ພາກສ່ວນຕ່າງໆສືບຕໍ່ມອບເຄື່ອງຊ່ວຍເຫຼືອບ້ານສັນແຟນ

ຫຼາຍພາກສ່ວນໄດ້ເຂົ້າອຸປະຖຳເພື່ອຊ່ວຍເຫຼືອບ້ານສັນແຟນ ທີ່ຖືກອັກຄີໄພໃນຕົ້ນເດືອນພຶດສະພາ.

ໃນວັນທີ 14 ພຶດສະພາ 2018 ນີ້ ຢູ່ທີ່ຫ້ອງວ່າການແຂວງຊຽງຂວາງ ໄດ້ມີຫຼາຍພາກສ່ວນເຂົ້າມາຊ່ວຍເຫຼືອບໍລິຈາກເປັນວັດຖຸ ແລະ ເງິນ ຕາງໜ້າຂຶ້ນຮັບໂດຍ ທ່ານ ຄຳປາວ ມົວ ຮອງເຈົ້າແຂວງໆຊຽງ ຂວາງ ພ້ອມດ້ວຍຄະນະ ໃຫ້ການຊ່ວຍເຫຼືອຄັ້ງນີ້ມີ: ທ່ານ ຊິງຊຸນໝິງ ຕາງໜ້າໂຮງງານດິນຈີ່ທັນສະໄໝ ກິ່ງວຽງ ມອບເງິນຈຳນວນ 2 ລ້ານກີບ; ພະແນກໄປສະນີ, ໂທລະຄົມມະນາຄົມ ແລະ ການສື່ສານ ມອບເງິນຈຳນວນ 1.030.000 ກີບ; ສະພາການຄ້າຈີນ ປະຈຳສາຂາຊຽງຂວາງ ຊ່ວຍເຄື່ອງນຸ່ງຫົ່ມ, ໝີ່, ປ໋ອງປາ ແລະ ເຂົ້າ ມູນຄ່າ 28 ລ້ານກີບ.

ຊຸມຊົນຄົນຫວຽດນາມ ທີ່ອາໄສຢູ່ແຂວງຊຽງຂວາງ ຊ່ວຍເຄື່ອງນຸ່ງຫົ່ມ, ປ໋ອງປາ, ໝີ່, ຖ້ວຍ, ເຂົ້າ ມູນຄ່າ 21,5 ລ້ານກີບ; ພະແນກອຸດສາຫະກຳ ແລະ ການຄ້າແຂວງ ຊ່ວຍເງິນ 3,2 ລ້ານກີບ; ພະແນກໂຍທາທິການ ແລະ ຂົນສົ່ງ ຊ່ວຍເງິນ 2 ລ້ານກີບ. ນອກນັ້ນ, ຍັງມີບັນດາຄອບຄົວ ສີສຸລິດ, ຄອບຄົວ ພົມມະກອນ, ບໍລິສັດ ຮ່ວມທຸລະກິດ 20 ມັງກອນ, ຄອບຄົວ ລິດທິເດດ, ຄອບຄົວ ປະຖັມມະວົງ, ຄອບຄົວ ໄຊຍະວົງ, ຄອບຄົວ ໄຊຍະວົງສາ, ຄອບຄົວ ເລີດລີວັນ, ຄອບຄົວ ຈັນທະວົງ, ຄອບຄົວ ສຸພານະວິໄລ ແລະ ອະດີດນັກສຶກສາເມືອງອານມາ – ອັດຕາ ປະເທດກາຊັກສະຖານ ຊ່ວຍເຄື່ອງນຸ່ງຫົ່ມ, ໝີ່, ປ໋ອງປາ ມູນຄ່າ 35 ລ້ານກີບ ລວມມູນຄ່າການຊ່ວຍເຫຼືອໃນຄັ້ງນີ້ 91.730.000 ກີບ.

ທ່ານຮອງເຈົ້າແຂວງໆຊຽງຂວາງ ກໍ່ໄດ້ກ່າວສະແດງຄວາມຂອບໃຈຕໍ່ທຸກພາກສ່ວນທີ່ໃຫ້ການຊ່ວຍເຫຼືອປະກອບສ່ວນເພື່ອບັນເທົາທຸກຂອງປະຊາຊົນບ້ານສັນແຟນ, ການຊ່ວຍເຫຼືອທຸກຢ່າງຈະນຳໄປມອບໃຫ້ເຖິງມືປະຊາຊົນ.

ບ້ານສັນແຟນ ກຸ່ມນ້ຳລ້ຽງ ເມືອງຄຳ ແຂວງຊຽງຂວາງ ໄດ້ຮັບຜົນກະທົບຈາກອັກຄີໄພໃນເວລາ 16:00 ໂມງ ຂອງວັນທີ 7 ພຶດສະພາ 2018 ທີ່ຜ່ານມາ, ກ່ອນໜ້ານີ້ບ້ານດັ່ງກ່າວມີ 44 ຫຼັງຄາເຮືອນ, ມີພົນລະເມືອງທັງໝົດ 324 ຄົນ ຍິງ 138 ຄົນ ໄຟໄໝ້ເຮືອນໝົດກ້ຽງມີ 32 ຫຼັງຄາເຮືອນ ໄໝ້ເລັກນ້ອຍ ແລະ ເປ່ເພມີຈຳນວນໜຶ່ງ, ມີຄົນເຈັບ 2 ຄົນ ເຂົ້າ 8.240 ກິໂລ ບ້ານດັ່ງກ່າວເປັນຊົນເຜົ່າຜ້ອງ 100% ທີ່ດຳລົງຊີວິດໃນບ້ານ ລວມມູນຄ່າຄວາມເສຍຫາຍ 1 ຕື້ກວ່າກີບ.

[ ຂ່າວ: ບຸນມີ ແສງທຸມມີ ]

%d bloggers like this: