍ່ໄດ້ມີການກະກຽມຢາຂ້າໜອນນ້ຳ ແລະ ຢາພົ່ນ ເພື່ອແຈກຢາຍໃຫ້ກັບປະຊາຊົນທີ່ຢູ່ເຂດທີ່ມີຄວາມສ່ຽງ ເຊິ່ງໃນປີຜ່ານມາເຂດທີ່ມີຄວາມສ່ຽງເປັນພະຍາດໄຂ້ເລືອດອອກຫຼາຍກວ່າໝູ່ແມ່ນເມືອງລະມາມ ແລະ ເມືອງທ່າແຕງ, ສ່ວນປີນີ້ເມືອງທ່າແຕງ ເລີ່ມມີຜູ້ເປັນໄຂ້ ແລະ ພວກເຮົາກໍ່ໄດ້ໄປຢາຍຢາຂ້າໜອນນ້ຳຍຸງລາຍ ແລະ ໄດ້ໄປພົ່ນຢາຢູ່ຈຸດແຫຼ່ງເພາະພັນຂອງຍຸງ.

%d bloggers like this: