ເຈົ້າຄອງ ເນັ້ນໃຫ້ເມືອງນາຊາຍທອງ ເລັ່ງແກ້ໄຂບັນຫາຂາຍເຄື່ອງກວມເອົາແຄມທາງຫຼວງ.

ໃນວັນທີ 5 ກຸມພາ 2018 ຜ່ານມາ ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ໄດ້ລົງເຄື່ອນໄຫວພົບປະຢ້ຽມຢາມ, ຕິດຕາມ ແລະ ຊຸກຍູ້ວຽກງານຢູ່ເມືອງນາຊາຍທອງ ໂດຍການຕ້ອນຮັບຢ່າງອົບອຸ່ນຂອງທ່ານ ວິລະສັກ ນາມມຸນຕີ ເຈົ້າເມືອງນາຊາຍທອງ, ມີບັນດາຫົວໜ້າຫ້ອງການແລະ ພາກສ່ວນທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ ທີ່ສໍານັກງານປົກຄອງເມືອງນາຊາຍທອງ.

ທ່ານ ບຸນເຮືອງ ແສງພົມມະຈັນ ຫົວໜ້າຫ້ອງການໂຍທາທິການ ແລະ ຂົນສົ່ງເມືອງ ກໍໄດ້ຂຶ້ນລາຍງານກ່ຽວກັບວຽກງານຈັດສັນຄວາມບໍ່ເປັນລະບຽບຮຽບຮ້ອຍໃນຕົວເມືອງ-ຊານເມືອງວ່າ: ວຽກງານຈັດສັນຄວາມບໍ່ເປັນລະບຽບຮຽບຮ້ອຍຕາມຕົວເມືອງ ແລະ ຊານເມືອງ ຕາມເສັ້ນທາງສາຍຫຼັກກໍເປັນວຽກໜຶ່ງທີ່ປິ່ນອ້ອມ, ສ່ວນເມືອງນາຊາຍທອງ ກໍໄດ້ສຳຫຼວດເກັບກຳຂໍ້ມູນເທີບ, ເງີບ, ການຂາຍເຄື່ອງຊະຊາຍ, ການຖົມດິນ, ຕິດຕັ້ງປ້າຍໂຄສະນາ ແລະ ອື່ນໆຕາມເສັ້ນທາງ 13 ເໜືອ ເຊິ່ງເລີ່ມແຕ່ວັນທີ 15 ມັງກອນ 2018 ເປັນຕົ້ນມາ.

ຜ່ານການຈັດຕັ້ງປະຕິບັດຜ່ານມາ ເລີ່ມແຕ່ບ້ານໄຊມຸງຄຸນ ຮ້ານຂາຍເຂົ້າຈີ່ບ້ານສີເກີດ, ບ້ານຜາງແຫ້ງ, ບ້ານນາຊາຍ, ບ້ານຫົວຊ້າງ, ຕະຫຼາດສົງເປືອຍ, ຕະຫຼາດນາງ່າ, ຕະຫຼາດບ້ານຫ້ວຍນໍ້າເຢັນ ແລະ ຈຸດວາງຂາຍມີດ-ພ້າ ຕ່າງໆ. ໃນນັ້ນ ໄດ້ມ້າງປ້າຍນ້ອຍ, ປ້າຍຕິດຕາມຕົ້ນໄມ້, ຕິດຕາມເສົາໄຟ, ປ້າຍໂຄສະນາຂາຍດິນໄດ້ທັງໝົດ 84 ບ້ານ, ຍ້າຍຕັ່ງໂຕະຂາຍເຄື່ອງໄດ້ 34 ໜ່ວຍ, ຮ້ານຂາຍມີດພ້າໄດ້ 10 ຮ້ານ ໃຫ້ຍັບຍ້າຍເຂົ້າໄປຂາຍໃນຕະຫຼາດ, ມ້າງເທີບເງີບໄດ້ 5 ຈຸດ ທີ່ຕໍ່ເທີບກວມເຂດສະຫງວນ, ເຮັດບົດບັນທຶກສຶກສາອົບຮົມກ່າວເຕືອນໄດ້ 75 ຮ້ານ. ນອກຈາກຍົກຍ້າຍສິ່ງກີດຂວາງແລ້ວ ຍັງໄດ້ເຮັດປ້າຍຫ້າມຂາຍເຄື່ອງ, ຫ້າມຈອດລົດຕາມຕະຫຼາດ, ພິເສດການເກັບມ້ຽນຂີ້ເຫຍື້ອທົ່ວເມືອງນາຊາຍທອງໄດ້ມອບໃຫ້ ຄບຕ ນະຄອນຫຼວງຮັບຜິດຊອບ ແລະ ການບູລະນະຮັກສາເສັ້ນທາງຫຼວງແຫ່ງຊາດ 13 ເໜືອ ດ້ວຍແຮງປະຊາຊົນ.

ໃນໂອກາດດຽວກັນ, ທ່ານ ປອ. ສິນລະວົງ ຄຸດໄພທູນ ກໍໄດ້ກ່າວວ່າ: ຕ້ອງເອົາໃຈໃສ່ແກ້ໄຂເຂັ້ມງວດຕື່ມອີກ ໂດຍສະເພາະແມ່ນແຄມເສັ້ນທາງເລກທີ 13 ເໜືອ ທີ່ເຫັນວ່າຍັງບໍ່ທັນເປັນລະບຽບ ເພາະເບິ່ງຕາມຕົວຈິງແລ້ວເສັ້ນທາງດັ່ງກ່າວນັ້ນ ຍັງບໍ່ທັນໄດ້ຮັບການແກ້ໄຂໄດ້ດີເທື່ອ, ຍັງມີຫຼາຍຈຸດບໍ່ທັນເປັນໄປຕາມມະຕິຂອງສະພານະຄອນຫຼວງ, ການຈັດສັນຍັງບໍ່ທັນໄດ້ດີ ເປັນຕົ້ນແມ່ນຕູບ, ເງີບ ທີ່ຕັ້ງຢັ່ງຢາຍຢູ່ແຄມທາງ ໃຫ້ພາກສ່ວນກ່ຽວຂ້ອງລົງຕິດຕາມເອົາອອກ ເພື່ອຄວາມເປັນລະບຽບ; ການຈັດສັນຮ້ານຄ້າ, ວັດສະດຸກໍ່ສ້າງທີ່ລົ້ນອອກມາແຄມທາງ ໃຫ້ປະຕິບັດຕາມກົດໝາຍທາງຫຼວງ ເພື່ອຈັດສັນໃຫ້ເປັນລະບຽບ; ສ່ວນການຖິ້ມຂີ້ເຫຍື້ອຊະຊາຍໂດຍສະເພາະຕາມແຄມທາງ ຕ້ອງແກ້ໄຂຢ່າງຮີບດ່ວນ ແລະ ຕ້ອງຮັກສາຄວາມປອດໄພ ແລະ ຄວາມເປັນລະບຽບຮຽບຮ້ອຍ.

%d bloggers like this: