ເຈົ້າຂອງຄິວລົດໂດຍສານສາຍໃຕ້ ແລະ ສາຍເໜືອ ຢືນຢັນປີໃໝ່ຈະບໍ່ມີການຂຶ້ນຄ່າໂດຍສານ

ສະຖານີຂົນສົ່ງໂດຍສານສາຍໃຕ້ ແລະ ເໜືອ ນະຄອນຫຼວງວຽງຈັນ ໄດ້ເລັ່ງກະກຽມຄວາມພ້ອມໃນການສະໜອງລົດໃຫ້ພຽງພໍ ລວມເຖິງກວດກາເຕັກນິກລົດ ເພື່ອຮັບປະກັນຄວາມປອດໄພສູງສຸດ ສ່ວນລາຄາໝັ້ນໃຈບໍ່ມີການປັບຂຶ້ນ.

ທ່ານ ວັນເພັນ ສີສຸກ ຜູ້ອຳນວຍການສະຖານີຂົນສົ່ງໂດຍສານສາຍໃຕ້ ໃຫ້ສຳພາດວ່າ: ພວກເຮົາໄດ້ກະກຽມເພີ່ມລົດຈາກວັນປົກກະຕິ 30 ຄັນ/ວັນ ເປັນ 60 ກວ່າຄັນ/ວັນ ເພື່ອອຳນວຍຄວາມສະດວກ ແລະ ໃຫ້ມີຄວາມພຽງພໍຕໍ່ການເດີນທາງຂອງພໍ່ແມ່ປະຊາຊົນໃນໄລຍະບຸນປີໃໝ່ລາວ ພ.ສ 2561 ໂດຍມີ 9 ບໍລິສັດ ທີ່ໃຫ້ບໍລິການ ໂດຍຄາດວ່າຈະມີຜູ້ໂດຍສານມາໃຊ້ບໍລິການບໍ່ຕ່ຳກວ່າ 14 ພັນຄົນ.

ດ້ານການຮັບປະກັນຄວາມປອດໄພໃຫ້ແກ່ຜູ້ໂດຍສານທາງສະຖານີພວກເຮົາ ໄດ້ຮ່ວມກັບພະແນກໂຍທາທິການ ແລະ ຂົນສົ່ງນະ ຄອນຫຼວງວຽງຈັນ ຈັດຄະນະກວດກາເຕັກນິກລົດໂດຍສານທຸກຄັນ ຖ້າຄັນໃດບໍ່ຜ່ານເຕັກນິກພວກເຮົາຈະບໍ່ໃຫ້ແລ່ນໂດຍສານເດັດຂາດ, ບັນດາລົດທີ່ເດີນທາງໄລຍະໄກຈະຕ້ອງມີໂຊເຟີ 2 ຄົນ, ລົດຈະຕ້ອງມີປະກັນໄພຄັກແນ່, ທ່ານ ວັນເພັນ ສີສຸກ ສີສຸກ ກ່າວ.

ສ່ວນດ້ານລາຄານັ້ນ ທ່ານ ວັນເພັນ ສີສຸກ ຢັ້ງຢືນວ່າຈະປະຕິບັດຕາມລາຄາເດີມ ແລະ ຈະບໍ່ມີການຂຶ້ນຄ່າໂດຍສານແຕ່ຢ່າງໃດ ເຊິ່ງຢູ່ສະຖານີຈະມີລົດຢູ່ 3 ປະເພດ ຄື: ລົດທຳມະດາ, ລົດດ່ວນ ແລະ ລົດ VIP ມີລາຄາຄ່າໂດຍສານທີ່ແຕກຕ່າງກັນ ດັ່ງນີ້:

  1. ລົດທຳມະດາ:

ວຽງຈັນ – ຫຼັກ 20 ລາຄາ 85.000 ກີບ;

ວຽງຈັນ – ນ້ຳທອນ 40.000 ກີບ;

ວຽງຈັນ – ທ່າແຂກ 60.000 ກີບ;

ວຽງຈັນ – ສະຫວັນ 75.000 ກີບ;

ວຽງຈັນ – ປາກເຊ 110.000 ກີບ;

ວຽງຈັນ – ອັດຕະປື 140.000 ກີບ.

2.ລົດດ່ວນ:

ວຽງຈັນ – ທ່າແຂກ 70.000 ກີບ;

ວຽງຈັນ – ສະຫວັນ 90.000 ກີບ,

ວຽງຈັນ – ປາກເຊ 140.000 ກີບ;

ວຽງຈັນ – ອັດຕະປື 170.000 ກີບ.

3.ລົດ VIP:

ວຽງຈັນ – ທ່າແຂກ 80.000 ກີບ;

ວຽງຈັນ – ສະຫວັນ 120.000 ກີບ;

ວຽງຈັນ – ປາກເຊ 170.000 ກີບ;

ວຽງຈັນ – ອັດຕະປື 220.000 ກີບ.

ພ້ອມນີ້, ຜູ້ອຳນວຍການສະຖານີຂົນສົ່ງໂດຍສານສາຍໃຕ້ ຍັງຮຽກຮ້ອງໃຫ້ບັນດາຜູ້ໂດຍສານທຸກທ່ານທີ່ຈະໃຊ້ບໍລິການໃຫ້ມາຂຶ້ນລົດທີ່ສະຖານີ, ບໍ່ຢາກໃຫ້ລັດຂຶ້ນຢູ່ຕາມທາງ ເພື່ອຫຼີກລຽງບໍ່ໃຫ້ເກີດບັນຫາເມື່ອຂຶ້ນລົດແລ້ວເຕັມ, ບໍ່ມີບ່ອນນັ່ງ ແລະ ຕ້ອງໄດ້ນັ່ງຕັ່ງເສີມ ຫຼື ໄດ້ຢືນເອົາ. ຖ້າມາຂຶ້ນທີ່ສະຖານີພວກເຮົາຈະຮັບປະກັນໃຫ້ທຸກຄົນຕ້ອງມີບ່ອນນັ່ງ, ລົດໂດຍສານຄັນໃດເຕັມແລ້ວ ຕ້ອງອອກທັນທີໂດຍບໍ່ຕ້ອງລໍຖ້າຮອດໂມງເວລາ.

ດ້ານ ທ່ານ ນາງ ຈິດປະສົງ ຫຼວງເດດມີໄຊ ຜູ້ອຳນວຍການສະຖານີຂົນສົ່ງໂດຍສານສາຍເໜືອ ກ່າວວ່າ: ສຳລັບສະຖານີຂົນສົ່ງໂດຍສານສາຍເໜືອແລ້ວ ກໍ່ໄດ້ມີການກຽມລົດໃຫ້ພຽງພໍກັບຈຳນວນຜູ້ໂດຍສານ ແລະ ຈະບໍ່ໃຫ້ມີຜູ້ໂດຍສານຕົກຄ້າງຢ່າງແນ່ ນອນ.

ສຳລັບໃນປີຜ່ານມາຜູ້ໂດຍສານຈະເດີນທາງຫຼາຍໃນລະຫວ່າງວັນທີ 12 ຫາ 14 ເມສາ ສະເລ່ຍປະມານ 800 ຫາ 1 ພັນຄົນຕໍ່ວັນ, ແຕ່ສຳລັບປີນີ້ແລ້ວຈາກການສັງເກດແຕ່ວັນທີ 1 ຫາ 5 ເມສາ 2018 ຜ່ານມານີ້ ຈຳນວນຜູ້ໂດຍສານທີ່ຊົມໃຊ້ບໍລິການຍັງມີລັກສະ ນະເປັນປົກກະຕິບໍ່ມີການເພີ່ມຂຶ້ນແຕ່ຢ່າງໃດ ສ່ວນການເພີ່ມລົດໂດຍສານຂົນສົ່ງໃນໄລຍະປີໃໝ່ລາວນີ້ ແນ່ນອນພວກເຮົາຈະຕ້ອງສະໜອງໃຫ້ມີຄວາມພຽງພໍ ແລະ ດ້ານລາຄາກໍ່ຢາກໃຫ້ທຸກທ່ານມີຄວາມເຂົ້າໃຈວ່າລົດມີຫຼາຍປະເພດ, ມີລາຄາທີ່ແຕກຕ່າງກັນ.

%d bloggers like this: