ນາຍົກລັດຖະມົນຕີ ລາວ-ກຳປູເຈຍ ຢ້ຽມຢາມໂຄງການ ກໍ່ສ້າງເຂື່ອນໄຟຟ້າ ດອນສະໂຮງ

(ຂປລ) ໃນ​ວັນ​ທີ 10 ມັງກອນ 2017 ນີ້ ທ່ານ​ ທອງ​ລຸນ​ ສີສຸ​ລິດ ນາຍົກລັດຖະມົນຕີ ​ແຫ່ງ ສປປ ລາວ ​ແລະ ທ່ານ ສົມ​ເດັດອັກ​ຄະ​ມະ​ຫາ​ເສ​ນາ​ບໍ​ດີ ເຕ​ໂຈຮຸນ​ແຊນ, ນາ​ຍົກ​ລັດ​ຖະ​ມົນ​ຕີ ແຫ່ງຣາ​ຊະ​ອາ​ນາ​ຈັກກຳ​ປູ​ເຈຍ ພ້ອມ​ດ້ວຍ​ຄະນະ​ຢ້ຽມ​ຢາມ ໂຄງການກໍ່ສ້າງ​ເຂື່ອນໄຟຟ້າ ດອນ​ສະ​ໂຮງ ຢູ່ເມືອງໂຂງ ແຂວງຈໍາປາສັກ ​ ​ໃນ​ໂອ​ກາດ​ເດີນທາງ​ ມາ​ເຂົ້າ​ຮ່ວມ​ພິ​ທີ​ເປີດ​ດ່ານ​ສາ​ກົນ  ໜອງນົກຂຽນ-ຕຣາປຽງກຣຽນ ລະຫວ່າງສອງປະເທດ ລາວ ​ແລະ ກຳ​ປູ​ເຈຍ ​​ໂດຍ​​ໃຫ້​ກຽດ​ຕ້ອນຮັບ ​ຢ່າງ​ອົບ​ອຸ່ນ ຈາກ​ການ​ນຳ​ຂັ້ນ​ແຂວງ, ​ເມືອງທີ່​ກ່ຽວຂ້​ອງ.

ປັດຈຸບັນ ການຈັດ​ຕັ້ງ​ປະຕິບັດໂຄງການ ກໍ່ສ້າງ​ເຂື່ອນໄຟຟ້າດອນ​ສະ​ໂຮງ ຢູ່ເມືອງໂຂງ  ​ແຂວງ​ ຈໍາປາ​ສັກ ມີ​ຄວາມ​ຄືບ​ໜ້າ​ 18% ພາຍລັງດຳເນີນການກໍ່ສ້າງ ມາແຕ່ເດືອນຕຸລາ 2015 ​ແລະ ຄາດວ່າຈະໃຫ້ສຳເລັດ 100% ໃນ ທ້າຍປີ 2019.

ເຂື່ອນໄຟຟ້າ ດອນ​ສະ​ໂຮງ ເປັນຝາຍນໍ້າ​ລົ້ນ​ ທີ່​ບໍ່​ມີ​ການເກັບ​ກັກ​ນ້ຳ ​ໂດຍ​ແມ່ນ​ບໍລິສັດ​​ເມັກ​ກະ​ເຟີ​ສ ຈາກ​ປະ​ເທດ​ມາ​ເລ​ເຊຍ ​ເປັນ​ຜູ້​ຮັບ​ເໝົາ​ກໍ່ສ້າງ, ລວມມູນ​ຄ່າການລົງທຶນທັງໝົດ ​ຫລາຍ​ກວ່າ 500 ລ້ານໂດລາ​ສະຫະລັດ, ​ໃນ​ນັ້ນ ບໍລິສັດ​ດັ່ງກ່າວ, ຖື​ຮຸ້ນ 80% ​ແລະ ລັດ​ວິ​ສາ​ຫະກິດ​ໄຟຟ້າ​ລາວ ຖື​ຮຸ້ນ 20%, ມີ​ອາຍຸ​ສຳ​ປະທານ 25 ປີ ​ເຊິ່ງເຂື່ອນດັ່ງກ່າວ ປະກອບ​ມີ4  ​ເຄື່ອງ​ຈັກ, ມີ​ກຳລັງ​ການ​ຕິດ​ຕັ້ງ 260  ເມ​ກາວັດ, ສາມມາດຜະລິດກະແສໄຟຟ້າ ໄດ້ສະ​ເລ່ຍ 2.000 ກວ່າກິກກາ​ວັດ​ໂມງ​ຕໍ່​ປີ ພາຍຫລັງ ສ້າງສຳເລັດ ແລະ ເປີດໃຊ້ຢ່າງເປັນທາງການ ຈະສົ່ງກະແສໄຟຟ້າ ໃຫ້ລັດ​ວິ​ສາ​ຫະກິດ​ໄຟຟ້າ​ລາວ 100%.

​ໃນ​ວັນ​ດຽວກັນ ທ່ານ​ນາ​ຍົກລັດ​ຖະມົນຕີ ທັງ​ສອງ​ປະ​ເທດ ພ້ອມ​ຄະ​ນະ ຍັງ​ໄດ້​ໄປ​ຢ້ຽມ​ຊົມ​ສະຖານ​ ທີ່​ທ່ອງ​ທ່ຽວ ທາງ​ທຳ​ມະ​ຊາດ ນໍ້າຕົກຕາດ​ຄອນ​ພະ​ເພັງ ​ແລະ ​ໄດ້​ໄປ​ກາບ​ໄຫ້ວ​ສັກກະ​ລະ​ບູຊາ ຕົ້ນ​ໄມ້​ມະນີ​ໂຄດ ອີກ​ດ້ວຍ./.