ປືນແກັບ 70 ກວ່າກະບອກ ປກສ ເມືອງໄກສອນ ພົມວິຫານ ຢຶດໄດ້ ແລະ ມອບເພື່ອທໍາລາຍ

ປກສ ເມືອງໄກສອນ ພົມວິຫານ ແຂວງສະຫວັນນະເຂດ ໄດ້ຈັດພິທີມອບ – ຮັບອາວຸດລ່າເນື້ອ, ປືນປະດິດ ໃຫ້ຫ້ອງຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ປກສ ແຂວງສະຫວັນນະເຂດ ໃນອາທິດຜ່ານມາ, ເປັນກຽດເຂົ້າຮ່ວມໂດຍ ທ່ານ ພັທ ລຳຄູນ ວໍລະວົງ ຮອງຫົວໜ້າກອງບັນຊາການ ປກສ ແຂວງສະຫວັນນະເຂດ ພ້ອມດ້ວຍຄະນະ, ມີທ່ານ ພັຕ ດາວສະເດັດ ຈັນລະພາເທບ ຮອງຫົວໜ້າກອງບັນຊາການ ປກສ ເມືອງໄກສອນ ພົມວິຫານ ພ້ອມດ້ວຍພະແນກການກ່ຽວຂ້ອງ ແລະ ພະນັກງານພາຍໃນ ປກສ ເມືອງດັ່ງກ່າວເຂົ້າຮ່ວມ.

ໃນພິທີ ທ່ານຮອງຫົວໜ້າ ປກສ ເມືອງໄກສອນ ພົມວິຫານ ໄດ້ລາຍງານຜົນການເກັບກູ້ອາວຸດລ່າເນື້ອທີ່ບໍ່ໄດ້ຮັບອະນຸຍາດ ລວມມີ: ປືນແກັບ, ທາດແຕກ, ທາດລະເບີດ, ບັ້ງຜຸ ແລະ ດອກໄມ້ໄຟຕ່າງໆທີ່ ປກສ ເມືຶອງໄກສອນ ພົມວິຫານ ໄດ້ຈັດຕັ້ງກວດກາ, ເກັບກູ້ ແລະ ຢຶດມາໄດ້ຈາກປະຊາຊົນໃນແຕ່ລະກຸ່ມບ້ານທົ່ວເມືອງໄກສອນ ພົມວິຫານ ເຊິ່ງມີປືນແກັບ ຈຳນວນ 71 ກະບອກ, ບັ້ງຜຸໃຫຍ່ 55 ບັ້ງ, ບັ້ງຜຸນ້ອຍຊະນິດກັບຈຳນວນ 07 ກັບ, ແກັບແຕກ 4 ອັນ, ລຳກ້ອງປືນ M16, ປືນ CKC 1 ກະບອກ, ໝາກແຕກຍາວ 1 ໜ່ວຍ, ໝາກແຕກລູກຈ້ອງ 1 ໜ່ວຍ, ໝາກແຕກປິ່ງປ່ອງ 1 ໜ່ວຍ, ມີບັ້ງຜຸນ້ອຍ, ບັ້ງກະໂພກນ້ອຍ, ທາດແຕກ ແລະ ປືນປະດິດອື່ນໆອີກຈຳນວນໜຶ່ງ. ພ້ອມດຽວກັນນີ້, ກໍ່ໄດ້ມີພິທີມອບ – ຮັບອາວຸດ ແລະ ທາດແຕກດັ່ງກ່າວ ເພື່ອເກັບມ້ຽນ ແລະ ທຳລາຍໃນຕໍ່ໜ້າ.

ກ່າວມອບໂດຍ ທ່ານ ພັຕ ດາວສະເດັດ ຮອງຫົວໜ້າກອງບັນຊາການ ປກສ ເມືອງໄກສອນ ພົມວິຫານ ແລະ ກ່າວຮັບໂດຍ ທ່ານ ພັຕ ສີຫາລາດ ວໍລະທຳນຽມ ຮອງຫົວໜ້າຫ້ອງຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ປກສ ແຂວງສະຫວັນນະເຂດ.

%d bloggers like this: