ຮ້ານອາຫານ ຈັດໜັກ ບຸບເຟ່ທະເລສົດ

ໃນຂອບເຂດຕົວເມືອງໃຫຍ່ໃນປັດຈຸບັນເຫັນວ່າຜູ້ປະກອບການດ້ານຮ້ານອາຫານກຳລັງມີການແຂ່ງຂັນກັນສູງ ໂດຍສະເພາະຮ້ານອາຫານແບບບຸບເຟ່ທີ່ເຫັນໄດ້ເຖິງການເຕີບໂຕຫຼາຍໃນເຂດຊຸມຊົນ ເຊິ່ງເປັນຜົນດີຕໍ່ກັບລູກຄ້າມີຫຼາຍທາງເລືອກໃນການບໍລິໂພກ. ຂະນະດຽວກັນກໍ່ສ້າງຄວາມທ້າທາຍໃຫ້ກັບຜູ້ປະກອບການໃນການເພີ່ມມາດຕະຖານ ແລະ ຄຸນນະພາບເພື່ອດຶງກຸ່ມລູກຄ້າໃຫ້ໄດ້ຫຼາຍທີ່ສຸດ ໂດຍເປົ້າໝາຍກໍ່ເພື່ອຕອບໂຈດລູກຄ້າທີ່ຕ້ອງການຄວາມວ່ອງໄວ ແລະ ຢາກສະດວກສະບາຍໃນການຮັບປະທານອາຫານ.
ຮ້ານອາຫານ ຈັດໜັກ ບຸບເຟ່ທະເລສົດ ເປັນອີກໜຶ່ງຮ້ານທີ່ຫາກໍ່ເປີດໃຫ້ບໍລິການອາຫານແບບບຸບເຟ່ ໂດຍເນັ້ນອາຫານທະເລຫຼາຍຢ່າງ ແລະ ສົດໃໝ່ພ້ອມທັງອາຫານປຸງແຕ່ງແບບສຳເລັດຮູບ ໂດຍມີຈຸດເລີ່ມຕົ້ນເກີດຈາກເຈົ້າຂອງກິດຈະການເຫັນວ່າປັດຈຸບັນຮ້ານອາຫານແບບບຸບເຟ່ມີຈຳນວນຫຼາຍ ແຕ່ຍັງບໍ່ສາມາດຕອບໂຈດໃຫ້ກັບລູກຄ້າ ຈຶ່ງມີຄວາມຄິດໃນການເປີດໃຫ້ບໍລິການຫວັງທີ່ຈະຕອບໂຈດຄວາມຕ້ອງການລູກຄ້າໄດ້ຫຼາຍທີ່ສຸດ.

ທ່ານ ພົນພຣະຈັນ ສີສະວົງສ໌

ທ່ານ ພົນພຣະຈັນ ສີສະວົງສ໌ ເຈົ້າຂອງຮ້ານອາຫານ ຈັດໜັກ ບຸບເຟ່ ອາຫານທະເລສົດ ໄດ້ໃຫ້ສຳພາດວ່າ: ເຮົາເຫັນວ່າຮ້ານອາຫານແບບບຸບເຟ່ຍັງບໍ່ສາມາດຕອບໂຈດໃຫ້ກັບລູກຄ້າໄດ້ດີເທົ່າທີ່ຄວນ ເຮັດໃຫ້ລູກຄ້ານິຍົມກັນອອກໄປໃຊ້ບໍລິການຢູ່ປະເທດເພື່ອນບ້ານ ທັງໆທີ່ຄ່າບໍລິການກໍ່ແພງກວ່າ ແລະ ຍັງຕ້ອງມີຄ່າໃຊ້ຈ່າຍທາງດ້ານການເດີນທາງນຳອີກ. ດັ່ງນັ້ນ, ພວກເຮົາຈຶ່ງຕ້ອງການພັດທະນາມາດຕະຖານຮ້ານອາຫານປະເພດນີ້ໃຫ້ສູງຂຶ້ນ ສິ່ງສຳຄັນທີ່ສຸດທີ່ລູກຄ້າຕ້ອງການກໍ່ແມ່ນຄວາມແຊບ, ສົດ, ສະອາດ ແລະ ຄວາມຫຼາກຫຼາຍຂອງອາຫານ ຄຽງຄູ່ກັບການບໍລິການທີ່ປະທັບໃຈ ແລະ ຄວາມບັນເທີງທີ່ລູກຄ້າຈະໄດ້ຫຼາຍກວ່າຮ້ານອື່ນ ເຊິ່ງທັງໝົດນີ້ມີຄົບໃນຮ້ານອາຫານຂອງພວກເຮົາ.

ສຳລັບປະເພດອາຫານແມ່ນເນັ້ນໃນຮູບແບບຂອງການປີ້ງ ແລະ ເປັນແບບໝໍ້ຈຸ່ມ ໂດຍມີປະເພດອາຫານທະເລ ເຊັ່ນ: ປາແຊລມ້ອນ, ຫອຍເຊລ, ປູມ້າ, ກຸ້ງສົດ, ປາມຶກ ແລະ ລາຍການອື່ນໆ ໃຫ້ເລືອກລວມຫຼາຍສິບຢ່າງ ເຊິ່ງມີມາໃຫ້ບໍລິການແບບບໍ່ຈຳກັດລູກຄ້າເຂົ້າມາຈະບໍ່ຜິດຫວັງວ່າອາຫານປະເພດນີ້ຈະໝົດກ່ອນ. ນອກຈາກນັ້ນ, ຍັງມີອາຫານແບບປຸງແຕ່ງສຳເລັດທີ່ເປັນລາຍການອາຫານແຕກຕ່າງຈາກຮ້ານອື່ນ ແລະ ຍັງມີກະແລັມໂປະລາວເດີມ ທີ່ເປັນສູດຕົ້ນແບບໄວ້ຄອຍບໍລິການເປັນຂອງຫວານແບບບໍ່ອັ້ນ.
ສ່ວນດ້ານການບໍລິການປັດຈຸບັນ ທາງຮ້ານມີໂຕະທັງໝົດ 140 ໂຕະ ສາມາດຮອງຮັບລູກຄ້າໄດ້ຫຼາຍເຖິງ 400 ທ່ານ ພ້ອມທັງມີພະນັກງານ 10 ກວ່າຄົນ ສ່ວນສະຖານທີ່ຈອດລົດກໍ່ກວ້າງ ຂວາງໄວ້ຮອງຮັບ. ທີ່ສຳຄັນສຸດແມ່ນການບໍລິການຈາກພະນັກງານທີ່ເນັ້ນໜັກເຖິງຄວາມພໍໃຈ ແລະ ຄວາມຮູ້ສຶກເປັນກັນເອງ ບໍລິການດ້ວຍໃບໜ້າທີ່ຍິ້ມແຍ້ມ ແລະ ດ້ວຍຄວາມສຸພາບ ເພື່ອເຮັດໃຫ້ລູກຄ້າມີຄວາມປະທັບໃຈ.
ທ່ານໃຫ້ຮູ້ອີກວ່າ: ຮ້ານເປີດໃຫ້ບໍລິການທຸກໆມື້ ເລີ່ມແຕ່ເວລາ 17:00 ໂມງ ໄປຈົນເຖິງ 22:00 ໂມງ ໃນລາຄາທ່ານລະ 79 ພັນກີບ, ເດັກນ້ອຍ 39 ພັນ ຫາ 59 ພັນກີບຕໍ່ຄົນ ໂດຍການຕອບຮັບຈາກລູກຄ້າໃນໄລຍະທີ່ເປີດຮ້ານຜ່ານມາຖືວ່າດີເກີນທີ່ໄດ້ຕັ້ງເປົ້າໄວ້ ແລະ ລູກຄ້າສ່ວນໃຫຍ່ກໍ່ມີຄວາມພໍໃຈພ້ອມທັງເຫັນວ່າກຸ້ມຄ່າກັບການລົງທຶນ ແຕ່ເຖິງຢ່າງໃດທາງຮ້ານກໍ່ຍັງນຳເອົາຄຳຕິຊົມທີ່ລູກຄ້າແນະນຳມາປັບປຸງ ແລະ ແກ້ໄຂຢູ່ຕະຫຼອດເວລາເພື່ອໃຫ້ລູກຄ້າມີຄວາມພໍໃຈທີ່ສຸດ.

ຮ້ານອາຫານ ຈັດໜັກ ບຸບເຟ່ທະເລສົດ ແມ່ນການບໍລິການບຸບເຟ່ແບບຄົບວົງຈອນ ແລະ ທີ່ສຳຄັນແມ່ນມີຮູບແບບການບໍລິການທີ່ແຕກຕ່າງຈາກຮ້ານອື່ນ ຈຶ່ງຢາກໃຫ້ທຸກທ່ານລອງເຂົ້າມາສຳຜັດເບິ່ງ ແລ້ວທ່ານຈະບໍ່ຜິດຫວັງ, ທ່ານ ພົນພຣະຈັນ ສີສະວົງສ໌ ກ່າວ.
ຮ້ານອາຫານ ຈັດໜັກ ບຸບເຟ່ທະເລສົດ ຕັ້ງຢູ່ບ້ານໂພນປ່າເປົ້າ ເມືອງສີສັດຕະນາກ ນະຄອນຫຼວງວຽງຈັນ ຫຼື ສາມາດເຂົ້າເບິ່ງການອັບເດດລາຍການອາຫານໄດ້ທີ່ ເຟສບຸ໊ກ: ຈັດໜັກບຸບເຟ່ທະເລສົດ.

 

%d bloggers like this: