ທາງຫຼາຍເສັ້ນໃນນະຄອນຫຼວງຢຸດການກໍ່ສ້າງຊົ່ວຄາວ - Laoedaily

ທາງຫຼາຍເສັ້ນໃນນະຄອນຫຼວງຢຸດການກໍ່ສ້າງຊົ່ວຄາວ

ນະຄອນຫຼວງວຽງຈັນ ໄດ້ມີການອະນຸມັດກໍ່ສ້າງເສັ້ນທາງຫຼາຍກວ່າ 10 ແຫ່ງ ນັບແຕ່ປີ 2011 ເປັນຕົ້ນມາ ເພື່ອເປັນການຍົກລະດັບພື້ນຖານໂຄງລ່າງໃຫ້ມີຄວາມສະດວກສະບາຍ ສາມາດເຊື່ອມຈອດກັບເສັ້ນທາງໃຫຍ່ຫຼາຍເສັ້ນ ໂດຍມີທັງບໍລິສັດພາຍໃນ ແລະ ຕ່າງປະເທດເຂົ້າມາຮັບເໝົາກໍ່ສ້າງ ແຕ່ຍ້ອນສະພາບເສດຖະກິດໂລກມີການປ່ຽນແປງເຮັດໃຫ້ຫຼາຍບໍລິສັດພົບບັນຫາທາງການເງິນຕ້ອງໄດ້ຢຸດ ຫຼື ໂຈະກໍ່ສ້າງຊົ່ວຄາວຕາມເງື່ອນໄຂ ແລະ ຄວາມຈຳເປັນ.
ສ່ວນເສັ້ນທາງນັບແຕ່ວົງວຽນຈີ່ນາຍໂມ້ – ບໍ່ໂອ – ຊາຍຟອງ ເມືອງຫາດຊາຍຟອງ ນະຄອນຫຼວງວຽງຈັນ ເປັນໜຶ່ງໃນເສັ້ນທາງທີ່ປະຊາຊົນຮຽກຮ້ອງໃຫ້ກໍ່ສ້າງໂດຍໄວ ລະດູແລ້ງເຕັມໄປດ້ວຍຂີ້ຝຸ່ນ ສ່ວນລະດູຝົນມີນ້ຳຖ້ວມຂັງ ພາຍຫຼັງທີ່ໄດ້ຢຸດມາໃນໄລຍະໜຶ່ງແລ້ວໄດ້ຮັບຂ່າວດີວ່າບໍລິສັດຈະເລີ່ມສືບຕໍ່ລົງມືກໍ່ສ້າງໃນໄວໆນີ້ ຄາດວ່າຈະໃຊ້ເວລາປະມານ 1 ປີກໍຈະສໍາເລັດ ສໍາລັບເສັ້ນທາງທີ່ເຫຼືອທີ່ນອນໃນບັນຊີຢຸດກໍ່ສ້າງຊົ່ວຄາວແມ່ນຍັງບໍ່ທັນມີການລາຍງານລະອຽດຈາກພາກສ່ວນກ່ຽວຂ້ອງເທື່ອ.

ຂະແໜງຂົວທາງ, ພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ລາຍງານໃນວັນທີ 31 ມັງກອນ 2019 ຜ່ານມາ ໃຫ້ຮູ້ວ່າ: ບັນດາໂຄງການລົງທຶນກ່ອນທີ່ໄດ້ມີການຢຸດຈັດຕັ້ງປະຕິບັດຊົ່ວຄາວໃນນະຄອນຫຼວງວຽງຈັນ ໃນປີ 2019 ປະກອບມີ 5 ເສັ້ນທາງລວມຄວາມຍາວ 62,64 ກິໂລແມັດມູນຄ່າ 924 ຕື້ກວ່າກີບ ຄື: ເສັ້ນທາງທີ 1 ສາມແຍກດອນນົກຂຸ້ມ – ສ້າງເຫວີຍ – ຈອມເພັດ 4,8 ກິໂລແມັດ ປູເບຕົງ ມູນຄ່າລົງທຶນ 88,9 ຕື້ກວ່າກີບ ແລະ ສວນມອນ – ສ້າງເຫວີຍ – ດົງສະຫວາດ 2,9 ກິໂລແມັດ ເບຕົງ ມູນຄ່າ 56 ຕື້ກວ່າກີບ ກໍ່ສ້າງມາແຕ່ປີ 2011 ສ້າງສໍາເລັດແລ້ວ 62%; ເສັ້ນທີ 2 ເສັ້ນທາງກິໂລແມັດ 22 – ບ້ານຫົວຊຽງ – ທາງ 450 ປີ ຍາວ 19 ກິໂລແມັດ ປູດ້ວຍເບຕົງ ມູນຄ່າ 524 ຕື້ກວ່າກີບ ສ້າງມາແຕ່ທ້າຍປີ 2012 ສຳເລັດ 56%; ເສັ້ນທີ 3 ໜອງໜ້ຽວ – ບ້ານຈັດສັນ – ໜອງແຕ່ງ 7,7 ກິໂລແມັດ ປູຢາງ 2 ຊັ້ນ ສ້າງແຕ່ປີ 2012 ມູນຄ່າ 33 ຕື້ກວ່າກີບ ສໍາເລັດ 33%; ເສັ້ນທີ 4 ເສັ້ນທາງ T5 ( ໄລຍະ 1 ) 3 ກິໂລແມັດ ເບຕົງ ສ້າງມາແຕ່ປີ 2013 ມູນຄ່າ 66 ຕື້ກວ່າກີບ ສໍາເລັດ 25%, ເສັ້ນທາງ T5 ( ໄລຍະ 2 ) 2,2 ກິໂລແມັດ ເບຕົງ ສ້າງມາແຕ່ປີ 2011 ມູນຄ່າ 48,6 ຕື້ກີບ ສໍາເລັດພຽງແຕ່ 8% ແລະ ເສັ້ນທາງທີ 5 ເພຍລາດ – ເຕົາໄຫ – ຊາຍແດນແຂວງວຽງຈັນ ທີ່ມີຄວາມຍາວຫຼາຍກວ່າໝູ່ 22,7 ກິໂລແມັດ ເບຕົງ ສ້າງມາແຕ່ 2012 ມູນຄ່າ 105 ຕື້ກວ່າກີບ ສໍາເລັດແລ້ວ 52% ປັດໄຈທີ່ເຮັດໃຫ້ໂຄງການຢຸດຊົ່ວຄາວມີ 2 ຢ່າງ ຄື: ບໍລິສັດ ມີບັນຫາທາງດ້ານການເງິນ ( ທະນາຄານບໍ່ປ່ອຍເງິນໃຫ້ກູ້ຢືມ ) ແລະ ການໄກ່ເກ່ຍກັບສິ່ງກີດຂວາງບໍ່ລົງຮອຍກໍບໍ່ສາມາດຕົກລົງກັນໄດ້ ບາງເສັ້ນທາງໃຊ້ເວລາ 2 ປີກວ່າຍັງໄກ່ເກ່ຍບໍ່ສຳເລັດ.

ເສັ້ນທາງທີ່ກໍ່ສ້າງບໍ່ສຳເລັດແນ່ນອນບັນຫາຕາມມາຄືຜູ້ທີ່ຢູ່ອາໄສບໍລິເວນໃກ້ຄຽງຈະໄປຍາກມາຍາກ, ມີຂີ້ຝຸ່ນລົບກວນ ເຊັ່ນ: ສີ່ແຍກທາງຕັດໃໝ່ລະຫວ່າງດອນນົກຂຸ້ມ – ດອນກອຍ ແມ່ນພົບກັບບັນຫາລົດຕິດໃນຊົ່ວໂມງເລັ່ງດ່ວນແຕ່ລະວັນຍ້ອນບໍ່ສາມາດຕິດຕັ້ງໄຟອຳນາດໄດ້ຕ້ອງໄດ້ມີເຈົ້າໜ້າທີ່ຈະລາຈອນມາຊ່ວຍລະບາຍໄລຍະກ່ອນເຂົ້າ ແລະ ຫຼັງເລີກວຽກ.

ສຳລັບເສັ້ນທາງນັບແຕ່ວົງວຽນຈີ່ນາຍໂມ້ – ບໍ່ໂອ – ຊາຍຟອງ ເມືອງຫາດຊາຍຟອງ ທີ່ຢຸດກໍ່ສ້າງຊົ່ວຄາວມາແຕ່ກາງປີ 2017 ຫຼ້າສຸດບໍລິສັດໄດ້ກັບມາເຈລະຈາກັບຫົວໜ້າຄຸ້ມຄອງໂຄງການ ແລະ ເຫັນດີຈະສືບຕໍ່ກໍ່ສ້າງທັນທີ ເພາະເສັ້ນທາງດັ່ງກ່າວໜ້າວຽກສ່ວນໃຫຍ່ສຳເລັດແລ້ວ ເຊັ່ນ: ວຽກຂຸດຮ່ອງລະບາຍນ້ຳ, ປູທາງໄດ້ເຄິ່ງໜຶ່ງ ຄາດວ່າພາຍໃນປີ 2019 ປະຊາຊົນທີ່ອາໄສຢູ່ລຽບຕາມແຄມຂອງ ນັບແຕ່ຈີ່ນາຍໂມ້ລົງໄປຈົນເຖິງບ້ານຊາຍຟອງ ມີປະມານ 10 ກວ່າບ້ານ ຈະ ໄປ – ມາສະດວກສົມກັບການຄອງຄອຍມາຍາວນານ.

ຂ່າວ: ສຸລິນ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ