ລາວເລັ່ງພັດທະນາພື້ນຖານໂຄງລ່າງ ຮອງຮັບດ້ານຄົມມະນາຄົມຍຸກເຊື່ອມໂຍງ

ເພື່ອຮັບປະກັນໃຫ້ວຽກງານພື້ນຖານໂຄງລ່າງຂອງ ສປປ ລາວ ນັບມື້ໄດ້ຮັບການພັດທະນາ ແລະ ປັບປຸງໃຫ້ດີຂຶ້ນ ກໍ່ຄືນະໂຍບາຍຫັນຈາກປະເທດທີ່ບໍ່ມີຊາຍແດນຕິດກັບທະເລ ໃຫ້ກາຍເປັນປະເທດບໍລິການທາງຜ່ານ ເພື່ອເຊື່ອມຈອດກັບພາກພື້ນ ແລະ ສາກົນ, ລັດຖະບານຈຶ່ງໄດ້ສຸມໃສ່ພົວພັນຮ່ວມມືກັບບັນດາປະເທດຄູ່ຮ່ວມ ເພື່ອດຶງດູດເອົາການລົງທຶນຈາກເອກະຊົນຕ່າງປະເທດມາລົງທຶນດ້ານພື້ນຖານໂຄງລ່າງ ໂດຍສະເພາະແມ່ນການສ້າງທາງລົດໄຟ; ແຜນສ້າງທາງດ່ວນ ວຽງຈັນ – ຮ່າໂນ້ຍ, ວຽງຈັນ – ບໍ່ເຕັນ, ວຽງຈັນ – ປາກເຊ ດ້ວຍການລົງທຶນຫຼາຍຮູບແບບ ແນໃສ່ອຳນວຍຄວາມສະດວກດ້ານການຄົມມະນາຄົມຂົນສົ່ງ ແລະ ຮັບປະກັນເຮັດໃຫ້ໂຄງການປະກົດຜົນເປັນຈິງ.

  1. ໂຄງການກໍ່ສ້າງທາງລົດໄຟ ລາວ – ຈີນ:

ອີງຕາມຂໍ້ມູນຈາກຄະນະຮັບຜິດຊອບໂຄງການກໍ່ສ້າງທາງລົດໄຟ ໃຫ້ຮູ້ວ່າ: ໂຄງການກໍ່ສ້າງທາງລົດໄຟ ລາວ – ຈີນ ທີ່ມີໄລຍະທາງທັງໝົດຍາວ 409 ກິໂລແມັດ ຄວາມຄືບໜ້າມາຮອດວັນທີ 28/2/2018 ປະຕິບັດສຳເລັດ 26,5% ຂອງວຽກງານກໍ່ສ້າງພື້ນຖານໂຄງລ່າງທາງລົດໄຟ, ຄວາມຄືບໜ້າຂອງແຕ່ລະສັນຍາມີຄື:

  • ສັນຍາທີ 1 ປະຕິບັດສຳເລັດ 26,7%.

  • ສັນຍາທີ 2 ປະຕິບັດສຳເລັດ 25,2%.

  • ສັນຍາທີ 3 ປະຕິບັດສຳເລັດ 20,6%.

  • ສັນຍາທີ 4 ປະຕິບັດສຳເລັດ 28,6%.

  • ສັນຍາທີ 5 ປະຕິບັດສຳເລັດ 27,1%.

  • ສັນຍາທີ 6 ປະຕິບັດສຳເລັດ 31,0%.

ໃນນີ້, ມີໜ້າວຽກລະອຽດຄື: ໄດ້ຊີເຈາະອຸມົງທັງໝົດ 55 ອຸມົງ. ໃນນີ້, ມີ 140 ຈຸດກໍ່ສ້າງ ສາມາດຊີເຈາະໄດ້ທັງໝົດ 48.278 ແມັດ; ເລີ່ມລົງມືກໍ່ສ້າງຂົວ 66 ແຫ່ງ. ໃນນັ້ນ, ສ້າງເສົາຂົວສຳເລັດ 284 ເສົາ, ຊີເຈາະເສົາຂົວໄດ້ 4.410 ເຂັມ ລວມຄວາມຍາວເຂັມ 119.018 ແມັດ; ສໍາລັບວຽກອຳນວຍຄວາມສະດວກໃຫ້ແກ່ການກໍ່ສ້າງ ແມ່ນໄດ້ກໍ່ສ້າງເສັ້ນທາງເພື່ອເຂົ້າຫາສະຖານທີ່ກໍ່ສ້າງໄດ້ທັງໝົດ 852 ກິໂລແມັດ ແລະ ຂົວ 2.361 ແມັດ.

ສາມາດມອບພື້ນທີ່ກໍ່ສ້າງໃຫ້ໂຄງການບັນລຸ 87,09% ຂອງລວງຍາວທັງໝົດຂອງໂຄງການ ເຊິ່ງມີລາຍລະອຽດຄື: ແຂວງຫຼວງນ້ຳທາ ມີລວງຍາວ 16,9 ກິໂລແມັດ ມາຮອດເດືອນກຸມພາ 2018 ແຂວງໄດ້ມອບພື້ນທີ່ໃຫ້ໂຄງການ 15,65 ກິໂລແມັດ, ກວມເອົາ 92,60% ຂອງເນື້ອທີ່ທາງທັງໝົດ; ແຂວງອຸດົມໄຊ ມີລວງຍາວ 126,6 ກິໂລແມັດ ໄດ້ມອບພື້ນທີ່ແລ້ວ 105,5 ກິໂລແມັດ, ກວມເອົາ 83,41%; ແຂວງຫຼວງພະບາງ ມີລວງຍາວ 80 ກິໂລແມັດ ໄດ້ມອບພື້ນທີ່ແລ້ວ 69,67 ກິໂລແມັດ, ກວມເອົາ 87,09%; ແຂວງວຽງຈັນ ມີລວງຍາວ 145,5 ກິໂລແມັດ ໄດ້ມອບພື້ນທີ່ແລ້ວ 135,3 ກິໂລແມັດ, ກວມເອົາ 92,99% ແລະ ນະຄອນຫຼວງວຽງຈັນ ຍາວ 40 ກິໂລແມັດ ມາຮອດເດືອນ 2/2018 ໄດ້ມອບພື້ນທີ່ໃຫ້ໂຄງການ 30,4 ກິໂລແມັດ, ກວມເອົາ 74,92% ເນື້ອທີ່ທາງທັງໝົດ.

  1. ໂຄງການສ້າງທາງດ່ວນ:

ທ່ານ ບຸນຍະວັດ ນີລະໄຊຍ໌ ຜູ້ປະສານງານທາງດ່ວນ ນະຄອນຫຼວງວຽງຈັນ – ວັງວຽງ ໃຫ້ຮູ້ວ່າ: ໂຄງການກໍ່ສ້າງທາງດ່ວນ ແຕ່ນະຄອນຫຼວງວຽງຈັນ – ວັງວຽງ ແມ່ນນອນໃນໂຄງການທາງດ່ວນ ລາວ – ຈີນ ທີ່ມີຈຸດເລີ່ມແຕ່ນະຄອນຫຼວງວຽງຈັນ ຫາ ບໍ່ເຕັນ ແຂວງຫຼວງນ້ຳທາ ຊາຍແດນ ສປ ຈີນ ໂດຍຜ່ານ 4 ແຂວງຄື: ນະຄອນຫຼວງວຽງຈັນ, ແຂວງວຽງຈັນ, ຫຼວງພະບາງ, ອຸດົມໄຊ ແລະ ຫຼວງນ້ຳທາ ທີ່ມີຄວາມຍາວ 460 ກິໂລແມັດ, ແຕ່ສະເພາະການກໍ່ສ້າງໄລຍະທຳອິດແມ່ນຈະສ້າງແຕ່ ນະຄອນຫຼວງວຽງຈັນ ຫາ ວັງວຽງ ແຂວງວຽງຈັນ ມີຄວາມຍາວທັງໝົດ 109,1 ກິໂລແມັດ, ທາງກວ້າງ 23 ແມັດ, ມີ 4 ຊ່ອງຈະລາຈອນ ( ມີ 2 ແລວ   ໄປ – ກັບ ) ມີມູນຄ່າການກໍ່ສ້າງທັງໝົດປະມານ 1,3 ຕື້ໂດລາສະຫະລັດ.

ທ່ານໃຫ້ຮູ້ຕື່ມວ່າ: ສະເພາະການອອກແບບທາງໃຫ້ລົດແລ່ນ ແຕ່ນະຄອນຫຼວງວຽງຈັນ – ໂພນໂຮງ ແມ່ນມີຄວາມໄວ 80 ກິໂລແມັດຕໍ່ຊົ່ວໂມງ; ຕະຫຼອດເສັ້ນທາງຈະມີການກໍ່ສ້າງວົງວຽນເຊື່ອມຕໍ່ຂຶ້ນລົງທາງດ່ວນທັງໝົດ 7 ຈຸດ ຄື: 1. ຈຸດບ້ານນາຊອນ, 2. ບ້ານບົວ, 3. ບ້ານສະກ້າ, 4. ໂພນໂຮງ, 5. ຫີນເຫີບ, 6. ທ່າເຮືອ ແລະ ຈຸດທີ 7. ແມ່ນວັງວຽງ; ວົງວຽນທັງໝົດແມ່ນຈະອອກແບບເປັນຮູບລັກສະນະຄ້າຍຄືຮູບຊົງແກ, ປະກອບໃຫ້ມີເສັ້ນທາງເພື່ອເຊື່ອມຕໍ່ກັບເສັ້ນທາງເລກທີ 13 ເໜືອ ເຊິ່ງເປັນການລົງທຶນຂອງ ກຸ່ມບໍລິສັດ ກໍ່ສ້າງ ແຂວງຢຸນນານ ໃນຮູບແບບ ( BOT ) ການກໍ່ສ້າງ 3 ປີ ໃຫ້ສຳເລັດ. ຫຼ້າສຸດ, ໃນວັນທີ 5 ເມສາຜ່ານມາ ລັດຖະບານລາວ ກໍ່ໄດ້ເຊັນສັນຍາສຳປະທານຮ່ວມກັບ ບໍລິສັດ ກໍ່ສ້າງລົງທຶນ ແລະ ຖືຫຸ້ນແຂວງຢຸນນານ ຈຳກັດ ເພື່ອກຽມໃຫ້ແກ່ການເປີດການກໍ່ສ້າງຢ່າງເປັນທາງການ.

  1. ທາງດ່ວນແຕ່ ວຽງຈັນ – ປາກເຊ:

ແມ່ນໂຄງການທີ່ຕິດພັນກັບໂຄງການທາງດ່ວນ ວຽງຈັນ – ຮ່າໂນ້ຍ ( ວຽງຈັນ – ປາກຊັນ – ຫຼັກຊາວ ຊາຍແດນ                   ສສ ຫວຽດນາມ ) ທີ່ເປັນອີກໂຄງການທາງດ່ວນທີ່ຈະໄດ້ຮັບການສ້າງຂຶ້ນ. ສະນັ້ນ, ໂຄງການທາງດ່ວນ ວຽງຈັນ – ປາກເຊ ແມ່ນຈະມີທີ່ຕັ້ງເຊື່ອມຕໍ່ຈາກ ປາກຊັນ – ປາກເຊ ໂດຍແບ່ງອອກເປັນ 4 ໄລຍະຄື:

ໄລຍະທີ 1: ປາກຊັນ ( ແຍກວຽງຈັນ – ຮ່າໂນ້ຍ ) – ທ່າແຂກ ( ແຍກທາງເລກ 12 ) ປະມານ 164 ກິໂລແມັດ.

ໄລຍະທີ 2: ທ່າແຂກ ( ແຍກທາງເລກ 12 ) – ສະຫວັນນະເຂດ ( ແຍກທາງເລກ 9 ) ປະມານ 117 ກິໂລແມັດ.

ໄລຍະທີ 3: ສະຫວັນນະເຂດ ( ແຍກທາງເລກ 9 ) – ສາລະວັນ ( ແຍກທາງເລກ 15 ) ປະມານ 128 ກິໂລແມັດ.

ໄລຍະທີ 4: ສາລະວັນ ( ແຍກທາງເລກ 15 ) – ປາກເຊ ປະມານ 82 ກິໂລແມັດ.

( ໂດຍກໍານົດແລວທາງ ຕາມແຜນທີ່     1/50000 ) ປັດຈຸບັນແມ່ນກຳລັງຢູ່ໃນຂັ້ນຕອນການຄົ້ນຄວ້າພິຈາລະນາເອົາບໍລິສັດທີ່ຈະມາສຶກສາຄວາມເປັນໄປໄດ້ ເຊິ່ງມີບໍລິສັດຈຳນວນໜຶ່ງກໍ່ໄດ້ມາຍື່ນເອກະສານສະແດງເຈດຈຳນົງ ໃນການສຶກສາຄວາມເປັນໄປໄດ້ໃນການສ້າງເສັ້ນທາງດັ່ງກ່າວນີ້. ຢ່າງໃດກໍ່ຕາມ, ທາງດ່ວນເສັ້ນນີ້ເປົ້າໝາຍແມ່ນເປັນການລົງທຶນໃນຮູບແບບ BOT ຄາດວ່າຈະໄດ້ບໍລິສັດທີ່ຈະມາສຶກສາສຳຫຼວດຄວາມເປັນໄປໄດ້ໃນປີ 2018 ນີ້.

  1. ດ້ານວຽກງານກໍ່ສ້າງຂົວເຊື່ອມໂຍງກັບບັນດາປະເທດອ້ອມຂ້າງ:

ມາຮອດປັດຈຸບັນ ຂົວມິດຕະພາບນໍ້າຂອງ ລາວ – ໄທ ທີ່ສຳເລັດ ແລະ ນຳໃຊ້ແລ້ວມີທັງໝົດ 4 ແຫ່ງຄື: ນະຄອນຫຼວງວຽງຈັນ – ໜອງຄາຍ, ສະຫວັນນະເຂດ – ມຸກດາຫານ, ຄຳມ່ວນ – ນະຄອນພະນົມ ແລະ ແຫ່ງທີ 4 ບໍ່ແກ້ວ – ຊຽງຂອງ. ເພື່ອສືບຕໍ່ການຮ່ວມມື ແລະ ຕອບສະໜອງຄວາມຮຽກຮ້ອງຕ້ອງການດ້ານການພັດທະນາເສດຖະກິດ ແລະ ການເຊື່ອມໂຍງໃນໄລຍະໃໝ່ໃຫ້ມີຄວາມສະດວກສະບາຍ ລັດຖະບານທັງສອງປະເທດ ລາວ – ໄທ ໄດ້ມີແຜນຈະສ້າງຂົວມິດຕະພາບແຫ່ງທີ 5 ທີ່ເຊື່ອມຕໍ່ລະຫວ່າງ ປາກຊັນ – ບຶງການ ເຊິ່ງໄດ້ສໍາເລັດການອອກແບບເປັນທີ່ຮຽບຮ້ອຍ ແລະ ກຳລັງຢູ່ໃນຂັ້ນຕອນລໍຖ້າແຫຼ່ງທຶນ, ສ່ວນຂົວມິດຕະພາບແຫ່ງທີ 6 ທີ່ລັດຖະບານທັງ 2 ປະເທດ   ລາວ – ໄທ ຈະມີແຜນສ້າງຂຶ້ນແມ່ນຕັ້ງຢູ່ລະຫວ່າງ ແຂວງສາລະວັນ – ອຸບົນຣາຊທານີ ແລະ ນອກນີ້ຍັງມີຂົວມິດຕະພາບລະຫວ່າງ ລາວ – ມຽນມາ ທີ່ຕັ້ງຢູ່ລະຫວ່າງ ເມືອງລອງ ແຂວງຫຼວງນ້ຳທາ ( ສປປ ລາວ ) ກັບ ເມືອງທ່າຂີ້ເຫຼັກ ລັດສານ ( ມຽນມາ ).

  1. ດ້ານການປັບປຸງ ແລະ ພັດທະນາພື້ນຖານໂຄງລ່າງພາຍໃນ:

ເພື່ອຮັບປະກັນການເຊື່ອມໂຍງ ແລະ ຂົນສົ່ງແຕ່ເໜືອຮອດໃຕ້ ເວົ້າລວມ, ເວົ້າສະເພາະກໍ່ຄືການຄົມມະນາຄົມໃນຂອບເຂດທົ່ວປະເທດ ໃຫ້ສາມາດໄປ – ມາຫາສູ່ກັນໄດ້ຢ່າງສະດວກສະບາຍ ມາຮອດປັດຈຸບັນທົ່ວປະເທດກໍ່ມີຂົວຂ້າມນ້ຳຂອງພາຍໃນລະຫວ່າງແຂວງຫາແຂວງ ແລະ ແຂວງຫາເມືອງ ມີ 4 ແຫ່ງຄື: ຂົວປາກເຊ – ເມືອງໂພນທອງ, ຂົວຂ້າມນ້ຳຂອງໄຊຍະບູລີ – ເມືອງນານ, ເມືອງເງິນ – ປາກແບ່ງ, ປາກລາຍ – ຊະນະຄາມ; ມີສະໜາມບິນທັງໝົດ 13 ແຫ່ງ. ໃນນັ້ນ, ສະໜາມບິນສາກົນ 4 ແຫ່ງ ແລະ ສະໜາມບິນພາຍໃນ 9 ແຫ່ງ.

ມາຮອດປີ 2017 ເສັ້ນທາງບັນລຸທົ່ວປະເທດ 58.000 ກວ່າກິໂລແມັດ, ຂົວເກືອບ 3.000 ແຫ່ງ ແລະ ຄາດໝາຍສູ້ຊົນໃນການພັດທະນາທາງອາຊຽນ 8 ເສັ້ນ, ມີລວງຍາວ 2.860 ກິໂລແມັດ.

%d bloggers like this: