ຈີນ ຍື່ນຟ້ອງອົງການໆຄ້າໂລກ ກໍລະນີອາເມຣິກາຂຶ້ນພາສີ

ກະຊວງອຸດສາຫະກໍາ ແລະ ການຄ້າ ສປ ຈີນ ແຈ້ງການວ່າ: ຈີນ ໄດ້ຍື່ນຟ້ອງຕໍ່ອົງການໆຄ້າໂລກ ກໍລະນີທີ່ອາເມຣິກາ ປະກາດຂຶ້ນພາສີນໍາເຂົ້າສິນຄ້າຈາກຈີນ ຈໍານວນ 1.300 ລາຍການ ຄິດເປັນຈໍານວນເງິນ 50 ພັນລ້ານໂດລາສະຫະລັດ.

ກ່ອນໜ້ານີ້, ທ່ານ ຈາງ ຊຽງເສິນ ເອກອັກຄະລັດຖະທູດ ສປ ຈີນ ປະຈໍາອົງການໆຄ້າໂລກ ຫຼື ດັບເບິລຢູທີໂອ ກ່າວວ່າ: ການທີ່ອາເມຣິກາດໍາເນີນການສືບສວນພຶດຕິກໍາການຄ້າຂອງຈີນ ມາດຕາ 301 ນັ້ນ ຖືເປັນການລະເມີດຫຼັກການພື້ນຖານຂອງອົງການດັ່ງກ່່າວທີ່ວ່າດ້ວຍການຫ້າມເລືອກປະຕິບັດ ແລະ ຂຶ້ນພາສີສິນຄ້າ.

ການສະແດງຄວາມເຫັນຂອງ ທ່ານ ຈາງ ເກີດຂຶ້ນຫຼັງຈາກສໍານັກງານຜູ້ແທນສະພາການຄ້າອາເມຣິກາ ເຜີຍແຜ່ລາຍການສິນຄ້າຂອງຈີນ ຈໍານວນ 1.300 ລາຍການ ທີ່ຈະຖືກເກັບພາສີນໍາເຂົ້າໃນອັດຕາ 25% ຄິດເປັນຈໍານວນເງິນທັງໝົດ 50 ພັນລ້ານໂດລາສະຫະລັດ.

ດ້ານ ທ່ານ ຊຸຍ ຖຽນໄຄ ເອກອັກຄະລັດຖະທູດ ສປ ຈີນ ປະຈໍາອາເມຣິກາ ກ່າວວ່າ: ຈີນ ຈະຍື່ນຄໍາຮ້ອງຕໍ່ອົງການໆຄ້າໂລກ ເພື່ອຟ້ອງກໍລະນີທີ່ອາເມຣິກາ ປະກາດຂຶ້ນພາສີນໍາເຂົ້າສິນຄ້າຈາກຈີນ ຈໍານວນ 1.300 ລາຍການ.

ສໍານັກງານຜູ້ແທນສະພາການຄ້າອາເມຣິກາ ໃຫ້ຮູ້ວ່າ: ລາຍການສິນຄ້າຂອງຈີນທີ່ຈະຖືກຂຶ້ນພາສີນໍາເຂົ້າຄິດເປັນຈໍານວນເງິນ 50 ພັນລ້ານໂດລາສະຫະລັດ ໂດຍມີເປົ້າໝາຍທີ່ຈະກົດດັນຈີນຜ່ອນຄາຍກົດລະບຽບດ້ານການຄ້າ ແລະ ການລົງທຶນ.

%d bloggers like this: