ທ່ານ ຮອງນາຍົກ ເຄື່ອນໄຫວຊຸກຍູ້ວຽກງານເກັບລາຍຮັບຢູ່ແຂວງອຸດົມໄຊ

ໃນທ້າຍອາທິດຜ່ານມາ, ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ພ້ອມດ້ວຍຄະນະໄດ້ໄປເຄື່ອນໄຫວເຮັດວຽກຊຸກຍູ້ການເກັບລາຍຮັບເຂົ້າງົບປະມານແຫ່ງລັດຢູ່ແຂວງອຸດົມໄຊ,ໂດຍໃຫ້ການຕ້ອນຮັບຂອງທ່ານ ຄຳພຽງ ຢາຈົງວາ ຮອງເຈົ້າແຂວງອຸດົມໄຊ, ມີທ່ານ ສົມຈິດ ປັນຍາສັກ ຮອງເຈົ້າແຂວງອຸດົມໄຊ ທັງເປັນຫົວໜ້າພະແນກການເງິນແຂວງ, ມີຄະນະປະຈໍາພັກແຂວງ, ເຈົ້າເມືອງ, ພະແນກການ ແລະ ພະນັກງານຫລັກແຫລ່ງຂອງແຂວງໃຫ້ການຕ້ອນຮັບ.

ໃນໂອກາດນີ້, ທ່ານ ສົມຈິດ ປັນຍາສັກ ໄດ້ລາຍງານໂດຍສັງເຂບສະພາບພະນັກງານ-ລັດຖະ ກອນຂອງຂະແໜງການເງິນ, ການຈັດຕັ້ງປະຕິບັດແຜນງົບປະມານປະຈຳປີ 2017 ແລະ ທິດທາງແຜນການປະຈຳປີ 2018 ວ່າ: ພະແນກການເງິນແຂວງປະກອບມີ 5 ຂະແໜງຂຶ້ນກັບຄື: ຂະແໜງຈັດຕັ້ງ ແລະ ບໍລິຫານ, ຂະແໜງງົບປະມານຂະແໜງບັນຊີ, ຂະແໜງກວດກາ, ຂະແໜງຄຸ້ມຄອງຊັບສິນຂອງລັດ ແລະ ຫ້ອງການການເງິນ 7 ເມືອງ, ພ້ອມນັ້ນຍັງມີ 3 ຂະແໜງການສາຍຕັ້ງມີພະນັກງານລັດຖະກອນລວມທັງໝົດ 298 ຄົນ, ຍິງ 85 ຄົນ, ຂັ້ນແຂວງ ຈໍານວນ 114 ຄົນ, ຍິງ 42 ຄົນ.

ວຽກງານຄຸ້ມຄອງພະນັກງານ-ລັດຖະກອນ ໄດ້ຊີ້ນໍາ-ນໍາພາພະນັກງານ-ລັດຖະກອນມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດດີ, ມີຄວາມຈົງຮັກພັກດີຕໍ່ແນວທາງຂອງພັກ, ຕໍ່ອຸດົມການ, ເຮັດສໍາເລັດໜ້າທີ່ວິຊາສະເພາະຕາມການມອບໝາຍປະຕິບັດລະບຽບກົດໝາຍເຂັ້ມງວດ, ມີແບບແຜນວິທີເຮັດວຽກປະຕິບັດຫລັກການລວມສູນປະຊາທິປະໄຕ, ເຮັດວຽກເປັນໝູ່ຄະນະບຸກຄົນຮັບຜິດຊອບ, ແບ່ງວຽກ, ແບ່ງງານໃຫ້ໝູ່ຄະນະຢ່າງຈະແຈ້ງ; ມີຄວາມສາມັກຄີແໜ້ນແຟ້ນ, ຕ້ານແນວຄິດກໍ່ພັກແຍກພວກ, ຈຸ້ມເຈື້ອເຊື້ອສາຍ, ແນວຄິດອາດຍາສິດ, ໄດ້ມີການຕິດຕາມ, ຊຸກຍູ້, ກວດກາການປະຕິບັດໜ້າທີ່ວຽກງານຂອງພະນັກງານ-ລັດຖະກອນ ແລະ ບັນຈຸຊັບຊ້ອນໃຫ້ຖືກຕ້ອງຕາມຄວາມຮູ້, ຄວາມສາມາດຕົວຈິງຂອງແຕ່ລະຄົນ.

ການຈັດຕັ້ງປະຕິບັດແຜນເກັບລາຍພາຍໃນ (ແຜນດັດແກ້) ປະຈໍາປີ 2017 ທັງໝົດ 108 ຕື້ກວ່າກີບ, ແຕ່ຜ່ານການຈັດຕັ້ງປະຕິບັດຕົວຈິງສາມາດປະຕິບັດໄດ້ 99 ຕື້ກວ່າກີບ, ທຽບໃສ່ແຜນການປີເທົ່າກັບ 92%, ທຽບໃສ່ໄລຍະດຽວກັນເພີ່ມຂຶ້ນ 0,7% ໃນນັ້ນ: ລາຍຮັບສ່ວຍສາອາກອນ 93 ຕື້ວ່າກີບ, ອາກອນປົກກະຕິ 72 ຕື້ກວ່າກີບ, ພາສີທີ່ດິນ 4 ຕື້ກວ່າກີບ, ຄ່າທໍານຽມ 2,6 ຕື້ກວ່າກີບ, ຄ່າບໍລິການ 13,9 ຕື້ກວ່າກີບ, ຄຸ້ມຄອງຊັບສິນຂອງລັດ 6,4 ຕື້ກວ່າກີບ, ຄຸ້ມຄອງລັດວິສາຫະກິດ 7,3 ລ້ານກີບ, ສ່ວນລາຍຮັບລາຍຮັບພູດສູນກາງຕົວເລກແຜນການຈັດເກັບລາຍຮັບ (ພາສີ) 9,2 ຕື້ກວ່າກີບ, ຜ່ານການຈັດຕັ້ງປະຕິບັດຕົວຈິງໄດ້ທັງໝົດ 19,7 ຕື້ກວ່າກີບທຽບແຜນປີ ເທົ່າກັບ 191%.

ສຳລັບປີ 2018 ແຂວງອຸດົມໄຊຈະຕ້ອງໄດ້ສູ້ຊົນຈັດເກັບລາຍຮັບເຂົ້າງົບປະມານໃຫ້ໄດ້ທັງໝົດ 131 ຕື້ກວ່າກີບທຽບໃສ່ແຜນດັດແກ້ປີ 2017 ເພີ່ມຂຶ້ນ 21% ໃນນີ້: ລາຍຮັບພາຍໃນມີ 116 ຕື້ກວ່າກີບ, ຊຶ່ງລາຍຮັບແມ່ນມາຈາກຂະ ແໜງສ່ວຍສາອາກອນ, ຄ່າທໍານຽມ, ຄ່າບໍລິການວິຊາການ, ລາຍຮັບທີ່ດິນ, ລາຍຮັບຄຸ້ມຄອງຊັບສິນຂອງລັດ ແລະ ລາຍຮັບຄຸ້ມຄອງລັດວິສາຫະກິດ, ສ່ວນລາຍຮັບພູດຂອງສູນກາງມີທັງໝົດ 14 ຕື້ກວ່າກີບ, ທຽບໃສ່ແຜນປີຜ່ານມາເພີ່ມຂຶ້ນ 58% ໃນນີ້: ກອງກວດກາພາສີປະຈໍາແຂວງ 1,8 ຕື້ກວ່າກີບ, ດ່ານທ້ອງຖິ່ນ 12,6 ຕື້ກວ່າກີບ.

ໂອກາດນີ້, ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ໄດ້ສະແດງຄວາມຂອບໃຈຕໍ່ຄະນະພັກ, ຄະນະນຳແຂວງ, ການປົກຄອງທ້ອງຖິ່ນທີ່ໄດ້ໃຫ້ການຕ້ອນຮັບຢ່າງອົບອຸ່ນ, ພ້ອມກັນນີ້, ທ່ານ ຮອງນາຍົກຍັງໄດ້ເນັ້ນຫລາຍບັນຫາໃຫ້ຂະແໜງການເງິນແຂວງ

ອຸດົມໄຊ ເອົາໃຈໃສ່ໃນການຈັດຕັ້ງປະຕິບັດວຽກງານວິຊາສະເພາະເປັນຕົ້ນ:ວຽກງານສຶກສາອົບຮົມການເມືອງແນວຄິດຂອງອ້າຍນ້ອງພະນັກງານ-ທຸກຂັ້ນຈົ່ງມີແນວຄິດອຸນອ່ຽນທຸ່ນທ່ຽງ, ຕັ້ງໜ້າຈັດຕັ້ງປະຕິບັດວຽກງານວິຊາສະເພາະທີ່ຕົນເອງຮັບຜິດຊອບຢ່າງເຂັ້ມງວດ, ຊຸກຍູ້ວຽກງານປັບປຸງການຈັດຕັ້ງຂອງຂະແໜງການເງິນໃຫ້ສຳເລັດໂດຍໄວເປັນຕົ້ນແມ່ນ: ຂັ້ນແຂວງ, ຂັ້ນເມືອງ, ການປະຕິບັດໜ້າທີ່ວິຊາສະເພາະໃຫ້ເຂັ້ມງວດ ແລະ ມີບາດກ້າວໃໝ່ ໂດຍຕອບສະໜອງໄດ້ກັບຄວາມຮຽກຮ້ອງຕ້ອງຂອງການພັດທະນາເສດຖະກິດ-ສັງຄົມ, ກວດກາໄລ່ລຽງຄືນການຈັດຕັ້ງປະຕິ ບັດແຜນລາຍຮັບ-ລາຍຈ່າຍປີ 2017 ຜ່ານມາ, ຮັບປະກັນການຈັດເກັບລາຍຮັບແຜນງົບປະມານປີ 2018 ໃຫ້ບັນລຸຕາມເປົ້າ ໝາຍທີ່ວາງໄວ້, ຂຸດຄົ້ນທ່າແຮງອັນບົ່ມຊ້ອນຂອງແຂວງ ແລະ ຊຸກຍຸ້ການເກັບລາຍຮັບລາຍຈາກພາສີທີດິນ, ຖານລາຍຮັບທຸລະກິດຂອງແຂວງພ້ອມທັງຍົກຖານລາຍຮັບຫົວໜ່ວຍທຸລະກິດທີ່ມີລາຍຮັບ 400 ລ້ານກີບຂຶ້ນໄປຕ້ອງເຂົ້າຢູ່ໃນລະບົບອາກອນມູນຄ່າເພີ່ມ, ຊຸກຍູ້ຂະບວນການເສຍຄ່າທຳນຽມທາງປະຈຳປີ, ເນັ້ນຂະແໜງການບໍລິການເພື່ອສ້າງລາຍຮັບເຂົ້າງົບປະມານ, ເຂັ້ມງວດການປະຕິບັດຄຳສັ່ງເລກທີ 40/ນຍ,ຫັນການຄຸ້ມຄອງລາຍຮັບ-ລາຍຈ່າຍໄປສູ່ລະບົບທັນສະໄໝ ແລະ ປະຕິບັດ 10 ຂໍ້ຫ້າມ ແລະ ວິໄນຂອງພະນັກງານ-ລັດຖະກອນຂະແໜງການເງິນໃຫ້ເຂັ້ມງວດ, ແກ້ໄຂບັນຫາປະກົດການຫຍໍ້ຕ່າງໆຂອງຂະແໜງການເງິນ ແລະ ສືບຕໍ່ຊອກຫາທ່າແຮງບົ່ມຊ້ອນຂອງແຕ່ລະທ້ອງຖິ່ນເພື່ອຈັດເກັບລາຍຮັບເຂົ້າງົບປະມານໃຫ້ນັບມື້ເພີ່ມຂຶ້ນ.

ຂ່າວ-ພາບ: ກະຊວງການເງິນ

%d bloggers like this: