ຈີນ ສະເໜີໃຫ້ລາວປັບປຸງສິ່ງອຳນວຍຄວາມສະດວກດ້ານການທ່ອງທ່ຽວ

ທ່ານ Xi Dongguang ຫົວໜ້າຄະນະກຳມາທິການທ່ອງທ່ຽວ Heiliang Jiang ໄດ້ສະເໜີຕໍ່ກັບປະເທດລາວ ໃນເວທີສົນທະນາການຮ່ວມມືດ້ານການທ່ອງທ່ຽວ   ລາວ – ຈີນ ໃນວັນທີ 15 ພຶດສະພາ 2018 ທີ່ໂຮງແຮມ ແລນມາກ ວ່າ: ປະເທດລາວມີ 2 ສິ່ງທີ່ນັກທ່ອງທ່ຽວຈີນໃຫ້ຄວາມສົນໃຈເປັນພິເສດ ຄື: ວັດທະນະທຳ, ຮີດຄອງປະເພນີອັນດີງາມຂອງລາວ ເຊັ່ນ: ເມືອງຫຼວງພະບາງທີ່ມີວັດວາອາຮາມທີ່ເກົ່າແກ່ຢ່າງຫຼວງຫຼາຍ ຈົນໄດ້ຮັບເລືອກໃຫ້ເປັນເມືອງມໍລະດົກໂລກ ແລະ ທິວທັດທຳມະຊາດທີ່ສວຍສົດງົດງາມຂອງປະເທດລາວ ບໍ່ວ່າຈະເປັນພູຜາປ່າໄມ້, ນ້ຳຕົກຕາດ ແລະ ອື່ນໆ ເຊິ່ງສິ່ງເຫຼົ່ານີ້ລ້ວນແຕ່ເປັນສິ່ງທີ່ດຶງດູດໃຈໃຫ້ກັບນັກທ່ອງທ່ຽວຈີນເປັນຢ່າງດີ.

ຈາກການທີ່ນັກທ່ອງທ່ຽວຈີນໄດ້ມາທ່ຽວທີ່ປະເທດລາວໃນໄລຍະຜ່ານມາແມ່ນຍັງບໍ່ທັນໄດ້ຮັບສິ່ງທີ່ອຳນວຍ  ຄວາມສະດວກເທົ່າທີ່ຄວນ. ສະນັ້ນ, ຈຶ່ງຢາກສະເໜີໃຫ້ທາງປະເທດລາວ ແລະ ຈີນໄດ້ມີການພັດທະນາຜະລິດຕະພັນການທ່ອງທ່ຽວຮ່ວມກັນ ໂດຍອີງໃສ່ທັດສະນະຂອງນັກທ່ອງທ່ຽວ ບໍ່ວ່າຈະເປັນການທ່ອງທ່ຽວທາງວັດທະນະທຳ, ທຳມະຊາດ ແລະ ການທ່ອງທ່ຽວໃນລັກສະນະພັກຜ່ອນຢ່ອນໃຈ, ຄວນມີການເພີ່ມທະວີໃນການໂຄສະນາໃຫ້ຫຼາຍຂຶ້ນຕື່ມ ໂດຍເອົາຜູ້ນຳທ່ຽວຈີນມາສຳຫຼວດເສັ້ນທາງການທ່ອງທ່ຽວຢູ່ລາວ ແລະ ລາວໄປໂຄສະນາທີ່ປະເທດຈີນໃຫ້ຫຼາຍຂຶ້ນໃນຮູບແບບການຈັດງານທ່ອງທ່ຽວຮ່ວມກັນ.

ຄວນມີການຍົກສູງຄຸນນະພາບດ້ານການທ່ອງທ່ຽວຂຶ້ນຕື່ມ ບໍ່ວ່າຈະເປັນການເພີ່ມຖ້ຽວບິນລະຫວ່າງຈີນມາຫາລາວໃຫ້ຫຼາຍຂຶ້ນ, ເພີ່ມຮ້ານອາຫານຈີນຢູ່ລາວຂຶ້ນອີກ ໂດຍການສ້າງລົດຊາດທີ່ເປັນເອກະລັກຂອງລາວ ເພື່ອໃຫ້ນັກທ່ອງທ່ຽວຈີນມີຄວາມຮູ້ສຶກປະທັບໃຈ, ສ້າງຜູ້ນຳທ່ຽວທີ່ໄດ້ພາສາຈີນໃຫ້ຫຼາຍຂຶ້ນ ເພື່ອສະດວກໃນການສື່ສານ, ຄວນມີການຕິດປ້າຍທີ່ເປັນພາສາຈີນຕາມສະຖານທີ່ທ່ອງທ່ຽວຕ່າງໆ ເພື່ອເຮັດໃຫ້ນັກທ່ອງທ່ຽວຮູ້ສຶກສະດວກ, ອົບອຸ່ນ ແລະ ປອດໄພ ເພີ່ມທະວີໃນການສ້າງຄຸນນະພາບ, ມາດຕະຖານຂອງໂຮງແຮມ ແລະ ສ້າງເຄື່ອງທີ່ລະນຶກທີ່ເໝາະສົມສຳລັບຄົນຈີນໃຫ້ຫຼາຍຂຶ້ນອີກ.

 

%d bloggers like this: