ລັດຖະມົນຕີ ຖວທ ໃຫ້ກຽດຕ້ອນຮັບບັນດາແຂວງ ທີ່ມາຮ່ວມສະຫຼອງສຽງແຄນລາວເປັນມໍລະດົກໂລກ

ໃນວັນທີ 11 ເມສາ 2018 ພາຍຫຼັງຮ່ວມຂະບວນແຫ່ ແລະ ເຄື່ອນໄຫວຕາມລາຍການກິດຈະກໍາຕ່າງໆຂອງການສະຫຼອງສຽງແຄນລາວເປັນມໍລະດົກວັດທະນະທໍາ ນາມມະທໍາຂອງມວນມະນຸດ ໃນຕອນແລງວັນດຽວກັນ ຄະນະນໍາຂອງນະຄອນຫຼວງ ແລະ 17 ແຂວງທົ່ວປະເທດ ກໍ່ໄດ້ເຂົ້າພົບ ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ( ຖວທ ) ທີ່ກະຊວງດັ່ງກ່າວ.

ໂອກາດດັ່ງກ່າວ ທ່ານ ບໍ່ແສງຄຳ ວົງດາລາ ໄດ້ສະແດງຄວາມຂອບໃຈນຳບັນດາເຈົ້າແຂວງ, ຮອງເຈົ້າແຂວງ, ຫົວໜ້າພະແນກ ຖວທ ທີ່ຕາງໜ້າແຕ່ລະແຂວງເຂົ້າຮ່ວມຂະບວນແຫ່ແຄນລາວເຂົ້າເປັນມໍລະດົກໂລກຄັ້ງນີ້. ພ້ອມນັ້ນ, ການນຳແຕ່ລະແຂວງກໍ່ໄດ້ແລກປ່ຽນຄວາມຄິດເຫັນໃນການປົກປັກຮັກສາ ແລະ ອະນຸລັກສຽງແຄນລາວ ອັນເປັນມໍລະດົກວັດທະນະທຳອັນລ້ຳຄ່າຂອງເຊື້ອຊາດລາວ ເພື່ອໃຫ້ຄົນລຸ້ນຫຼັງໄດ້ຮັບຮູ້ ແລະ ສືບຕໍ່ປະຕິບັດ.

ພາຍຫຼັງການພົບປະສົນທະນາ, ທ່ານລັດຖະມົນຕີກໍ່ໄດ້ໃຫ້ກຽດຂຶ້ນມອບໃບຍ້ອງຍໍຂອງກະຊວງ ຖວທ ແລະ ມອບຂອງທີ່ລະນຶກທີ່ເປັນແຄນໃຫ້ແກ່ບັນດາ 17 ແຂວງ ແລະ 1 ນະຄອນຫຼວງ ທີ່ມີຜົນງານປະກອບສ່ວນງານສະເຫຼີມສະຫຼອງ ສຽງແຄນເຊື້ອຊາດລາວເປັນມໍລະດົກວັດທະນະທຳ ນາມມະທຳຂອງມວນມະນຸດຊາດ ທີ່ນະຄອນຫຼວງວຽງຈັນໃນຄັ້ງນີ້.

%d bloggers like this: