ເມືອງຕຸ້ມລານ ປະກາດເປັນເມືອງຈົບການສຶກສາຊັ້ນມັດທະຍົມຕອນບໍາລຸງ

ວັນທີ 14 ພຶດສະພາ 2018 ເມືອງຕຸ້ມລານ ໄດ້ປະກາດເປັນເມືອງຈົບການສຶກສາຊັ້ນມັດທະຍົມຕອນຕົ້ນບໍາລຸງ ຢູ່ທີ່ສະໂມສອນຂອງເມືອງ, ໂດຍເຂົ້າຮ່ວມຂອງ ທ່ານ ຮສຈ.ປອ ຄຳຜາຍ ສີສະຫວັນ ຮອງລັດຖະມົນຕີກະຊວງສຶກສາທິການ ແລະກິລາ, ມີ ທ່ານ ພູທົງ ຄຳມະນີວົງ ຮອງເຈົ້າແຂວງໆສາລະວັນ ຜູ້ຊີ້ນຳວຽກງານວັດທະນະທຳ-ສັງຄົມຂັ້ນແຂວງ, ທ່ານ ຈັນສະໜອນ ພົມມະແສງ ເຈົ້າເມືອງຕຸ້ມລານ, ມີບັນດາກົມການສຶກສານອກໂຮງຮຽນ, ພະແນກການອ້ອມຂ້າງ, ພາກສ່ວນທີ່ກ່ຽວຂ້ອງ ຕະຫຼອດຮອດພະນັກງານລັດຖະກອນ, ທະຫານ-ຕຳຫຼວດ ນັກຮຽນຮູ້ປັນຍາຊົນ ແລະ ພໍ່ແມ່ປະຊາຊົນອ້ອມຂ້າງເທດສະບານເມືອງເຂົ້າຮ່ວມ.

ທ່ານ ບົວແກ້ວ ວົງຄຳຈັນ ຫົວໜ້າຫ້ອງການສຶກສາທິການ ແລະກິລາເມືອງເລົ່າ ໄດ້ຕີລາຄາຄືນການຈັດຕັ້ງປະຕິບັດການຮຽນ-ການສອນຊັ້ນມັດທະຍົມຕົ້ນບໍາລຸງ, ເຊິ່ງໃນທົ່ວເມືອງຕຸ້ມລານມີຄູອາຈານທັງໝົດ 253 ຄົນ, ມີໂຮງຮຽນອະນຸບານ 7 ແຫ່ງ, ໂຮງຮຽນປະຖົມ 39 ແຫ່ງ, ໂຮງຮຽນມັດທະຍົມຕອນຕົ້ນ 6 ແຫ່ງ, ໂຮງຮຽນມັດທະຍົມຕອນປາຍ 2 ແຫ່ງ. ໃນໄລຍຜ່ານມາການປະຕິບັດຫຼັກສູດການຮຽນ-ການສອນ ໃຫ້ແກ່ປະຊາຊົນໃນເກນອາຍຸ 15-35 ປີ ໃຫ້ຜູ້ທີ່ຍັງບໍ່ທັນຈົບມັດທະຍົມຕອນຕົ້ນ ໂດຍສະເພາະໄດ້ເກັບຂໍ້ມູນຈໍານວນປະຊາກອນ ເພື່ອສືບຕໍ່ຈັດການຮຽນ-ການສອນຈໍານວນ 37 ບ້ານ, ມີ 681 ຄົນ, ຍິງ 317 ຄົນ, ຜ່ານການປະຕິບັດເຫັນໄດ້ວ່າມີຜົນສຳເລັດຕາມລະດັບຄາດໜາຍເປັນຕົ້ນ: ໃນສົກຮຽນ 2013 – 2014 ບັນລຸ 4 ບ້ານ, ມີນັກຮຽນ 45 ຄົນ, ຍິງ 11 ຄົນ,ສົກຮຽນ 2014–2015 ບັນລຸໄດ້ 9 ບ້ານ, ມີນັກຮຽນ 73 ຄົນ, ຍິງ 27 ຄົນ, ສົກຮຽນ 2015-2016 ບັນລຸໄດ້ 10 ບ້ານ, ມີນັກຮຽນ 85 ຄົນ, ຍິງ 35 ຄົນ, ສົກຮຽນ 2016–2017 ບັນລຸໄດ້ 14 ບ້ານ, ມີນັກຮຽນ 453 ຄົນ, ຍິງ 284 ຄົນ, ມາຮອດປະຈຸບັນມີຈຳນວນຜູ້ຮຽນຈົບມັດທະຍົມຕອນຕົ້ນທັງໜົດ 656 ຄົນ ຍິງ 357 ຄົນ ເທົ່າກັບ 96,33%.

ຈາກນັ້ນໃນພິທີກໍໄດ້ມີມອບໃບຍັ້ງຢືນການຈົບຊັ້ນມັດທະຍົມຕອນຕົ້ນບໍາລຸງໃຫ້ເມືອງຕຸ້ມລານ ແລະໄດ້ມອບໃບຍ້ອງຍໍຂັ້ນກະຊວງສຶກສາທິການແລະກິລາ, ຂັ້ນແຂວງ, ຂັ້ນພະແນກ ແລະ ຂັ້ນເມືອງໃຫ້ກົມກອງບຸກຄົນທີ່ມີຜົນງານໃນການເຄື່ອນໄຫວການຮຽນ – ການສອນ ແລະ ຕອນທ້າຍຂອງພິທິກໍ່ໄດ້ມີການຕັດແຖບຜ້າ ແລະລັ່ນຄອງເປັນສັກຂີພິຍານໃນການປະກາດເປັນເມືອງຈົບມັດທະຍົມຕອນຕົ້ນບໍາລຸງຂອງເມືອງຕຸ້ມລານຢ່າງເປັນທາງການ.

ຂ່າວ: ແຫຼງຄຳ ບຸດນາໂຄກ

%d bloggers like this: