ລາວ - ໄທ ຮ່ວມກັນສົ່ງເສີມ ແລະ ສ້າງຄວາມເຂັ້ມແຂງທາງການເງິນຜ່ານຕະຫຼາດທຶນລາວ - Laoedaily

ລາວ – ໄທ ຮ່ວມກັນສົ່ງເສີມ ແລະ ສ້າງຄວາມເຂັ້ມແຂງທາງການເງິນຜ່ານຕະຫຼາດທຶນລາວ

ຕະຫຼາດຫຼັກຊັບລາວ ( ຕລຊລ ) ຮ່ວມກັບ ສະມາຄົມ ບໍລິສັດ ຫຼັກຊັບໄທ ຈັດງານສຳມະນາແລກປ່ຽນປະສົບການໃນການພັດທະນາຕະຫຼາດຫຼັກຊັບ ແລະ ການສົ່ງເສີມສະພາບຄ່ອງໃນຕະຫຼາດຫຼັກຊັບລາວຂຶ້ນ ເພື່ອເຜີຍແຜ່ປະສົບການຂອງຄະນະຜູ້ຊົງຄຸນວຸດທິຈາກສະມາຄົມ ບໍລິສັດ ຫຼັກຊັບໄທ ທີ່ກ່ຽວພັນກັບວຽກງານຂອງບໍລິສັດຈົດທະບຽນ ແລະ ບໍລິສັດຫຼັກຊັບ.

ງານສຳມະນາດັ່ງກ່າວໄດ້ມີຂຶ້ນໃນວັນທີ 31 ມັງກອນ 2019 ທີ່ຕະຫຼາດຫຼັກຊັບລາວ ນະຄອນຫຼວງວຽງຈັນ ໂດຍມີ ທ່ານ ວັນຄຳ ວໍຣະວົງ ຜູ້ອຳນວຍການໃຫຍ່ຕະຫຼາດຫຼັກຊັບລາວ, ທ່ານ ນາງ ພັດທີຣາ ດິລົກຣຸ່ງທີຣະພົບ ປະທານສະມາຄົມ ບໍລິສັດ ຫຼັກຊັບໄທ, ພ້ອມບັນດາທ່ານປະທານ, ຜູ້ອຳນວຍການບໍລິສັດຫຼັກຊັບຈາກປະເທດໄທ ແລະ ບັນດາສື່ມວນຊົນເຂົ້າຮ່ວມ.

ທ່ານ ວັນຄຳ ວໍຣະວົງ ກ່າວວ່າ: ຕະຫຼອດໄລຍະ 8 ປີທີ່ຜ່ານມາ ຕະຫຼາດຫຼັກຊັບລາວ ໄດ້ມີຜົນສຳເລັດຫຼາຍດ້ານ ເຊັ່ນ: ຕະຫຼາດຫຼັກຊັບລາວ ມີບົດບາດເປັນແຫຼ່ງທຶນຂະໜາດໃຫຍ່ໃຫ້ແກ່ນັກລົງທຶນທີ່ຕ້ອງການລະດົມທຶນ ແລະ ເປັນບ່ອນແລກປ່ຽນຊື້ – ຂາຍໃຫ້ແກ່ບັນດານັກລົງທຶນ ສາມາດສຳເລັດການນຳເອົາບໍລິສັດເຂົ້າມາຈົດທະບຽນໄດ້ທັງໝົດ 9 ບໍລິສັດ ແລະ ໄດ້ມີການສຳເລັດການນຳເອົາຜະລິດຕະພັນໃໝ່ຄື ພັນທະບັດລັດຖະບານ ເຂົ້າມາຈົດທະບຽນໃນ ຕລຊລ. ນອກນີ້, ນັບຕັ້ງແຕ່ຕົ້ນປີ 2019 ເປັນຕົ້ນມາ ທາງ ຕລຊລ ໄດ້ມີການຍົກລະດັບກົນໄກການຊື້ – ຂາຍຫຸ້ນໃນ ຕລຊລ ເປັນຕົ້ນ ການຂະຫຍາຍເວລາການແລກປ່ຽນຊື້ – ຂາຍຫຼັກຊັບ, ເພີ່ມປະເພດຄຳສັ່ງຊື້ – ຂາຍຫຸ້ນ, ການ ຊື້ – ຂາຍຫຸ້ນຈຳນວນຫຼາຍ ( Block Trade ), ປັບຫົວໜ່ວຍລາຄາໃໝ່ ( Tick Size ). ທັງນີ້, ກໍເພື່ອຮອງຮັບຄວາມຕ້ອງການອັນຫຼາກຫຼາຍ ແລະ ເພີ່ມເຄື່ອງມື, ເພີ່ມສີສັນໃໝ່ໆໃຫ້ແກ່ການຊື້ – ຂາຍຫຸ້ນໃນ ຕລຊລ.

ທ່ານ ນາງ ພັດທີຣາ ດິລົກຣຸ່ງທີຣະພົບ ກ່າວວ່າ: ໃນໄລຍະຜ່ານມານັກລົງທຶນຢູ່ໃນ ສປປ ລາວ ໄດ້ມີຄວາມໃສ່ໃຈໃນການລົງທຶນໃນຕະຫຼາດທຶນ ບວກກັບໃນຍຸກປັດຈຸບັນເຕັກໂນໂລຊີມີຄວາມທັນສະໄໝຂຶ້ນ ສາມາດເຮັດໃຫ້ທຸກຢ່າງພັດທະນາໄດ້ໄວ ແລະ ສະດວກຂຶ້ນ ຕະຫຼາດຫຼັກຊັບລາວໃນປັດຈຸບັນສາມາດທີ່ຈະພັດທະນາ ໂດຍໃຊ້ເຄື່ອງມືຕ່າງໆເຂົ້າມາຊ່ວຍ ເພື່ອສາມາດເຮັດໃຫ້ຕະຫຼາດຫຼັກຊັບເຕີບໂຕໄດ້ໄວຂຶ້ນ. ສຳລັບງານໃນຄັ້ງນີ້ແມ່ນຈະເນັ້ນການແລກປ່ຽນຖອດຖອນບົດຮຽນ ແລະ ປະສົບການຕົວຈິງແບບເຈາະເລິກ ເພື່ອນຳເອົາບົດຮຽນ ແລະ ປະສົບການດັ່ງກ່າວມາໝູນໃຊ້ສ້າງຄວາມເຂັ້ມແຂງໃນການພັດທະນາວຽກງານຕະຫຼາດຫຼັກຊັບຂອງ ສປປ ລາວ.

ຂ່າວ: ສົມລົດ; ຮູບ: ວິລະສັກ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ