ປກສ ເມືອງວິລະບູລີ ມອບຂອງກາງທີ່ຢຶດໄດ້ຄືນໃຫ້ບ່ໍຄຳ-ທອງເຊໂປນ

 

ກອງບັນຊາການ ປກສ ເມືອງວິລະບູລີ ໄດ້ສົ່ງມອບແຮ່ທາດທອງແດງ7,965 ກິໂລ, ທອງແດງ 1, 600 ກິໂລ ທີ່ຢຶດໄດ້ຈາກຜູ້ກະທຳຜິດຄືນໃຫ້ບ່ໍຄຳ-ທອງເຊໂປນ.
ພິທີມອບ-ຮັບເຄື່ອງຂອງກາງລະຫວ່າງກອງບັນຊາການ ປກສ ເມືອງວິລະບູລີ ແລະບໍລິສັດລ້ານຊ້າງບ່ໍຄຳ-ທອງເຊໂປນ ໄດ້ຈັດຂຶ້ນໃນຕອນບ່າຍຂອງວັນທີ 10 ມັງກອນ 2017 ທີ່ສະໂມສອນດັ່ງກ່າວ ໂດຍການເຂົ້າຮ່ວມຂອງທ່ານ ມຸນທາ ໄຊຍະລິດ ຮອງເຈົ້າເມືອງວິລະບູລີ, ມີຕາງໜ້າໃຫ້ບໍລິສັດລ້ານຊ້າງບ່ໍຄຳ-ທອງເຊໂປນ, ກອງບັນຊາການ ປກສ ເມືອງ ພ້ອມດວ້ຍບັນດາຫ້ອງການທີ່ກ່ຽວຂ້ອງ ແລະແຂກຖືກເຊີນເຂົ້າຮ່ວມ.
ທ່ານ ພັຕ ພົມມາ ຊາພົມພັກດີ ຄະນະກອງບັນຊາການ ປກສ ເມືອງວິລະບູລີ ໄດ້ຂຶ້ນລາຍງານໂດຍຫຍໍ້ໃນການຈັດຕັ້ງປະຕິບັດໜ້າທີ່ຂອງອະນຸກຳມະການກວດກາແກ້ໄຂຂັ້ນເມືອງ ເຊິ່ງຜ່ານການຈັດຕັ້ງປະຕິບັດຕົວຈິງສາມາດກັກຕົວຜູ້ກະທຳຜິດໄດ້ຈຳນວນທັງໝົດ 26 ລາຍ, ສາມາດຢຶດຂອງກາງປະເພດແຮ່ທາດທອງແດງໄດ້ຈຳນວນ 7,965 ກິໂລ, ທອງແດງ 1,600 ກິໂລ, ໝໍ້ຕົ້ມທອງຈຳນວນ 02 ໜ່ວຍ, ລົດໃຫຍ່ທີ່ໃນການຂົນແຮ່ທາດ 09 ຄັນ, ລົດໄຖນາ 1 ຄັນແລະເຄື່ອງອັດຊີດ 1 ເຄື່ອງ.
ໃນພິທີແມ່ນໄດ້ມີການມອບ-ຮັບເຄື່ອງຂອງກາງທີ່ໄດ້ຢຶດ ແລະອາຍັດໄວ້ຄືນໃຫ້ແກ່ບໍລິສັລ້ານຊ້າງບ່ໍຄຳ-ທອງເຊໂປນກ່າວມອບໂດຍທ່ານ ພັທ ບຸນມາ ໄຊຍະລາດ ຫົວໜ້າກອງບັນຊາການ ປກສ ເມືອງ ແລະກ່າວຮັບໂດຍທ່ານ ວິບູນ ສິດທິວໍລະດາ ຫົວໜ້າພະແນກພົວພັນທ້ອງຖິ່ນ, ຄວາມປອດໄພ, ສຸຂະພາບ, ສິ່ງແວດລ້ອມ ແລະຊຸມຊົນຂອງບໍລິສັດລ້ານຊ້າງບໍ່ຄຳ-ທອງເຊໂປນ ໂດຍຊ້ອງໜ້າທ່ານຮອງເຈົ້າເມືອງ ພ້ອມດວ້ຍແຂກເຂົ້າຮ່ວມເປັນສັກຂີພິຍານ.