ສະຫວັນນະເຂດ ເລັ່ງປັບປຸງສະພາບແວດລ້ອມ ດຳເນີນ ທຸລະກິດ ພ້ອມວາງເປົ້າຍູ້ເສດຖະກິດເຕີບໂຕລະດັບ 10%

ແຂວງສະຫວັນນະເຂດ ຈະເລັ່ງປັບປຸງສະພາບແວດລ້ອມດຳເນີນທຸລະກິດ ເພື່ອຍູ້ໜູນການຄ້າການລົງທຶນໃຫ້ມີບັນຍາກາດດີຍິ່ງຂຶ້ນໃນປີນີ້ ພ້ອມວາງເປົ້າໃຫ້ເສດຖະກິດເຕີບໂຕລະດັບ 10%, ການສົ່ງອອກໃຫ້ໄດ້ 746 ລ້ານກວ່າໂດລາ.
ທ່ານ ສັນຕິພາບ ພົມວິຫານ ເລຂາຄະນະບໍລິຫານງານພັກແຂວງ ກ່າວໃນກອງປະຊຸມຄົບຄະນະບໍລິຫານງານພັກແຂວງ ເປີດກວ້າງ ຄັ້ງທີ 3 ສະໄໝທີ VIII ເມື່ອທ້າຍເດືອນທັນວາ 2016 ຜ່ານມາ ໂດຍເນັ້ນຕື່ມ 11 ບັນຫາ ຄວນເອົາໃຈໃສ່ໃນເວລາຜັນຂະຫຍາຍຈັດຕັ້ງມະຕິກອງປະຊຸມຄັ້ງນີ້ ຄື:
1. ໃນສົກປີ 2017 ເຊິ່ງເປັນປີທຳອິດທີ່ໄດ້ປ່ຽນຈາກສົກງົບປະມານມາເປັນປີປະຕິທິນ ແລະ ເປັນປີທຳອິດໃນການເລີ່ມຈັດຕັ້ງປະຕິບັດເປົ້າໝາຍ SDGs ຂອງລັດຖະບານ, ເຊິ່ງພວກເຮົາຈະຕ້ອງໄດ້ສຸມໃສ່ສືບຕໍ່ຮັບປະກັນຮັກສາສະຖຽນລະພາບທາງດ້ານການເມືອງ, ຄວາມສະຫງົບປອດໄພ ແລະ ຄວາມເປັນລະບຽບຮຽບຮ້ອຍໃນສັງຄົມໃຫ້ໄດ້ໂດຍພື້ນຖານ ເພື່ອສ້າງສະພາບແວດລ້ອມ ແລະເງື່ອນໄຂເອື້ອອຳນວຍໃນການສ້າງສາພັດທະນາຢ່າງຕໍ່ເນື່ອງ.
2. ສືບຕໍ່ເຊື່ອມຊຶມມະຕິກອງປະຊຸມ ໃຫຍ່ແຕ່ລະຂັ້ນຢ່າງກວ້າງຂວາງ ແລະ ເລິກເຊິ່ງ ໃຫ້ບັນດາສະມາຊິກພັກ, ພະນັກງານ – ລັດຖະກອນ ແລະ ພໍ່ແມ່ປະຊາຊົນໃນທົ່ວແຂວງດ້ວຍຫຼາຍເນື້ອໃນ, ຫຼາຍຮູບການ ແລະ ຫຼາຍວິທີ.
3. ສືບຕໍ່ປັບປຸງກຳລັງ ປກຊ ຕາມແຜນງານ 26 ໂຄງການຂອງກະຊວງປ້ອງກັນປະເທດ, ຄຸ້ມຄອງ ແລະ ສັບຊ້ອນຄະນະພັກ – ຄະນະບັນຊາ, ອົບຮົມວິຊາສະເພາະ ແລະ ປັບປຸງກຳລັງໃຫ້ໜັກແໜ້ນ, ເຂັ້ມແຂງຂຶ້ນເລື້ອຍໆ, ເອົາໃຈໃສ່ລາດຕະເວນຕາມຊາຍແດນທີ່ຕິດຈອດກັນ ເພື່ອແກ້ໄຂການລັກລອບຕັດໄມ້ ແລະ ຄ້າຂາຍເຖື່ອນ, ຕິດຕາມສືບຂ່າວຢ່າງໃກ້ຊິດກ່ຽວກັບການເຄື່ອນໄຫວຂອງອິດທິກຳລັງປໍລະປັກ ໂດຍສະເພາະແມ່ນການໃສ່ຮ້າຍປ້າຍສີທາງສື່ສັງຄົມ – ອອນລາຍ, ການນຳໃຊ້ສາສະໜາບັງໜ້າ ເພື່ອເຄື່ອນໄຫວບໍ່ຖືກຕ້ອງ ແລະ ອື່ນໆ.
4. ສຳລັບວຽກງານ ປກສ ສືບຕໍ່ຫັນລົງເຮັດວຽກຕົວຈິງຕາມແຜນປ້ອງກັນຄວາມສະຫງົບເປັນປົກກະຕິ, ຕໍ່ເນື່ອງ, ເກັບຄືນອາວຸດເສິກ – ອາວຸດລ່າເນື້ອ ແລະ ຈັກສະຕິນຕັດໄມ້, ທ້ອນໂຮມ ແລະ ທຳລາຍຖິ້ມ, ສືບຕໍ່ກວດກາ – ຄຸ້ມຄອງຄົນຕ່າງປະເທດທີ່ເຂົ້າມາທ່ຽວ ແລະ ເຮັດວຽກພາຍໃນແຂວງໃຫ້ເຂົ້າສູ່ລະບຽບ, ແກ້ໄຂບັນຫາຢາເສບຕິດ ແລະ ສິ່ງມຶນເມົາຕ່າງໆ, ບັນຫາອາຊະຍາກຳ, ບັນຫາອຸ​ບັດເຫດ, ບັນຫາແກ໋ງຂີ່ລົດໄວ – ສົ່ງສຽງດັງ, ອາລະວາດຕີກັນໃຫ້ຫຼຸດໜ້ອຍຖອຍລົງ ແລະ ນັກຮຽນອາຍຸບໍ່ເຖິງກະສຽນເຂົ້າໄປດື່ມເຫຼົ້າ – ເບຍຕາມຮ້ານອາຫານໃຫ້ຫຼຸດລົງເທື່ອລະກ້າວ ພ້ອມທັງປະຕິບັດວຽກງານອື່ນໆຕາມພາລະບົດບາດທີ່ກຳນົດໄວ້.
5. ການວາງແຜນພັດທະນາເສດຖະກິດ – ສັງຄົມ ໃນປີ 2017 ແລະ ໃນຊຸມປີຕໍ່ໜ້າຈະຕ້ອງມີການປ່ຽນໃໝ່ ແລະ ບຸກທະລຸທາງດ້ານຈິນຕະນາການທີ່ແທ້ຈິງ, ມີການຖອດຖອນບົດຮຽນທີ່ຜ່ານມາ, ຈິງໃຈແກ້ໄຂບັນຫາຮ່ວມກັນ, ຕ້ອງຢູ່ກັບຄວາມເປັນຈິງ, ຈິງໃຈພັດທະນາແບບຍືນຍົງ, ປະຕິບັດແຜນພັດທະນາຕາມຄວາມອາດສາມາດທາງດ້ານການເງິນ – ງົບປະມານຢ່າງມີ ຄວາມຮັບຜິດຊອບ, ຫັນການຄຸ້ມຄອງລັດເຂົ້າສູ່ລະບຽບກົດໝາຍຢ່າງເຄັ່ງຄັດ, ຕີຖອຍປະກົດການຫຍໍ້ທໍ້ໃນການຄຸ້ມຄອງເສດຖະກິດ, ການພັດທະນາ ແລະ ການບໍລິການ, ມີຈຸດສຸມ, ມີການປຶກສາຫາລື, ທຸກພາກສ່ວນມີສ່ວນຮ່ວມ ແລະ ມີຄວາມໂປ່ງໃສ.
ປີ 2017 ສູ້ຊົນເຮັດໃຫ້ລວມຍອດມູນຄ່າເພີ່ມຂອງຜະລິດຕະພັນພາຍໃນ GDP ເພີ່ມຂຶ້ນໃນລະດັບ 10% ຫຼື ເທົ່າກັບ 16,339 ຕື້ກີບ, ສະເລ່ຍໃສ່ຫົວຄົນໃຫ້ໄດ້ 1,991 ໂດລາສະຫະລັດ, ການສົ່ງອອກສິນຄ້າໃຫ້ບັນລຸ 746.4 ລ້ານໂດລາສະຫະລັດ, ນຳເຂົ້າ 566.3 ໂດລາສະຫະລັດ, ໄດ້ດຸນການຄ້າ 180.2 ລ້ານໂດລາສະຫະລັດ, ສູ້ຊົນຜະລິດເຂົ້າເປືອກໃຫ້ໄດ້ທັງໝົດ 1 ລ້ານ 8,206 ໂຕນ.
6. ການສ້າງແຜນງົບປະມານ ປະຈຳປີ 2017 ຕ້ອງຫັນໄປສູ່ຄວາມເປັນຈິງ ແລະ ທຸກໆພາກສ່ວນ ທັງແຂວງ ແລະ ເມືອງ ຕ້ອງຖືເປັນວຽກບຸລິມະສິດ, ເຫັນຄວາມຈຳເປັນຮ່ວມກັນ ແລະ ພ້ອມກັນແກ້ບັນຫາໃຫ້ສະພາບງົບປະມານດີຂຶ້ນໃນແຕ່ລະປີ.
7. ເອົາໃຈໃສ່ປັບປຸງສະພາບແວດລ້ອມ ດຳເນີນທຸລະກິດໃຫ້ມີຄວາມສະດວກ ແລະ ເອື້ອອຳນວຍໃຫ້ແກ່ນັກລົງທຶນ, ການຜະລິດທຸລະກິດ, ສົ່ງເສີມໃຫ້ມີການລົງທຶນໃນຂົງເຂດກະສິກຳ ແລະ ການຜະລິດສິນຄ້າໃຫ້ຫຼາຍຂຶ້ນ.
8. ສົ່ງເສີມການຜະລິດສິນຄ້າຮັບໃຊ້ພາຍໃນໃຫ້ພຽງພໍ ແລະ ຜະລິດເພື່ອສົ່ງອອກດ້ວຍການສ້າງຄວາມເຂັ້ມແຂງໃຫ້ແກ່ວິສາຫະກິດຂະໜາດນ້ອຍ ແລະ ຂະໜາດກາງ, ຊຸກຍູ້ໃຫ້ມີການລົງທຶນຫຼາຍພາກສ່ວນໃຫ້ຫຼາຍຂຶ້ນ, ສົ່ງເສີມການປະດິດສ້າງ, ນຳໃຊ້ວິທະຍາສາດ ແລະ ເຕັກໂນໂລຊີທີ່ທັນສະໄໝເຂົ້າໃນການພັດທະນາ.
9. ຍົກສູງຄຸນນະພາບການສຶກສາ, ສາທາລະນະສຸກໃນເຂດຊົນນະບົດຫ່າງໄກສອກຫຼີກ ດ້ວຍການສຸມທຶນຮອນເຂົ້າໃສ່ພື້ນຖານໂຄງລ່າງໃຫ້ພຽງພໍ ເປັນຕົ້ນ: ໂຮງຮຽນ, ໂຮງໝໍ, ສຸກສາລາ, ອຸປະກອນການສຶກສາ, ການແພດ, ພ້ອມທັງຍົກລະດັບການສິດສອນຂອງຄູໃຫ້ມີຄຸນນະພາບ ແລະ ພຽງພໍ, ເອົາໃຈໃສ່ຈັດຕັ້ງປະຕິບັດວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ.
10. ເອົາໃຈໃສ່ແກ້ໄຂບັນຫາທີ່ດິນ ເຊິ່ງແມ່ນວຽກຈຸດສຸມສຳຄັນທີ່ຈະພ້ອມກັນເຊີດຊູຍົກສູງຄວາມຮັບຜິດຊອບຈັດຕັ້ງປະຕິບັດໃຫ້ໄດ້ຮັບຜົນດີ.
11. ສະເໜີໃຫ້ບັນດາສະຫາຍເລຂາພັກເມືອງ – ເຈົ້າເມືອງ, ເລຂາຮາກຖານພັກ – ໜ່ວຍພັກ, ຫົວໜ້າພະແນກການ, ກົມກອງ, ຫ້ອງການອ້ອມຂ້າງແຂວງ. ຈົ່ງນຳເອົາເນື້ອໃນຈິດໃຈທີ່ໄດ້ປຶກສາຫາລື ແລະ ເປັນເອກະພາບກັນຢູ່ກອງປະຊຸມໃນເທື່ອນີ້ໄປຈັດຕັ້ງຜັນຂະຫຍາຍໃຫ້ເປັນວຽກອັນລະອຽດຢູ່ໃນຂະແໜງການ ແລະ ທ້ອງຖິ່ນຮາກຖານຂອງຕົນໃຫ້ເກີດດອກອອກຜົນຕົວຈິງ.

ທ່ານ ສັນຕິພາບ ພົມວິຫານ

ການຜະລິດນໍ້າດື່ມຢູ່ແຂວງສະຫວັນນະເຂດ