ມີ 300 ກວ່າຫ້າງຮ້ານເຂົ້າຮ່ວມງານຕະຫຼາດນັດ ປະຈຳປີ 2018 ຂອງເມືອງນາຊາຍທອງ

ເປີດຂຶ້ນຢ່າງເປັນທາງການ ງານວາງສະແດງ ແລະ ຂາຍສິນຄ້າກະສິກຳ, ອຸດສາຫະກຳ ແລະ ຫັດ ຖະກຳ ຄັ້ງທີ 23 ປະຈຳປີ 2018 ຂອງເມືອງນາຊາຍທອງ, ມີບັນດາຫ້າງຮ້ານເຂົ້າຮ່ວມ 300 ກວ່າຮ້ານ.

ໃນວັນທີ 9 ກຸມພາ 2018 ຜ່ານມາ ໄດ້ຈັດພິທີເປີດງານວາງສະແດງ ແລະ ຂາຍສິນຄ້າກະສິກຳ, ອຸດສາຫະກຳ ແລະ ຫັດຖະກຳ ຄັ້ງທີ 23 ປະຈຳປີ 2018 ຂອງເມືອງນາຊາຍທອງ ກ່າວເປີດງານໂດຍ ທ່ານ ວິໄລສັກ ນາມມຸນຕີ ເຈົ້າເມືອງໆນາຊາຍທອງ, ມີບັນດາທ່ານຮອງເຈົ້າເມືອງ, ຫົວໜ້າ – ຮອງຫົວໜ້າຫ້ອງການອຸດສາຫະກຳ ແລະ ການຄ້າ ເມືອງນາຊາຍທອງ ແລະ ເມືອງອ້ອມຂ້າງ, ການນຳຈາກນະຄອນຫຼວງວຽງຈັນ, ຊາວຄ້າຂາຍ ພ້ອມດ້ວຍແຂກຖືກເຊີນ ແລະ ປະຊາຊົນພາຍໃນເມືອງເຂົ້າຮ່ວມ ເຊິ່ງງານດັ່ງກ່າວຈັດຂຶ້ນລະຫວ່າງວັນທີ 9 – 15 ກຸມພາ 2018 ທີ່ບ້ານແຈ້ງສະຫວ່າງ, ກຸ່ມບ້ານອີ່ໄລ ເມືອງນາຊາຍທອງ ນະຄອນຫຼວງວຽງຈັນ.

ທ່ານ ວິໄລສັກ ນາມມຸນຕີ ກ່າວວ່າ: ການເປີດງານວາງສະແດງຄັ້ງນີ້ກໍ່ເພື່ອເປັນການຈັດຕັ້ງຜັນຂະຫຍາຍກອງປະຊຸມໃຫຍ່ ຄັ້ງທີ VI ຂອງອົງຄະນະພັກນະຄອນຫຼວງວຽງຈັນ ກໍ່ຄືມະຕິກອງປະຊຸມໃຫຍ່ ຄັ້ງທີ VI ຂອງເມືອງນາຊາຍທອງ, ເປັນການຢັ້ງຢືນເຖິງຜົນສຳເລັດໃນການຈັດຕັ້ງປະຕິບັດແຜນການພັດທະນາເສດຖະກິດ – ສັງຄົມປະຈຳປີຂອງເມືອງ, ກະຕຸກຊຸກຍູ້ ແລະ ສົ່ງເສີມຜະລິດຕະພັນດ້ານກະສິກຳ, ອຸດສາຫະກຳ ແລະ ຫັດຖະກຳ ຢູ່ພາຍໃນເມືອງໃຫ້ຂະຫຍາຍຕົວຢ່າງຕໍ່ເນື່ອງ ພ້ອມທັງເປັນການຊຸກຍູ້ການຜະລິດເປັນສິນຄ້າຂອງປະຊາຊົນໃຫ້ເຕີບໃຫຍ່ເຂັ້ມແຂງ, ເປີດກວ້າງດ້ານການຄ້າ, ການບໍລິການ ແລະ ການທ່ອງທ່ຽວໃຫ້ຂະຫຍາຍຕົວກວ້າງຂວາງຂຶ້ນຕື່ມ ແລະ ເພື່ອເປັນການແລກປ່ຽນບົດຮຽນຂອງຊາວກະສິກອນ, ຊາວຊ່າງຫັດຖະກຳ, ຄອບຄົວຕົວແບບຜູ້ທຳການຜະລິດສິນຄ້າພາຍໃນເມືອງ ແລະ ຕ່າງເມືອງທາງດ້ານເຕັກນິກການຜະລິດ ແລະ ການຄ້າຂາຍຕ່າງໆ ທັງຊຸກຍູ້ສົ່ງເສີມການຕິດກາໝາຍສິນຄ້າ ໂອດ໊ອບ ຂອງເມືອງໃຫ້ເພີ່ມຂຶ້ນ ແລະ ພິເສດແມ່ນເພື່ອເປັນການສ້າງຂະບວນການຕ້ອນຮັບປີທ່ອງທ່ຽວລາວ 2018 ໃຫ້ມີບັນຍາກາດຄຶກຄື້ນມ່ວນຊື່ນ.

ທ່ານ ວຽງຄຳ ສີຫາໂຄດ ຮອງເຈົ້າເມືອງໆນາຊາຍທອງ, ຮອງປະທານຄະນະກຳມະການຈັດງານຕະຫຼາດນັດ ປະຈຳປີ 2018 ກໍ່ໄດ້ກ່າວວ່າ: ງານວາງສະແດງ ແລະ ຂາຍສິນຄ້າກະສິກຳ, ອຸດສາຫະກຳ ແລະ ຫັດຖະກຳນີ້ຖືກາຍເປັນບຸນປະເພນີປາງໃຫຍ່ຂອງຊາວເມືອງນາຊາຍທອງ ເຊິ່ງໄດ້ຈັດຂຶ້ນທຸກໆປີ ແລະ ມາຮອດປີນີ້ກໍ່ຖືວ່າເປັນປີທີ 23 ແລ້ວ ໂດຍງານໃນປີນີ້ມີບັນດາຫ້າງຮ້ານຊາວຄ້າຂາຍເຂົ້າຮ່ວມ ເຊັ່ນ: ກົມກອງລວມໝູ່ ແລະ ຫ້ອງການອ້ອມຂ້າງເມືອງ 8 ຮ້ານ, ຜະລິດຕະພັນສິນຄ້າ ໂອດ໊ອບ ພາຍໃນເມືອງ 2 ຮ້ານ ແລະ ຕ່າງເມືອງ 3 ຮ້ານ, ສິນຄ້າຄອບຄົວຕົວແບບມີ 38 ຮ້ານ, ຜົນຜະລິດພາຍໃນເມືອງ 45 ຮ້ານ, ໂຮງຈັກໂຮງງານ – ໂຮງຊ່າງຫັດຖະກຳ 3 ຮ້ານ, ເຟີນີເຈີ 1 ຮ້ານ, ບໍລິສັດ ແລະ ຕົວແທນຈຳໜ່າຍຜະລິດຕະພັນສິນຄ້າ 2 ຮ້ານ, ຜະລິດຕະພັນຈາກຕ່າງເມືອງ 4 ຮ້ານ, ແຂວງ 5 ຮ້ານ, ບັນດາຮ້ານບໍລິການ ແລະ ຂາຍສິນຄ້າທົ່ວໄປ 144 ຮ້ານ, ຮ້ານກິນດື່ມ ແລະ ຮ້ານອາຫານ 25 ຮ້ານ, ຮ້ານເຂົ້າຫຼາມ, ປີ້ງໄກ່ ແລະ ອື່ນໆ 50 ຮ້ານ ເຊິ່ງລວມທັງໝົດ 330 ຮ້ານ ເມື່ອທຽບໃສ່ປີ 2017 ເຫັນວ່າຮ້ານວາງສະແດງຕ່າງໆແມ່ນເພີ່ມຂຶ້ນ 2.5% ແລະ ມູນຄ່າລວມຂອງສິນຄ້າ 5,128,690,000 ກີບ, ຖ້າທຽບໃສ່ປີ 2017 ແມ່ນເພີ່ມຂຶ້ນ 2.8%.

ນອກຈາກນີ້, ທ່ານຮອງເຈົ້າເມືອງຍັງກ່າວວ່າ: ລາຍຮັບຈາກການຂາຍສິນຄ້າພາຍໃນງານຕະຫຼາດນັດຄັ້ງນີ້ ຈະມີມູນຄ່າເພີ່ມຂຶ້ນ ແລະ ການຈັດງານຕະຫຼາດນັດປີນີ້ ຈະເປັນກຳລັງແຮງຕໍ່ການພັດທະນາເສດຖະກິດ – ສັງຄົມຂອງເມືອງໃນທາງກົງ ແລະ ທາງອ້ອມ ເຊິ່ງເຮົາສາມາດສັງເກດເຫັນໄດ້ວ່າຕົວເລກການຂະຫຍາຍຕົວທາງດ້ານເສດຖະກິດຂອງເມືອງຢູ່ໃນລະດັບ 9.2% ຕໍ່ປີ ແລະ ຜົນຜະລິດທາງດ້ານກະສິນກຳກໍ່ເຫັນວ່າມີສ່ວນເຫຼືອກິນ, ສາມາດແຮໄວ້ ແລະ ຂາຍເປັນສິນຄ້າພາຍໃນ ແລະ ສົ່ງອອກໄດ້ຈຳນວນຫຼາຍ.

%d bloggers like this: