ຈະລາຈອນນະຄອນຫຼວງ ວາງກຳລັງຕາມຈຸດສຳຄັນຫວັງຫຼຸດຜ່ອນອຸບັດເຫດໄລຍະປີໃໝ່

ຕໍາຫຼວດຈະລາຈອນ ນະຄອນຫຼວງວຽງຈັນ ຈະໃຊ້ກອງກຳລັງ 500 ກວ່າທ່ານ ປະຈຳທຸກຈຸດທີ່ມີປ້ອມຍາມທີ່ເຫັນວ່າມີຄວາມຈຳເປັນ, ບັນດາເສັ້ນທາງຫຼັກ ແລະ ຈະມີການແຕ່ງຕັ້ງເວນຍາມເຄື່ອນຍ້າຍຕາມເສັ້ນທາງຕ່າງໆທົ່ວນະຄອນຫຼວງວຽງຈັນ ເພື່ອລະບາຍລົດໃນໄລຍະປີໃໝ່ລາວ ແລະ ຊ່ວຍຫຼຸດຜ່ອນອຸບັດເຫດຕາມທ້ອງຖະໜົນໃຫ້ໜ້ອຍລົງ.

ທ່ານ ພັນໂທ ຢຸດຕະພົງ ສຸວັນນະສິງ ຫົວໜ້າພະແນກຕໍາຫຼວດຈະລາຈອນ ນະຄອນຫຼວງວຽງຈັນ ກ່າວເມື່ອບໍ່ດົນມານີ້ວ່າ: ເພື່ອເຮັດໃຫ້ການສະເຫຼີມສະຫຼອງບຸນປີໃໝ່ລາວ ພ.ສ 2561 ນັບແຕ່ວັນທີ 14 – 16 ເມສາ 2018 ທີ່ຈະມາເຖິງນີ້ໃຫ້ມີຄວາມສະຫງົບ, ຄວາມເປັນລະບຽບຮຽບຮ້ອຍຂອງສັງຄົມ. ສະນັ້ນ, ເຈົ້າໜ້າທີ່ຈະລາຈອນຈະລົງເຮັດວຽກປະຈໍາແຕ່ລະຈຸດປ້ອມສຳຄັນຕ່າງໆ, ສ່ວນດ່ານເຂົ້າ – ອອກປະເທດຕ້ອງໄດ້ເພີ່ມທະວີຄວາມຮັບຜິດຊອບຕໍ່ໜ້າທີ່ວຽກງານວິຊາສະເພາະໃຫ້ສູງ ເພື່ອອໍານວຍຄວາມສະດວກໃຫ້ແກ່ມວນຊົນທີ່ເຂົ້າມາທ່ອງທ່ຽວຢູ່ນະຄອນຫຼວງວຽງຈັນ ໃຫ້ມີ ຄວາມສະດວກ ແລະ ປອດໄພ ເພື່ອຮັບປະກັນບໍ່ໃຫ້ມີການຈະລາຈອນແອອັດຢູ່ແຕ່ລະເສັ້ນທາງ ໂດຍຈະເພີ່ມທະວີແກ້ໄຂ ແລະ ປະຕິບັດໜ້າທີ່ຢ່າງເຂັ້ມງວດຕາມມາດຕະການບັງຄັບໃຊ້ກົດໝາຍເຊັ່ນ: ການຄວບຄຸມຄວາມໄວ, ກວດກາທາດເຫຼົ້າ, ຕັ້ງຈຸດກວດກາ ແລະ ອອກເຄື່ອນໄຫວຕາມສາຍທາງເພື່ອກ່າວເຕືອນຜູ້ລະເມີດຕໍ່ຄໍາສັ່ງ ແລະ ແຈ້ງການຂອງເຈົ້າຄອງນະຄອນຫຼວງວຽງຈັນ ເພື່ອສະກັດກັ້ນບໍ່ໃຫ້ມີອຸບັດເຫດຢູ່ນະຄອນຫຼວງວຽງຈັນ.

ສະເພາະບັນຈຸກໍາລັງທີ່ຈະໃຊ້ເຂົ້າໃນວຽກງານປ້ອງກັນ ໃນໄລຍະບຸນປີໃໝ່ລາວ ພ.ສ 2561 ມີຈໍານວນ 599 ສະຫາຍ, ຍິງ 36 ສະຫາຍ. ໃນນັ້ນ, ເມືອງຈັນທະບູລີ 79 ສະຫາຍ, ສີສັດຕະນາກ 67 ສະຫາຍ, ສີໂຄດຕະບອງ 59 ສະຫາຍ, ຫາດຊາຍຟອງ 19 ສະຫາຍ, ໄຊເຊດຖາ 69 ສະຫາຍ, ປາກງື່ມ 14 ສະຫາຍ, ໄຊທານີ 52 ສະຫາຍ, ສັງທອງ 13 ສະຫາຍ ແລະ ນະຄອນຫຼວງວຽງຈັນ 207 ສະຫາຍ ແລະ ມີຈຸດປ້ອງກັນທັງໝົດ 32 ຈຸດ, ປ້ອມປະຈໍາມີ 48 ປ້ອມ, ຈຸດເຂົ້າ – ອອກເມືອງ 7 ຈຸດ. ນອກຈາກນີ້, ຍັງມີພາຫະນະຮັບໃຊ້ວຽກງານປ້ອງກັນດັ່ງກ່າວມີ: ລົດເກັ໋ງສະຫຼາມ 4 ຄັນ, ລົດລາກ 2 ຄັນ, ລົດຈັກ 15 ຄັນ ແລະ ລົດຮັບໃຊ້ວຽກປ້ອງກັນ 21 ຄັນ.

ປັດຈຸບັນອຸບັດເຫດທາງຫຼວງໃນ ສປປ ລາວ ກາຍເປັນໄພຄຸກຄາມອັນໃຫຍ່ຫຼວງ, ເປັນອຸປະສັກໃຫ້ແກ່ການພັດທະນາ ເສດຖະກິດ – ສັງຄົມ, ສ້າງຄວາມເສຍຫາຍທັງຊີວິດ ແລະ ຊັບສິນ ເຊິ່ງຕົວເລກຈາກກະຊວງໂຍທາທິການ ແລະ ຂົນສົ່ງຊີ້ໃຫ້ເຫັນວ່າ: ແຕ່ລະວັນມີຜູ້ເສຍຊີວິດຈາກອຸບັດເຫດໃນ ສປປ ລາວ ສະເລ່ຍ 3 ຄົນຕໍ່ວັນ ແລະ ມີຜູ້ໄດ້ຮັບບາດເຈັບເປັນຈຳນວນຫຼາຍ, ສະຖິຕິຊີ້ໃຫ້ເຫັນຕົວເລກການເກີດອຸບັດເຫດໃນປີ 2015 ມີຜູ້ບາດເຈັບ 8.677 ຄົນ, ເສຍຊີວິດ 995 ຄົນ, ມູນຄ່າເສຍຫາຍເກືອບ 86 ຕື້ກີບ; ປີ 2016 ມີຜູ້ບາດເຈັບ 8.919 ຄົນ, ເສຍຊີວິດ 1.086 ຄົນ, ມູນຄ່າເສຍຫາຍເກືອບ 84 ຕື້ກີບ ແລະ ປີ 2017 ມີຜູ້ບາດເຈັບຈາກອຸບັດເຫດ 10.693 ຄົນ, ເສຍຊີວິດ 1.053 ຄົນ ມູນຄ່າເສຍຫາຍ 91 ຕື້ກວ່າກີບ; ອຸບັດເຫດທີ່ເກີດຂຶ້ນສ່ວນໃຫຍ່ແມ່ນຢູ່ໃນໄລຍະເທດສະການປີໃໝ່. ສະນັ້ນ, ປີໃໝ່ລາວປີນີ້ເຊິ່ງມີມື້ພັກຕິດຕໍ່ກັນຫຼາຍວັນ ທ່ານທີ່ຈະເດີນທາງໄປ – ມາທັງພາຍໃນ ແລະ ຕ່າງແຂວງ ຈົ່ງມີສະຕິນຳກັນເພື່ອເຮັດໃຫ້ອຸບັດເຫດເທິງທ້ອງຖະໜົນຫຼຸດລົງ.

%d bloggers like this: