ສະຕາບັກ ບືນເຮັດວຽກແຫ່ງທີ 3 ເປັນຫຍັງຕ້ອງວ່າແນວນັ້ນ ບົດນີ້ມີຄໍາຕອບ

ໃນປີ 1971 ຮ້ານກາເຟ Starbucks ໄດ້ຖືກກໍ່ຕັ້ງຂຶ້ນທີ່ເມືອງ seattle ລັດ Washington ປະເທດສະຫະລັດອາເມຣິກາ ເຊິ່ງໃນເວລານັ້ນບໍ່ມີໃຜຈະຄິດວ່າຮ້ານກາເຟນີ້ຈະມີສາຂາຫຼາຍເຖິງ 16.858 ຮ້ານ ຢູ່ 50 ປະເທດໃນທົ່ວໂລກ ໃນປີ 2011 ເນື່ອງຈາກອັດຕາການເຕີບໃຫຍ່ຂະຫຍາຍຕົວສູງຂອງຮ້ານກາເຟ Starbucks ຈຶ່ງສົ່ງຜົນດີໃຫ້ແກ່ອຸດສາຫະກຳການຜະລິດກາເຟຂອງໂລກໃຫ້ຂະຫຍາຍຕົວສູງຂຶ້ນໄປນຳ ເຊິ່ງທັງໝົດນີ້ແມ່ນບໍ່ໄດ້ເກີດຂຶ້ນໂດຍບັງເອີນ ແຕ່ຫາກເກີດຂຶ້ນມາຈາກການວາງແຜນຂອງ ທ່ານ Howard Schultz ທີ່ເປັນຜູ້ອຳນວຍການຝ່າຍການຕະຫຼາດຂອງຮ້ານກາເຟ Starbucks ໃນເວລານັ້ນ.

ເມື່ອ ທ່ານ Howard Schultz ໄດ້ເດີນທາງໄປປະເທດອິຕາລີ ໃນປີ 1982 ເພື່ອເຂົ້າຮ່ວມງານວາງສະແດງ International Show ແລະ ຈາກນັ້ນກໍ່ຖືໂອກາດເຂົ້າໄປຮ້ານ Verona ຂາຍກາເຟ Espresso ທີ່ມີຊື່ສຽງຮ້ານໜຶ່ງຢູ່ທີ່ເມືອງ Milan ທ່ານໄດ້ຮັບຄວາມປະທັບໃຈກັບບັນຍາກາດ ແລະ ການບໍລິການຂອງຮ້ານຫຼາຍເປັນພິເສດ ເພາະວ່າໂດຍທົ່ວໄປແລ້ວບັນດາຮ້ານຂາຍອາຫານ ແລະ ເຄື່ອງດື່ມທັງຫຼາຍມັກໄລ່ລູກຄ້າອອກຈາກຮ້ານ ເມື່ອເຫັນວ່າລູກຄ້າເຫຼົ່ານັ້ນໄດ້ຮັບປະທານອາຫານໝົດແລ້ວເພື່ອຈະໄດ້ມີໂຕະວ່າງສຳລັບລູກຄ້າໃໝ່ທີ່ຈະເຂົ້າມາໃຊ້ບໍລິການ ເຊິ່ງກົງກັນຂ້າມກັບຮ້ານຂາຍກາເຟ Verona ທີ່ຢູ່ເມືອງ Milan ທີ່ຈະປ່ອຍໃຫ້ລູກຄ້າໄດ້ນັ່ງພັກຜ່ອນຮັບຊົມບັນຍາກາດພາຍໃນຮ້ານຕາມຄວາມຕ້ອງການ ເຖິງວ່າຈະດື່ມກາເຟພຽງຈອກດຽວກໍ່ຕາມ.

ຫຼັງຈາກທີ່ ທ່ານ Howerd Schultz ໄດ້ຮັບແຮງບັນດານໃຈມາຈາກຮ້ານ Verona ແລ້ວທ່ານຈຶ່ງໄດ້ປັບປຸງຮ້ານກາເຟ Starbucks ໃຫ້ມີການບໍລິການ ແລະ ບັນຍາກາດຄ້າຍຄືກັບຮ້ານ Verona ໂດຍວາງວິໄສທັດໃຫ້ຮ້ານກາເຟ Starbucks ເປັນສະຖານທີ່ພັກຜ່ອນ ແລະ ພົບປະສັງສັນບ່ອນທີສາມ “ Third Place ” ໃນຊີວິດປະຈໍາວັນຂອງຄົນເຮົາຫຼັງຈາກບ່ອນທີ່ໜຶ່ງ Third Place ຄືເຮືອນ ແລະ ບ່ອນທີສອງ “ Second Place ” ຄືຫ້ອງການ ແລະ ບ່ອນເຮັດວຽກ. ພ້ອມທັງເນັ້ນການຂາຍໃຫ້ມີບັນຍາກາດແຫ່ງການພັກຜ່ອນເພື່ອດຶງດູດລູກຄ້າເປັນຫຼັກ ສ່ວນກາເຟ ຫຼື ອາຫານວ່າງເປັນພຽງສ່ວນປະກອບໝາຍຄວາມວ່າຮ້ານກາເຟ Starbucks ຄືສະຖານທີ່ພັກຜ່ອນກ່ອນລູກຄ້າຈະກັບເຮືອນ ຫຼັງຈາກທີ່ເຮັດວຽກໜັກມາໝົດມື້ລູກຄ້າຈະໄດ້ຜ່ອນຄາຍອາລົມຈາກສຽງເພງທີ່ອ່ອນຊອນ ແລະ ກິ່ນຫອມຂອງກາເຟ Arabica ຢູ່ໃນຮ້ານ.

ສ່ວນ ສປປ ລາວ ຍັງບໍ່ທັນມີຮ້ານກາເຟແບບ Starbucks ເທື່ອ, ແຕ່ມີຮ້ານກາເຟສົດ ( True Coffee ) ທີ່ຫາກໍ່ມາຕັ້ງສາຂາໃໝ່ໃກ້ກັບນ້ຳພຸ ແລະ ເຂດບໍລິເວນກະຊວງການຕ່າງປະເທດ ນະຄອນຫຼວງວຽງຈັນ ສ່ວນຈຸດຂາຍຂອງ True Coffee ແມ່ນສ້າງຄວາມແຕກຕ່າງ ໂດຍມີການໃຫ້ບໍລິການອິນເຕີເນັດແບບ Wireless ພາຍໃນຮ້ານເພື່ອດຶງດູດກຸ່ມເປົ້າໝາຍທີ່ເປັນຄົນໜຸ່ມສາວ.

ຢ່າງໃດກໍ່ຕາມ, ພາຍຫຼັງການໂຮມຕົວກັນເຂົ້າເປັນປະຊາຄົມເສດຖະກິດອາຊຽນຂອງບັນດາ 10 ປະເທດພາກພື້ນໃນປີ 2015 ຄາດວ່າຈະມີຮ້ານກາເຟຫຼາຍຮ້ານ, ຫຼາຍຍີ່ຫໍ້ທີ່ຈະເລືອກເອົາ ສປປ ລາວ ເປັນຈຸດທີ່ຕັ້ງຂອງການຂະຫຍາຍສາຂາ ເຊັ່ນດຽວກັບກາເຟ ສີໜຸກ, ກາເຟດາວເຮືອງ ທີ່ມີຜະລິດຕະພັນເປັນຂອງຕົນເອງທີ່ສາມາດສົ່ງອອກສິນຄ້າໄປໃນຫຼາຍປະເທດຂອງໂລກ ອາດຈະມີການຄິດກົນລະຍຸດໃນການຂາຍຍຸກໃໝ່ທີ່ທັນສະໄໝກວ່າເດີມກໍ່ເປັນໄດ້.

%d bloggers like this: