ຝົນຕົກແຮງທີ່ຜົ້ງສາລີ ເຮັດໃຫ້ປະລິມານນໍ້າອູສູງຂຶ້ນ ເລີ່ມຖ້ວມເຮືອນປະຊາຊົນເມືອງຂວາ - Laoedaily

ຝົນຕົກແຮງທີ່ຜົ້ງສາລີ ເຮັດໃຫ້ປະລິມານນໍ້າອູສູງຂຶ້ນ ເລີ່ມຖ້ວມເຮືອນປະຊາຊົນເມືອງຂວາ

ປະລິມານນ້ຳອູທີ່ແຂວງຜົ້ງສາລີ ເພີ່ມຂຶ້ນສູງຖ້ວມເຮືອນປະຊາຊົນຕາມແຄມຝັ່ງ ເນື່ອງຈາກເກີດມີຝົນຕົກໜັກນັບແຕ່ວັນທີ 24 ຫາ 26 ມິຖຸນາ ຜ່ານມາ.ທີມຂ່າວຂອງພວກເຮົາ ຈຶ່ງໄດ້ຕິດຕໍ່ສອບຖາມປະຊາຊົນ ແລະ ຂະແໜງອຸຕຸນິຍົມ ແລະ ອຸທົກກະສາດແຂວງ.

ຕາມການສຳພາດປະຊາຊົນ ບ້ານເມືອງຂວາ ທ່ານໜຶ່ງໃຫ້ຮູ້ວ່າ: ປະລິມານຂອງນ້ຳອູ ແມ່ນເພີ່ມຂຶ້ນສູງຫຼາຍ ແລະ ໄດ້ຖ້ວມເຮືອນຂອງປະຊາຊົນຈຳນວນໜຶ່ງແລ້ວ ແລະ ມື້ນີ້ (ເວລາ 14:30 ໂມງ ໃນວັນທີ 26 ມິຖຸນາ 2018) ປະລິມານນໍ້າກໍ່ຍັງເພີ່ມຂຶ້ນຢູ່ ແລະ ຝົນກໍ່ຍັງບໍ່ເຊົາຕົກເທື່ອ ປະຊາຊົນສ່ວນໜຶ່ງທີ່ນໍ້າເລີ່ມຖ້ວນເຮືອນໄດ້ຂົນເຄື່ອງຂອງໄປໄວທີ່ສູງ.

ທ່ານ ພອນພະຈັນ ໂຄດສີດາ ວິຊາການຂອງຂະແໜງອຸຕຸນິຍົມ ແລະ ອຸທົກກະສາດ ແຂວງຜົ້ງສາລີ ໃຫ້ຮູ້ວ່າ: ທີ່ແຂວງຜົ້ງສາລີ ຝົນໄດ້ເລີ່ມຕົກຕັ້ງແຕ່ວັນ 24 ມິຖຸນາ ມາຮອດປັດຈຸບັນ (26 ມິຖຸນາ) ເຊິ່ງຕົກຕະຫຼອດໝົດມື້ ແລະ ຕົກໜັກໃນວັນທີ 25 ຫາ 26 ມິຖຸນາ ຜ່ານມາ ຈົນເຮັດໃຫ້ນ້ຳຖ້ວມເທດສະບານເມືອງໃນປະລິມານສູງສົມຄວນ ແລະ ເຊິ່ງເຮົາສາມາດວັດປະລິມານນ້ຳຕົກໄດ້ໃນມື້ວັນທີ 25 ໄດ້ 73,4 ມິນລິແມັດ ຕໍ່ 24 ຊົ່ວໂມງ ແລະ ວັນທີ 26 ວັດໄດ້ 34,0 ມິນລິແມັດ ຕໍ່ 24 ຊົ່ວໂມງ. ສ່ວນດ້ານປະລິມານນໍ້າອູ ທີ່ເພີ່ມສູງຂຶ້ນນັ້ນ ພວກເຮົາກໍ່ຍັງໄດ້ລົງໄປເບິ່ງ ແລະ ເກັບກຳຕົວຈິງເທື່ອ ເຊິ່ງສາຍນ້ຳອູດັ່ງກ່າວນີ້ ແມ່ນໄດ້ຜ່ານຜ່ານ 5 ເມືອງໃນແຂວງຜົ້ງສາລີ ແລະ ຜ່ານຫຼາຍໝູ່ບ້ານ.

ດ້ານກົມອຸຕຸນິຍົມ ແລະ ອຸທົກກະສາດ ໄດ້ພະຍາກອນອາກາດແຕ່ເວລາ 12 ໂມງ ຂອງວັນທີ 26 ມິຖຸນາ ຫາ ເວລາ 12 ໂມງ ຂອວັນທີ 27 ມິຖຸນາ 2018 ວ່າ: ພາກເໜືອດ້ານຕາເວັນອອກແມ່ນມີເຝື້ອປົກຄຸມໜ້າແໜ້ນ, ຝົນຍັງສືບຕໍ່ຕົກໃນລະດັບຄ່ອຍເປັນບໍລິເວນກວ້າງ ແລະ ຕົກປານກາງ ຫາ ຕົກໜັກຢູ່ບາງທ້ອງຖິ່ນແຂວງ ຜົ້ງສາລີ ແລະ ແຂວງຊຽງຂວາງຕື່ມອີກ. ອຸນຫະພູມຕໍ່າສຸດ 19-20 ອົງສາ ແລະ ສູງສຸດ 24-28 ອົງສາ.

ຂະນະທີ່ພະຍາກອນອາກາດແຕ່ວັນທີ 28 ມິຖຸນາ ຫາ 1 ກໍລະກົດ 2018 ຄວາມກົດດັນອາກາດຕ່ຳ ຍັງສືບຕໍ່ປົກຄຸມຢູ່ທົ່ວທຸກພາກຂອງລາວ ແລະ ສົມທົບກັບກະແສລົມຕາເວັນຕົກສ່ຽງໃຕ້ ພັດປົກຄຸມເປັນສ່ວນໃຫຍ່ ເຊິ່ງຍັງຈະເຮັດໃຫ້ມີຝົນຕົກໃນລະດັບຄ່ອຍຢູ່ທົ່ວໄປໃນແຕ່ລະພາກ ພ້ອມມີລົມພັດແຮງເປັນບາງໂອກາດຢູ່ບາງທ້ອງຖິ່ນ


ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ