ເຈົ້າເມືອງໄຊເຊດຖາ ຊີ້! ລາຍຮັບພາກການບໍລິການຂອງເມືອງພົ້ນເດັ່ນກວ່າຂະແໜງອື່ນ.

ທ່ານ ຖະໝອມ ທຳທອງ ເຈົ້າເມືອງໄຊເຊດຖາ ກ່າວກ່ອນໜ້ານີ້ວ່າ: ໃນປີ 2017 ເສດຖະກິດເມືອງໄຊເຊດຖາຂະຫຍາຍຕົວໂດຍໄວໃນລະດັບ 4.000 ໂດລາຕໍ່ຄົນຕໍ່ປີ ລາຍຮັບເຂົ້າງົບປະມານ 51 ຕື້ກວ່າກີບ ຫາກທຽບກັບ 9 ຕົວເມືອງໃນນະຄອນຫຼວງເຫັນວ່າມີຄວາມໂດດເດັ່ນພໍສົມຄວນລາຍຮັບທີ່ເຫັນໄດ້ຊັດເຈນພາກການບໍລິການເພີ່ມຂຶ້ນ 0,9% ກວມເອົາ 51,1% ຂອງ GDP, ອຸດສາຫະກໍາກໍ່ສ້າງເພີ່ມຂຶ້ນ 0,6% ກວມເອົາ 36,9% ຂອງ GDP ສ່ວນກະສິກໍາ-ປ່າໄມ້ຫຼຸດລົງ 1,5% ກວມເອົາ 12% ຂອງ GDP.

ສ່ວນສາເຫດການຫຼຸດລົງຂອງຂະແໜງກະສິກໍາ-ປ່າໄມ້ແມ່ນມາຈາກການເພີ່ມຂຶ້ນຂອງການກໍ່ສ້າງໃນການພັດທະນາຫຼາຍໂຄງ ການຂອງລັດຖະບານ ແລະ ຂອງເມືອງໄຊເຊດຖາທີ່ເປັນທ່າແຮງໂຄງສ້າງພື້ນຖານຂອງເສດຖະກິດກໍ່ຄືການສ້າງວຽກເຮັດງານທຳ ໃຫ້ກັບປະຊາຊົນເພາະເມືອງໄຊເຊດຖາເຖິງວ່າຈະມີຕົວເລກລາຍຮັບທາງດ້ານເສດຖະກິດສູງກໍ່ຕາມ ແຕ່ກໍ່ຍັງມີເຖິງ 31 ບ້ານທີ່ຍັງນອນຢູ່ໃນເຂດນອກເມືອງຈາກທີ່ມີທັງໝົດ 48 ບ້ານ.

ເຖິງວ່າເສດຖະກິດຂອງເມືອງໄຊເຊດຖາ ຈະຂະຫຍາຍຕົວໄວຖ້າທຽບໃສ່ 4-5 ປີຫຼັງ ແຕ່ກໍ່ພົບກັບບັນຫາລົດຕິດ, ຂີ້ຝຸ່ນຕາມເສັ້ນທາງບາງແຫ່ງຈາກລົດແກ່ດິນຕາມບາງເສັ້ນທາງສາຍຫຼັກ ເຊິ່ງທາງ ເມືອງຈະໄດ້ຫາລືກັບຫຼາຍພາກສ່ວນທີ່ກ່ຽວຂ້ອງເພື່ອແກ້ໄຂບັນຫາດັ່ງກ່າວ. ນອກຈາກນີ້ກໍ່ຍັງມີການຈອດລົດທີ່ບໍ່ເປັນລະບຽບຂອງຜູ້ຂັບຂີ່ ທີ່ຈະຕ້ອງໄດ້ເອົາໃຈໃສ່ເພື່ອຄວາມເປັນລະບຽບ ແລະ ເປັນເຈົ້າພາບທີ່ດີໃນປີທ່ອງທ່ຽວລາວ 2018 ທີ່ຄາດວ່າຈະມີນັກທ່ອງທ່ຽວເຂົ້າມາ ສປປ ລາວ ສູງເຖິງ 5,2 ລ້ານຄົນ.

ສຳລັບໂຄງການໃຫຍ່ຂອງລັດຖະບານທີ່ນອນໃນເມືອງໄຊເຊດຖາທີ່ກຳລັງມີການກໍ່ສ້າງຄາດວ່າຈະສຳເລັດໃນອີກບໍ່ພໍເທົ່າໃດປີຂ້າງໜ້າເຊັ່ນ: ເຂດພັດທະນາກວມລວມໄຊເຊດຖາ, ເຂດເສດຖະກິດສະ ເພາະບຶງທາດຫຼວງ, ມະຫາວິທະຍາໄລຊູໂຈ ແລະ ມະຫາວິທະໄລວິທະຍາສາດສຸຂະພາບ ຫາກສຳເລັດຕາມກຳນົດຈະຊ່ວຍເຮັດໃຫ້ຂອດບໍລິການ ແລະ ການລົງທຶນຈາກນັກລົງທຶນທັງພາຍໃນ ແລະ ຕ່າງປະເທດເພີ່ມຂຶ້ນຢ່າງແນ່ນອນ.

%d bloggers like this: