ຂ່າວດ່ວນ! ນາຍົກອອກດຳລັດ ວ່າດ້ວຍການສ້າງຕັ້ງນະຄອນປາກເຊແລ້ວ

ຖືວ່າເປັນຂ່າວດີຕ້ອນຮັບປີໃໝ່ລາວຂອງພີ່ນ້ອງຊາວແຂວງຈຳປາສັກ ເນື່ອງຈາກນາຍຍົກລັດຖະມົນຕີ ແຫ່ງ ສປປ ລາວ ໄດ້ເຊັນດຳລັດ ວ່າດ້ວຍການສ້າງຕັ້ງນະຄອນປາກເຊ ເຊິ່ງເນື້ອໃນຕາມເອກະສານໄດ້ລະບຸດັ່ງນີ້:

  • ມາດຕາ 1: ສ້າງຕັ້ງນະຄອນປາກເຊ ປ່ຽນແທນເມືອງປາກເຊ ເຊິ່ງອົງການປົກຄອງທ້ອງຖິ່ນຂັ້ນດຽວກັນກັບເມືອງຂຶ້ນກັບແຂວງຈຳປາສັກ ມີເນື້ອທີ່ທັງໝົດ 125 ກິໂລຕາແມັດ, ປະຊາກອນ 42 ບ້ານ ແລະ ມີພົນລະເມືອງທັງໝົດ 81 ພັນກວ່າຄົນ ຍິງ 42 ພັນກວ່າຄົນ (ເນື້ອໃນລະອຽດຕາມເອກະສານລຸ່ມນີ້).
    ເມື່ອບໍ່ດົນມານີ້, ທ່ານ ສຸລິວັນ ສະຫວັດທະສິນ ຄະນະປະຈໍາພັກແຂວງ ເຈົ້າເມືອງໆປາກເຊ ໃຫ້ຮູ້ວ່າ: ການສ້າງໃຫ້ຕົວເມືອງປາກເຊ ກາຍເປັນນະຄອນປາກເຊ ແມ່ນໄດ້ດໍາເນີນການຈັດຕັ້ງປະຕິບັດຕາມເງື່ອນໄຂຢ່າງຄົບຖ້ວນຄື: ເປັນເມືອງທີ່ມີພົນລະເມືອງແຕ່່ 60 ພັນຄົນຂຶ້ນໄປ ແລະ ຢູ່ພາຍໃນພື້ນທີ່ຕົວເມືອງມີ 25 ພັນຄົນຂຶ້ນໄປ. ມີຄວາມໜາແໜ້ນຂອງພົນລະເມືອງພາຍໃນພື້ນທີ່ຕົວເມືອງ ຊຶ່ງເປັນທີ່ຕັ້ງຂອງອົງການປົກຄອງເມືອງແຕ່ 900 ຄົນຂຶ້ນໄປຕໍ່ກິໂລແມັດ. ມີຈໍານວນຜູ້ປະກອບອາຊີບເປັນກະ ສິກອນຢູ່ພາຍໃນພື້ນທີ່ຕົວເມືອງ ຊຶ່ງເປັນທີ່ຕັ້ງຂອງອົງການປົກຄອງເມືອງ ບໍ່ເກີນ 25% ຂອງຈໍານວນພົນລະເມືອງທັງໝົດ. ມີພື້ນຖານໂຄງລ່າງດ້ານເສດຖະກິດ, ວັດທະນະທໍາ-ສັງຄົມ ໄດ້ຮັບການພັດທະນາໃນລະດັບສູງ ແລະ ເປັນລະບົບຄົບຊຸດ. ເປັນບ້ານພັດທະນາທັງໝົດ. ກຸ້ມຕົນເອງດ້ານລາຍຈ່າຍບໍລິຫານປົກກະຕິ ແລະ ມີສ່ວນແຮໄວ້ເພື່ອການລົງທຶນ.

ທ່ານ ສຸລິວັນ ໃຫ້ຮູ້ຕື່ມວ່າ: ຄວາມພ້ອມທີ່ຈະປະກາດເມືອງປາກເຊ ເປັນນະຄອນປາກເຊ ແມ່ນພ້ອມ 100% ເຊິ່ງທາງອໍານາດການປົກຄອງຂອງແຂວງໄດ້ສະເໜີຕໍ່ລັດຖະບານ ໂດຍຜ່ານກະຊວງພາຍໃນ ເພື່ອຂໍອະນຸມັດການຮັບຮອງ ແລະ ປະກາດຕົວເມືອງປາກເຊເປັນນະຄອນ. ພ້ອມນີ້ທ່ານເຈົ້າເມືອງຍັງຮຽກຮ້ອງໃຫ້ປະຊາຊົນແຂວງຈໍາປາສັກ ມີສ່ວນຮ່ວມໃນການສ້າງນະຄອນດັ່ງກ່າວດ້ວຍການຮັກສາຄວາມສະອາດສວຍງາມ, ຄວາມສະຫງົບ, ຄວາມເປັນລະບຽບຮຽບຮ້ອຍໃນທົ່ວສັງຄົມ.
ກ່ອນໜ້ານັ້ນ, ລັດຖະບານໄດ້ອະນຸມັດການສ້າງຕັ້ງນະຄອນຫຼວງພະບາງ, ນະຄອນໄກສອນພົມວິຫານ ແລະ ນະຄອນປາກເຊ ເຊິ່ງທັງສາມນະຄອນຈະປະກາດຢ່າງເປັນທາງການກ່ຽວກັບການປ່ຽນສະຖານະຈາກເມືອງ ເປັນນະຄອນ ເພື່ອໃຫ້ຮັບຮູ້ກັນໃນທົ່ວປະເທດ ແລະ ຕ່າງປະເທດ.
ທັງນີ້ ຫຼວງພະບາງມີກຳນົດການປະກາດປ່ຽນເປັນ ນະຄອນຫຼວງພະບາງ ໃນວັນທີ 15 ເມສາ 2018 ນີ້ ເຊິ່ງເປັນຊ່ວງດຽວກັນກັບການສະເຫຼີມສະຫຼອງປີໃໝ່ລາວ ແລະ ເປີດປີທ່ອງທ່ຽວລາວ 2018.

ອີງຕາມກົດໝາຍວ່າດ້ວຍການປົກຄອງທ້ອງຖິ່ນ ບັນດານະຄອນທີ່ສ້າງຕັ້ງໃໝ່ນີ້ ຈະມີຖານະທຽບເທົ່າກັບເມືອງ ແລະ ຫົວໜ້າອົງການປົກຄອງນະຄອນຈະມີຖານະທຽບເທົ່າກັບເຈົ້າເມືອງ. ທັງນີ້ ເງື່ອນໄຂໃນການສ້າງຕັ້ງນະຄອນ ຕາມກົດໝາຍກຳນົດໄວ້ແມ່ນຕ້ອງມີປະຊາກອນຢ່າງໜ້ອຍ 60,000 ຄົນ ແລະ ຢ່າງໜ້ອຍ 25,000 ຄົນຕ້ອງອາໄສຢູ່ໃນເຂດຕົວເມືອງ ຫຼື ເທດສະບານ, ມີຄວາມໜາແໜ້ນຂອງປະຊາກອນຢູ່ທີ່ 900 ຄົນຕໍ່ກິໂລຕາແມັດ ແລະ ປະຊາກອນທີ່ປະກອບອາຊີບກະສິກອນຕ້ອງໜ້ອຍກວ່າ 25%. ທັງ 3 ເມືອງ ຄື ເມືອງຫຼວງພະບາງ (ເມືອງເອກຂອງແຂວງຫຼວງພະບາງ), ໄກສອນພົມວິຫານ (ເມືອງເອກຂອງແຂວງສະຫວັນນະເຂດ) ແລະ ປາກເຊ (ເມືອງເອກຂອງແຂວງຈຳປາສັກ) ລ້ວນແລ້ວແຕ່ມີເງື່ອນໄຂຄົບຖ້ວນ.

%d bloggers like this: