ລູກຄ້າມີເຮ! ລາວໂທລະຄົມ ຊົດເຊີຍໃຫ້ລູກຄ້ານໍາໃຊ້ເນັດ-ໂທຟຣີ ເສົາ-ອາທິດນີ້

ຈາກເຫດຂັດຂ້ອງທາງດ້ານເຕັກນິກ ເຮັດໃຫ້ມີຜົນກະທົບຕໍ່ການນໍາໃຊ້ງານຂອງບໍລິການ ໂທລະສັບມືຖື, ໂທລະສັບຕັ້ງໂຕະ ແລະ ໂທລະສັບວິນໂຟນ ໃນຂອບເຂດທົ່ວປະເທດ ເຊິ່ງໄດ້ສົ່ງຜົນໃຫ້ລູກຄ້າບໍ່ສາມາດນໍາໃຊ້ບໍລິການຕ່າງໆຂອງເຄືອຂ່າຍ ລາວໂທລະຄົມ ໄດ້ ນັບແຕ່ເວລາ 11:00-14:15 ໂມງ ຂອງວັນທີ 21 ສິງຫາ 2017 ທີ່ຜ່ານມາ.
ຈາກເຫດການດັ່ງກ່າວ, ຫຼ້າສຸດ ທ່ານ ຈິດປະສົງ ໜູແກ້ວໄກສອນ ຮອງຜູ້ອໍານວຍການໃຫຍ່ ບໍລິສັດ ລັດວິສາຫະກິດ ລາວ ໂທລະຄົມມະນາຄົມ ໄດ້ອອກມາຊີ້ແຈງ ແລະ ໃຫ້ສໍາພາດກັບນັກຂ່າວໜັງສືພີມເສດຖະກິດ-ການຄ້າ ໃນວັນທີ 23 ສິງຫາ 2017 ຜ່ານມານີ້ວ່າ: ຂ້າພະເຈົ້າຕາງໜ້າໃຫ້ ລາວ ໂທລະຄົມ ຂໍສະແດງຄວາມເສຍໃຈມາຍັງລູກຄ້າທຸກໆທ່ານ ຕໍ່ກັບເຫດຂັດຂ້ອງທາງດ້ານເຕັກນິກແບບກະທັນຫັນເຊິ່ງໄດ້ເຮັດໃຫ້ມີຜົນກະທົບຕໍ່ການນໍາໃຊ້ບໍລິການ ໂທລະສັບມືຖື, ໂທລະສັບຕັ້ງໂຕະ ແລະ ໂທລະສັບ ວິນໂຟນ ຂອງ ລາວ ໂທລະຄົມ ໃນຂອບເຂດທົ່ວປະເທດ ນັບແຕ່ເວລາ 11:04-14:15 ໂມງຂອງວັນທີ 21 ສິງຫາ 2017 ທີ່ຜ່ານມາ, ເຊິ່ງສາເຫດແມ່ນເກີດຈາກ ລະບົບສາຍສົ່ງທີ່ເຊື່ອມຕໍ່ກັບລະບົບສູນກາງໂທລະສັບ ມືຖື ແລະ ສູນກາງໂທລະສັບຕັ້ງໂຕະ, ອິນເຕີເນັດ ເກີດການຂັດຂ້ອງ ເຊິ່ງເປັນເຫດການທີ່ສຸດວິໄສ ທີ ລາວ ໂທລະຄົມ ເອງກໍ່ບໍ່ປາຖະໜາຢາກຈະໃຫ້ມັນເກີດຂື້ນ, ພາຍຫຼັງເກີດເຫດການດັ່ງກ່າວ ວິຊາການຂອງ ລາວ ໂທລະຄົມ ແລະ ຊ່ຽວຊານຕ່າງປະເທດໄດ້ຮ່ວມກັນແກ້ໄຂບັນຫາດ້ວຍຄວາມຮັບຜິດຊອບສູງຈຶ່ງເຮັດໃຫ້ລະບົບກັບມາໃຊ້ງານໄດ້ເປັນປົກກະຕິໃນເວລາຕໍ່ມາ.
ທ່ານກ່າວຕື່ມວ່າ: ເຫດການດັ່ງກ່າວ ຖືວ່າເປັນເຫດການທີ່ເກີດຂຶ້ນໃນຮອບ 20 ປີ ທີ່ເຮັດໃຫ້ການສື່ສານຖືກຕັດຂາດເປັນເວລາ 3 ຊົ່ວໂມງ, ພວກເຮົາຈະນຳເອົາບົດຮຽນຈາກເຫດການໃນຄັ້ງນີ້ນຳໄປປັບປຸງ, ແລະ ປ້ອງບໍ່ໃຫ້ບັນຫາດັ່ງກ່າວເກີດຂື້ນອີກ ເພື່ອເປັນການສະແດງຄວາມຮັບຜິດຊອບຕໍ່ຜູ້ຊົມໃຊ້ ລາວ ໂທລະຄົມ ຂໍມອບສິດທິພິເສດໃຫ້ກັບລູກຄ້າທຸກໆທ່ານຄື:
1) ຊົດເຊີຍໃຫ້ ໂທລ້າ 30 ນາທີ ແລະ ນໍາໃຊ້ Data ລ້າໆ 500MB ສໍາລັບ ບໍລິການ ໂທລະສັບມືຖື ເບີຕື່ມເງິນ, ເບີລາຍເດືອນ
2) ຊົດເຊີຍໃຫ້ ໂທລ້າໆ 30 ນາທີ ສໍາລັບບໍລິການ ເບີວິນໂຟນ ແລະ ໂທລະສັບຕັ້ງໂຕະ
3) ຊົດເຊີຍໃຫ້ນໍາໃຊ້ Data ລ້າໆ 500MB ສໍາລັບ ບໍລິການ Sim Net
4) ຊົດເຊີຍໃຫ້ນໍາໃຊ້ ລ້າໆ 2 ວັນ ສໍາລັບບໍລິການ ອິນເຕີເນັດ ADSL, ອິນເຕີເນັດ ໄຟເບີທູໂຮມ (FTTH) ແລະ ອິນເຕີເນັດ Leased Line.
ພາຍໃນໃນກໍານົດເວລາ 2 ວັນ ຄື: ວັນເສົາ-ອາທິດ ວັນທີ 26-27/08/2017 ນີ້. ລາວ ໂທລະຄົມ ເຂົ້າໃຈດີວ່າການຊົດເຊີຍໃນຄັ້ງນີ້ ອາດຈະທຽບບໍ່ໄດ້ກັບໂອກາດທີ່ລູກຄ້າເສຍໄປ ແຕ່ມັນກໍ່ເປັນນໍ້າຈິດນໍ້າໃຈ ທີ່ ລາວ ໂທລະຄົມ ຈິງໃຈມອບຄືນໃຫ້ກັບລູກຄ້າທຸກໆທ່ານ, ຂໍສະແດງຄວາມຮູ້ບຸນຄຸນແລະ ຂອບໃຈລູກຄ້າທຸກໆທ່ານເປັນຢ່າງສູງທີ່ໃຫ້ຄວາມເຊື່ອໝັ້ນໄວ້ວາງໃຈໃຊ້ບໍລິການຂອງ ລາວ ໂທລະຄົມ ມາໂດຍຕະຫຼອດ.

%d bloggers like this: