ມູນຄ່າການຄ້າລາວ-ຫວຽດນາມ ບັນລຸຫຼາຍກວ່າ 936 ລ້ານໂດລາໃນປີ 2017

ກອງປະຊຸມຄັ້ງທີ 40 ຂອງຄະນະກຳມະການຮ່ວມມືທະວິພາຄີ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານແຫ່ງ ສສ ຫວຽດນາມປະຈຳປີ 2018 ໄດ້ຕີລາຄາສູງຕໍ່ບັນດາຜົນສຳເລັດຂອງການຈັດຕັ້ງປະຕິບັດຂໍ້ຕົກລົງແຜນການຮ່ວມມືໃນປີ 2017 ອັນພົ້ນເດັ່ນແມ່ນການຄ້າລະຫວ່າງສອງປະເທດເພີ່ມຂຶ້ນ13.6% ລື່ນຄາດຫມາຍທີ່ສອງຝ່າຍໄດ້ກຳນົດໄວ້ ແລະ ໃນປີ 2018 ໄດ້ວາງຄາດຫມາຍເພີ່ມຂຶ້ນ 10% ຂຶ້ນໄປ.

ກອງປະຊຸມຄັ້ງນີ້ ມີຂຶ້ນໃນວັນທີ 5 ກຸມພາ ທີ່ສຳນັກງານນາຍົກລັດຖະມົນຕີ  ໂດຍການເຂົ້າຮ່ວມເປັນປະທານຊີ້ນຳກອງປະຊຸມ ຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ຫງວຽນ ຊວັນ ຟຸກ ນາຍົກລັດຖະມົນຕີ ແຫ່ງ ສສ ຫວຽດນາມ.


ກອງປະຊຸມດັ່ງກ່າວ ສອງຝ່າຍໄດ້ຮ່ວມກັນຕີລາຄາຜົນຂອງການຈັດຕັ້ງປະຕິບັດບົດບັນທຶກກອງປະຊຸມຄັ້ງທີ 39 ກໍຄືຂໍ້ຕົກລົງວ່າດ້ວຍການຮ່ວມມືປະຈຳປີ 2017 ແລະ ພ້ອມກັນປຶກສາຫາລືກ່ຽວກັບທິດທາງການຮ່ວມມືໃນປີ 2018. ມູນຄ່າການຄ້າຂອງສອງປະເທດບັນລຸ 936.8 ລ້ານໂດລາສະຫະລັດ ເພີ່ມຂຶ້ນ 13.6% ເຊິ່ງລື່ນຄາດຫມາຍທີ່ສອງຝ່າຍໄດ້ກຳນົດໄວ້ ແລະ ໃນປີນີ້ກໍວາງຄາດ   ຫມາຍເພີ່ມຂຶ້ນ 10% ຂຶ້ນໄປ; ການລົງທຶນຂອງວິສາຫະກິດຫວຽດນາມຢູ່ລາວ ມາຮອດປັດຈຸບັນມີມູນຄ່າທັງຫມົດ 3.7 ຕື້ໂດລາ ຈັດຢູ່ໃນແຖວຫນ້າຂອງບັນດາປະເທດທີ່ມາລົງທຶນໃນລາວ, ສິ່ງທີ່ຫນ້າຍິນດີແມ່ນເຂື່ອນໄຟຟ້າເຊຂະຫມານ 1 ໄດ້ດຳເນີນການຜະລິດຂາຍກະແສໄຟຟ້າໄປຫວຽດນາມ ແລະ ສ້າງລາຍຮັບເຂົ້າງົບປະມານໃຫ້ແກ່ລາວຈຳນວນຫນຶ່ງ ແລະ ລັດຖະບານຫວຽດນາມໄດ້ສືບຕໍ່ຊ່ວຍກໍ່ສ້າງພະນັກງານ ແລະ ນັກຮຽນ, ນັກສຶກສາລາວ ໄປຮຽນຢູ່ຫວຽດນາມເພີ່ມຂຶ້ນໃນແຕ່ລະປີ, ສະເພາະໃນປີ 2018 ນີ້ ມີ 1,266 ທຶນ.


ໃນໂອກາດດຽວກັນນາຍົກລັດຖະມົນຕີ ແຫ່ງ ສປປ ລາວ ແລະ ສສ ຫວຽດນາມ ໄດ້ເປັນສັກຂີພະຍານມອບໃບຍ້ອງຍໍໃຫ້ແກ່ບຸກຄົນ, ກົມກອງລວມຫມູ່ ທີ່ມີຜົນງານໄລຍະປີ 2017 ຂອງສອງຄະນະກຳມະການຮ່ວມມືລາວ ແລະ ຫວຽດນາມ, ເຊັນບົດບັນທຶກກອງປະຊຸມຄັ້ງທີ 40, ຂໍ້ຕົກລົງວ່າດ້ວຍແຜນການຮ່ວມມືໃນປີ 2018 ຂອງສອງຄະນະກຳມະການຮ່ວມມືລາວ ແລະ ຫວຽດນາມ ແລະ ບັນດາເອກະສານຮ່ວມມື ແລະ ລົງທຶນ ເພື່ອພັດທະນາທ່າເຮືອຫວຸ້ງອ່າງ 1,2 ແລະ 3 ເປັນທ່າເຮືອສາກົນ ລາວ-ຫວຽດນາມ.

%d bloggers like this: