ມຽນມາສົ່ງອອກເຂົ້າ ສ້າງສະຖິຕິໃນຮອບ 50 ປີຜ່ານມາ

ທ່ານ ເຢມິນ ອອງ ເລຂາທິການໃຫຍ່ສະມາຄົມເຂົ້າສານ ມຽນມາ ເປີດເຜີຍວ່າ: ເຖິງວ່າສົກປີ 2017 – 2018 ຍັງບໍ່ທັນໝົດກໍ່ຕາມ ແຕ່ວ່າມາຮອດອາທິດທີສອງຂອງເດືອນພະຈິກນີ້ ໝາຍວ່າໃນ 8 ເດືອນຜ່ານມາປະເທດມຽນມາ ສາມາດສົ່ງອອກເຂົ້າໄດ້ປະມານ 2 ລ້ານໂຕນ ເຊິ່ງເປັນສະຖິຕິສູງສຸດໃນ 50 ປີຜ່ານມາ.
ທ່ານ ເຢມິນ ອອງ ກ່າວຕື່ມວ່າ: ໃນໄລຍະດຽວກັນຂອງປີຜ່ານມາ, ມຽນມາ ສົ່ງອອກເຂົ້າໄດ້ປະມານ 5 ແສນກວ່າໂຕນ. ແນວໃດກໍ່ດີ, ໃນສົກປີ 2014 – 2015 ມຽນມາ ສົ່ງອອກເຂົ້າໄດ້ 1,800,000 ໂຕນ ເຊິ່ງຖືວ່າເປັນສະຖິຕິໃໝ່ແລ້ວ.
ຂະນະທີ່ສົກ 2015 – 2016 ມຽນມາ ບັນລຸການສົ່ງອອກເຂົ້າໄດ້ 1,400,000 ໂຕນ ແລະ ສົກປີ 2016 – 2017 ບັນລຸການສົ່ງອອກເຂົ້າເຖິງ 1,700,000 ໂຕນ.
ໃນໄລຍະ 5 ປີທີ່ຜ່ານມາ, ທຸລະກິດສົ່ງອອກເຂົ້າຂອງມຽນມາ ເຕີບໂຕ 2 ເທົ່າມີຂະໜາດ 1,100 ລ້ານໂດລາສະຫະລັດ ແລະ ສ້າງວຽກເຮັດງານທໍາ 380,000 ຕໍາແໜ່ງພາຍໃນປະເທດ.
ນອກຈາກນັ້ນ, ລັດຖະບານ ມຽນມາ ໄດ້ອອກກົດໝາຍການລົງທຶນທີ່ໃຫ້ສິດທິພິເສດທາງພາສີ ແລະ ນາໆຊາດໄດ້ຍົກເລີກມາດຕະການກີດກັ້ນທາງເສດຖະກິດຕໍ່ ມຽນມາ.

%d bloggers like this: