ເຮັດທຸລະກິດເສື້ອຜ້າດີແນວໃດ?

“ ໄກ່ງາມຍ້ອນຂົນ ຄົນງາມຍ້ອນແຕ່ງ ” ສຸພາສິດນີ້ ຄົງຈະບົ່ງບອກເຖິງອະດີດ, ປັດຈຸບັນ ແລະ ອະນາຄົດຂອງທຸລະກິດເສື້ອຜ້າໄດ້ເປັນຢ່າງດີ ຕາບເທົ່າທີ່ຍັງບໍ່ມີເຄືື່ອງແຕ່ງກາຍຊະນິດອື່ນມາທົດແທນເສື້ອຜ້າໄດ້.
ທຸລະກິດນີ້ກໍ່ຈະຍັງຄົງຍືນຍົງ ແລະ ຂະຫຍາຍຕົວໄດ້ເລື້ອຍໆຍິ່ງລາຍໄດ້ໃນກະເປົ໋າຂອງເຮົາຫຼາຍຂຶ້ນ ຕາມການເຕີບໂຕຂອງເສດຖະກິດຄົນເຮົາກໍ່ຍິ່ງຈະເສຍເງິນໄປກັບການຊື້ເສື້ອຜ້າຫຼາຍຂຶ້ນ; ຈາກທີ່ເຄີຍມີເກີບຄູ່ດຽວກໍ່ມີຫຼາຍໆຄູ່, ເຄີຍຊື້ເສື້ອ ແລະ ໂສ້ງປີລະຄັ້ງ ກໍ່ກາຍເປັນ 3 ເດືອນຄັ້ງ ແລະ ມີທ່າອ່ຽງທີ່ຈະເພີ່ມຫຼາຍຂຶ້ນເລື້ອຍໆ ບາງຄົນເມື່ອໄດ້ຟັງເລື່ອງທຸລະກິດເສື້ອຜ້າ ກໍ່ອາດຈະເບິ່ງວ່າເປັນອຸດສາຫະກຳປະເພດ ຕາເວັນຕົກດິນ ( Sunset Industry ) ເພາະຕົ້ນທຶນສູງເຮັດໃຫ້ຜະລິດອອກມາແລ້ວແຂ່ງກັບຕ່າງປະເທດບໍ່ໄດ້ ແຕ່ມິຕິຂອງການເຮັດທຸລະກິດເສື້ອຜ້າບໍ່ໄດ້ມີແຕ່ການຜະລິດ ຖ້າປ່ຽນມູມມອງມາເປັນການສ້າງຍີ່ຫໍ້ ( Brand ) ເພື່ອຂາຍເສື້ອຜ້າໃນລາຄາລະດັບສູງ ( Premium ) ກໍ່ເປັນວິທີທີ່ຈະສ້າງມູນຄ່າ ແລະ ເພີ່ມກຳໄລໃຫ້ກັບທຸລະກິດໄດ້ຢ່າງມະຫາສານ ໂດຍບໍ່ຕ້ອງສົນໃຈກັບເລື່ອງ ສິນຄ້າລາຄາຖືກຄຸນພາບຕ່ຳ ປ່ຽນຈາກຕາເວັນຕົກດິນເປັນຕາເວັນຂຶ້ນ, ສ່ວນດ້ານຮູບແບບຂອງທຸລະກິດເສື້ອຜ້າມີດັ່ງນີ້:
1. ຮັບຜະລິດເສື້ອຜ້າ: ການຮັບຈ້າງຜະລິດເສື້ອຜ້າ ເປັນທຸລະກິດເສື້ອຜ້າແບບທີ່ດີທີ່ສຸດຂອງປະເທດເຮົາ ເພາະມັນເຄີຍເປັນທຸລະກິດທີ່ຈະເລີນຮຸ່ງເຮືອງຫຼາຍເປັນຕົ້ນແມ່ນຜ້າໄໝ, ໂຮງງານຕັດຫຍິບເສື້ອຜ້າສົ່ງອອກ ໂດຍສາມາດສ້າງລາຍໄດ້ເຂົ້າປະເທດສູງສົມຄວນ ແຕ່ປັດຈຸບັນກໍ່ທ້າທາຍຫຼາຍເພາະຄ່າແຮງນັບມື້ເພີ່ມ, ການແຂ່ງຂັນຈາກຕ່າງປະເທດກໍ່ສູງ ແລະ ທຸລະກິດນີ້ມັກຈະມີການຕັດລາຄາກັນ ເພາະວ່າທຸລະກິດນີ້ພຽງແຕ່ມີເງິນທຶນກໍ່ເຂົ້າມາເລີ່ມທຸລະກິດໄດ້ ແຕ່ຈະປະສົບ ຄວາມສຳເລັດ ຫຼື ບໍໍ່ ນັ້ນອີກເລື່ອງໜຶ່ງ.
2. ເປີດຮ້ານຂາຍເສື້ອຜ້າ: ໄລຍະ 5 – 10 ປີທີ່ຜ່ານມາ ການເປີດຮ້ານຂາຍເສື້ອຜ້າ ກໍ່ເປັນທຸລະກິດທີ່ເປັນທີ່ນິຍົມຢ່າງຫຼາຍໃນໝູ່ນິສິດນັກສຶກສາລວມທັງຄົນໄວເຮັດວຽກ, ພະນັກງານຫ້ອງການເພາະເລີ່ມຕົ້ນໄດ້ງ່າຍ ໃຊ້ເງິນລົງທຶນບໍ່ສູງບໍ່ຕ້ອງໃຊ້ການດູແລທີ່ຫຼາຍແຕ່ສ່ວນ ໃຫຍ່ກໍ່ຈະເປັນແບບຜ່ານມາ ແລ້ວກໍ່ຜ່ານໄປບໍ່ຄ່ອຍມີຮ້ານທີ່ຢູ່ໄດ້ດົນ.
3. ສ້າງຍີ່ຫໍ້ເສື້ອຜ້າຂອງຕົວເອງ: ມີ Brand ຍ່ອມດີກວ່າບໍ່ມີ Brand ການມີຍີ່ຫໍ້ຂອງຕົວເອງ ຍ່ອມດີກວ່າໄປໃຊ້ຍີ່ຫໍ້ຄົນອື່ນ ຫຼາຍຄົນຄິດແບບນັ້ນ ເລີຍເລືອກທີ່ຈະສ້າງ Brand ເສື້ອຜ້າຂຶ້ນມາເອງບໍ່ວ່າຈະເປັນເສື້ອຜ້າທີ່ຢູ່ໃນລະດັບ Premium ( ລະດັບສູງ ) ຫຼື ເສື້ອຜ້າທົ່ວໄປ ທຸລະກິດແບບນີ້ຈະຢືນໄລຍະໄດ້ດົນກວ່າ ແລະ ຢູ່ລອດ ສ້າງກຳໄລໄດ້ໃນໄລຍະຍາວ.
4. ຂາຍເສື້ອຜ້າ Online: ທຸລະກິດເສື້ອຜ້າແບບນີ້ເປັນຮູບແບບທີ່ນິຍົມທີ່ສຸດ ໃຜໆກໍ່ຫັນມາຈັບທຸລະກິດນີ້ ດ້ວຍການນຳເຂົ້າເສື້ອຜ້າມາຈາກປະເທດຈີນ ຫຼື ເກົາຫຼີ ແລ້ວກໍ່ນຳມາລົງໃນ Website ຂອງຕົນ ຫຼື ສ້າງພື້ນທີ່ນໍາສະເໜີຂຶ້ນມາໃນ facebook ກໍ່ເປັນອີກວິທີທີ່ດີພຽງແຕ່ວິທີນີ້ທ່ານອາດຈະຕ້ອງວົນກັບການສົ່ງສິນຄ້າແດ່, ສ່ວນຈຸດເດັ່ນຂອງທຸລະກິເສື້ອຜ້າມີດັ່ງນີ້:
– ລົງທຶນໜ້ອຍ: ຖ້າບໍ່ນັບທຸລະກິດເສື້ອຜ້າແບບທຳອິດ ເຊິ່ງຢູ່ລອດໄດ້ຍາກສຳລັບຜູ້ປະກອບການລາຍໃໝ່ແລ້ວ ທຸລະກິດເສື້ອຜ້າອີກ 3 ແບບ ລ້ວນແລ້ວແຕ່ໃຊ້ເງິນລົງທຶນທີ່ໜ້ອຍ ເມື່ອທຽບກັບທຸລະກິດທົ່ວໄປອາດຈະເລີ່ມຕົ້ນຕັ້ງແຕ່ຫຼັກລ້ານເຖິງຫຼັກຫຼາຍລ້ານ ຂຶ້ນຢູ່ກັບການຕົກແຕ່ງຮ້ານ, ສະຖານທີ່ ແລະ ປະລິມານສິນຄ້າທີ່ມີຂາຍ.
– ຕະຫຼາດເສື້ອຜ້າຜູ້ຍິງ: ມີກຳລັງຊື້ສູງ ທ່ານອາດຈະເຄີຍໄດ້ຍິນຄຳວ່າ “ ຜູ້ຍິງຢ່າຢຸດງາມ ” ນັ້ນເປັນເຫດຜົນທີ່ເຮັດໃຫ້ຜູ້ຍິງບໍ່ເຄີຍຮູ້ສຶກວ່າ ເສື້ອຜ້າທີ່ມີຢູ່ໃນຕູ້ນັ້ນພຽງພໍແລ້ວ ເມື່ອເຫັນເສື້ອຜ້າທີ່ສວຍງາມກໍ່ມັກຈະອົດໃຈຊື້ບໍ່ໄດ້ ນັ້ນເຮັດໃຫ້ທຸລະກິດເສື້ອຜ້າບໍ່ມີວັນຕາຍແນວໃດກໍ່ຂາຍໄດ້ເລື້ອຍໆ.
– ລູກຄ້າຕັດສິນໃຈຊື້ງ່າຍ: ໂດຍທົ່ວໄປ ເສື້ອຜ້າເປັນສິນຄ້າທີ່ມີລາ ຄາ ບໍ່ສູງປານໃດ ຫາກບໍ່ແມ່ນ Brand Name ລາຄາແພງ ຈຶ່ງເຮັດໃຫ້ລູກຄ້າຕັດສິນໃຈຊື້ໄດ້ງ່າຍ ເພາະໄດ້ໃຊ້ແທ້ ຫຼື ບາງທີອາດຈະໃຊ້ອາລົມຫຼາຍກວ່າເຫດຜົນໃນການຕັດສິນໃຈກໍ່ໄດ້ ນັ້ນເຮັດໃຫ້ທຸລະກິດເສື້ອຜ້າມີຄວາມໜ້າສົນໃຈ.
ທີ່ນໍາສະເໜີນີ້ກໍ່ເປັນຂໍ້ມູນດ້ານທຸລະກິດເສື້ອຜ້າ ເຫັນວ່າຍັງສາມາດຂາຍໄດ້ດີແຕ່ມາເບິ່ງບ້ານເຮົາ ທຸລະກິດນີ້ນັບມື້ນັບຫຼາຍ ແລະ ມີຊາວຄ້າຂາຍຈາກປະເທດເພື່ອນບ້ານເຂົ້າມາຈຶ່ງເຮັດໃຫ້ບາງຮ້ານຕ້ອງຢຸດໂຕໄປ. ສະນັ້ນ,ສະບັບໜ້າ ຈະສານຕໍ່ຫົວຂໍ້ທີ່ວ່າ “ ປັດໄຈສູ່ ຄວາມສຳເລັດຂອງທຸລະກິດເສື້ອຜ້າ ”.