ຍທຂ ນະຄອນຫຼວງ ສຳເລັດການຂະຫຍາຍທໍ່ຮັບນໍ້າ ແກ້ໄຂບັນຫານໍ້າຖ້ວມຂັງຈຸດໄຟແດງທາດຫຼວງ

ຫຼາຍປີຜ່ານມາ ຈຸດໄຟອຳນາດ 4 ແຍກທາດຫຼວງ, ຕໍ່ໜ້າໄອເຕັກ ແລະ ໄຟອຳນາດສາມແຍກໂພນປ່າເປົ້າ ຖະໜົນກຳແພງເມືອງ ນະຄອນຫຼວງວຽງຈັນ ໄດ້ພົບກັບບັນຫານ້ຳຖ້ວມເມື່ອມີຝົນຕົກລິນຫຼາຍຊົ່ວໂມງ ເຮັດໃຫ້ນ້ຳບໍລິເວນເຂດດັ່ງກ່າວໄຫຼບໍ່ທັນ ສົ່ງຜົນໃຫ້ລົດນ້ອຍປະເພດລົດເກັ໋ງ ແລະ ລົດຈັກໄປຍາກມາຍາກ.

ຕໍ່ບັນຫາດັ່ງກ່າວພະແນກໂຍທາທິການ ແລະ ຂົນສົ່ງ ( ຍທຂ ) ນະຄອນຫຼວງວຽງຈັນ ໄດ້ໃຊ້ງົບປະມານຈຳນວນໜຶ່ງທີ່ນອນໃນໂຄງການປັບປຸງ ແລະ ສ້ອມແປງເສັ້ນທາງຂອງ ຍທຂ ນະຄອນຫຼວງວຽງຈັນ ມາຂະຫຍາຍຮ່ອງລະບາຍນ້ຳ ແລະ ຮູຮັບທໍ່ນ້ຳໃຫ້ກວ້າງຕື່ມ ເພື່ອຮອງຮັບນ້ຳຈຳນວນຫຼາຍໃນເວລາຝົນຕົກລົງມາຫຼາຍຊົ່ວໂມງ.

ທ່ານ ທະວີໄຊ ໄຊປະເສີດ ຫົວໜ້າຫ້ອງການໂຍທາທິການ ແລະ ຂົນສົ່ງ ເມືອງໄຊເຊດຖາ ນະຄອນຫຼວງວຽງຈັນ ໃຫ້ສຳພາດວ່າ: ຖະໜົນກຳແພງເມືອງ ຫຼື T4 ເປັນຕົ້ນແມ່ນ: ຈຸດ 4 ແຍກໄຟອຳນາດທາດຫຼວງ, ໄຟອຳນາດຕິດກັບເຂດເສດຖະກິດພິເສດບຶງທາດຫຼວງ ແລະ ໄຟອຳນາດ 3 ແຍກໂພນປ່າເປົ້າ ມັກຈະພົບກັບນ້ຳຖ້ວມເມື່ອເວລາຝົນຕົກແຮງ ເນື່ອງຈາກນ້ຳໄຫຼລົງໄປຫາທໍ່ລະບາຍນ້ຳບໍ່ທັນສ້າງຄວາມລຳບາກພໍສົມຄວນໃຫ້ກັບຜູ້ໃຊ້ລົດໃຊ້ຖະໜົນ ເພື່ອແກ້ໄຂບັນຫາໄລຍະຍາວ ຫ້ອງການ ຍທຂ ເມືອງໄຊເຊດຖາ ໄດ້ຂໍງົບປະມານຈາກພະແນກ ຍທຂ ຈຳນວນໜຶ່ງເພື່ອມາຂະຫຍາຍຮູຮັບທໍ່ນ້ຳຢູ່ສົ້ນກົມມະລຽນທາດຫຼວງໃຫ້ໃຫຍ່ຕື່ມ ຮອງຮັບນ້ຳທີ່ໄຫຼມາຈາກເດີ່ນຕໍ່ໜ້າສະພາ ແລະ ເດີ່ນທາດຫຼວງບໍ່ໃຫ້ລົ້ນເຫຼືອລົງມາ 4 ແຍກທາດຫຼວງ; ສ່ວນທໍ່ລະບາຍນ້ຳກໍ່ຂະຫຍາຍອອກ ແລະ ຈະມີການແຕ່ງຕັ້ງກັນອະນາໄມ.

ທ່ານກ່າວຕື່ມວ່າ: ຈາກການປັບປຸງດັ່ງກ່າວໄລຍະທີ່ມີຝົນຕົກລົງມາຫຼາຍຊົ່ວໂມງໃນຕົ້ນເດືອນພຶດສະພາຜ່ານມາ ປະກົດວ່າບໍ່ມີນ້ຳອັ່ງອໍຄືກັບທຸກຄັ້ງຜ່ານມານ້ຳມີການໄຫຼລົງທໍ່ລະບາຍນ້ຳຢ່າງສະດວກແລ້ວອອກໄປສູ່ບຶງທາດຫຼວງເປັນປົກກະຕິ ແຕ່ສິ່ງທີ່ຈະຕ້ອງໄດ້ເອົາໃຈໃສ່ຮ່ວມກັນກໍ່ຄືປົກປັກຮັກສາ ໂດຍສະເພາະແມ່ນປະຊາຊົນທີ່ຢູ່ຕາມສອງຟາກທາງຈົ່ງພາກັນເກັບມ້ຽນ ແລະ ມີສະຕິໃນການຖິ້ມຂີ້ເຫຍື້ອ ເຊັ່ນ: ຖົງຢາງ, ເສດຜ້າ ແລະ ອື່ນໆ ທີ່ຈະໄປຕັນຮູເຮັດໃຫ້ນ້ຳໄຫຼລົງທໍ່ໄດ້ບໍ່ສະດວກ. ສະນັ້ນ, ເຈົ້າຂອງເຮືອນຈະຊ່ວຍແບ່ງເບົາວຽກງານຂອງໜ່ວຍງານໄດ້ດີອີກແຮງ.

ໄຊເຊດຖາ ເປັນເມືອງທີ່ກວມເອົາບຶງທາດຫຼວງຫຼາຍທີ່ສຸດ ໜຶ່ງໃນ 4 ເມືອງໃນຂອງນະຄອນຫຼວງວຽງຈັນ ທີ່ມີຄວາມໜາແໜ້ນ, ລັກສະນະພູມສັນຖານເປັນຄ້ອຍງ່ຽງ ນ້ຳສ່ວນໃຫຍ່ໃນນະຄອນຫຼວງຈະໄຫຼລົງສູ່ບຶງທາດຫຼວງໂດຍຜ່ານຮ່ອມ, ຜ່ານເສັ້ນທາງນ້ອຍ – ໃຫຍ່ຕ່າງໆ ບັນຫານ້ຳຖ້ວມໃນເວລາຝົນຕົກລົງມາເປັນທີ່ວິພາກວິຈານກັນຫຼາຍພໍສົມຄວນໃນໄລຍະຜ່ານມາ ໂດຍສະເພາະແມ່ນໃນສື່ອອນລາຍຕົກມາປີນີ້ຈຶ່ງໄດ້ມີການແກ້ໄຂໂດຍການຂະຫຍາຍຮູຮັບນ້ຳ ແລະ ທໍ່ລະບາຍນ້ຳ ລະດູຝົນທີ່ມາເຖິງນີ້ຈະເປັນເຄື່ອງພິສູດວ່າຈະໄດ້ຜົນໜ້ອຍຫຼາຍປານໃດ ຫາກຍັງມີນ້ຳຖ້ວມຂັງອີກກໍ່ຕ້ອງໄດ້ຊອກຫາສາເຫດເພື່ອແກ້ໄຂຕໍ່ໄປ.

%d bloggers like this: