ທ່ານນາຍົກ ເນັ້ນພັດທະນາເມືອງໂຂງໃຫ້ກາຍເປັນເມືອງພັດທະນາດີເດັ່ນ ພາຍໃນ 5 ປີຂ້າງໜ້າ

ໃນວັນທີ 9 ມັງກອນ 2017 ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມຄະນະ ໄດ້ເຄື່ອນໄຫວຢ້ຽມຢາມ ແລະ ພົບປະໂອ້ລົມ ຕໍ່ພະນັກງານຫຼັກແຫຼ່ງ ພາຍໃນເມືອງໂຂງ, ແຂວງຈຳປາສັກ ທີ່ສະໂມສອນໃຫຍ່ຂອງເມືອງດັ່ງກ່າວ. ກ່ອນອື່ນ, ຄະນະຂອງທ່ານນາຍົກລັດຖະມົນຕີ ໄດ້ຮັບຟັງການລາຍງານສະພາບການພັດທະນາເສດຖະກິດ-ສັງຄົໃນວັນທີ 9 ມັງກອນ 2017 ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມຄະນະ ໄດ້ເຄື່ອນໄຫວຢ້ຽມຢາມ ແລະ ພົບປະໂອ້ລົມ ຕໍ່ພະນັກງານຫຼັກແຫຼ່ງ ພາຍໃນເມືອງໂຂງ, ແຂວງຈຳປາສັກ ທີ່ສະໂມສອນໃຫຍ່ ຂອງເມືອງດັ່ງກ່າວ.

ໃນໂອກາດດຽວກັນ, ທ່ານນາຍົກລັດຖະມົນຕີ ກໍ່ໄດ້ແຈ້ງຈຸດປະສົງຂອງການເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງໂຂງໃນຄັ້ງນີ້ ພ້ອມທັງ ໄດ້ຍົກໃຫ້ເຫັນສະພາບຈຸດພິເສດ ແລະ ບັນດາທ່າແຮງຂອງເມືອງ ເປັນຕົ້ນ ເປັນເມືອງຊາຍແດນ ມີທາງອອກສູ່ຕ່າງປະເທດ, ເປັນເມືອງທົ່ງພຽງ, ມີສາຍນໍ້າ ແລະ ເກາະດອນ ຈຳນວນຫຼວງຫຼາຍ, ມີປ່າໄມ້ ແລະ ທົ່ງນາ ທີ່ກວ້າງຂວາງ, ສິ່ງແວດລ້ອມສົດຊື່ນ, ທໍາມະຊາດສວຍສົດງົດງາມ, ມີແຫຼ່ງທ່ອງທ່ຽວທາງທຳມະຊາດທີ່ລືຊື່ ແລະ ຫຼວງຫຼາຍ… ຈາກບັນດາເງື່ອນໄຂທ່າແຮງເຫຼົ່ານັ້ນຖືໄດ້ວ່າ ເມືອງໂຂງເປັນໜຶ່ງໃນເມືອງທີ່ມີ ຄວາມອຸດົມສົມບູນອັນດັບຕົ້ນໆຂອງປະເທດ ກໍ່ວ່າໄດ້, ທີ່ສຳຄັນເຫັນວ່າ ບັນຍາກາດການທ່ອງທ່ຽວ ຢູ່ໃນເຂດເມືອງໂຂງ ນັບມື້ມີຄວາມຄຶກຄື້ນ ອັນເປັນເງື່ອນໄຂໃຫ້ແກ່ການພັດທະນາ ເສດຖະກິດ-ສັງຄົມຂອງເມືອງ ໃຫ້ມີການຂະຫຍາຍຕົວຢ່າງໄວວາ, ວຽກງານຮອບດ້ານ ໄດ້ຮັບການປັບປຸງດີຂຶ້ນເປັນກ້າວໆ.

ໃນຕອນທ້າຍ, ທ່ານນາຍົກລັດຖະມົນຕີ ໄດ້ມີຄຳເຫັນເຈາະຈີ້ມ ແລະ ເນັ້ນໜັກໃຫ້ຄະນະພັກ-ຄະນະນຳຂອງເມືອງໂຂງ ກໍ່ຄື ຂະແໜງການທີ່ກ່ຽວຂ້ອງ ເອົາໃຈໃສ່ຕື່ມບາງດ້ານ ເປັນຕົ້ນ ກວດກາຄືນ ແຜນພັດທະນາເສດຖະກິດ-ສັງຄົມຂອງເມືອງ ໂດຍສະເພາະ ແຜນປີ, ແຜນ 5 ປີ, ຍຸດທະສາດການພັດທະນາ ຮອດປີ 2025 ແລະ ວິໄສທັດ ຮອດປີ 2030 ທີ່ໄດ້ກຳນົດແລ້ວນັ້ນ ສອດຄ່ອງກັບເງື່ອນໄຂ, ທ່າແຮງ ແລະ ແທດເໝາະກັບຄວາມສາມາດຕົວຈິງ ຄືແນວໃດ, ຈຸດໃດ-ບັນຫາໃດ ບໍ່ທັນແທດເໝາະ ແມ່ນໃຫ້ສົມທົບກັບພາກສ່ວນທີ່ກ່ຽວຂ້ອງຂັ້ນແຂວງ ຊ່ວຍປັບປຸງຄືນ ໃຫ້ສຳເລັດໂດຍໄວ ແລະ ພ້ອມກັນຈັດຕັ້ງປະຕິບັດໃຫ້ມີ ໝາກມີຜົນ, ນຳເອົາຜົນປະໂຫຍດສູງສຸດ ມາສູ່ເມືອງ ກໍ່ຄື ແຂວງຂອງຕົນ; ໃຫ້ເອົາໃຈໃສ່ຮັກສາຄວາມສະຫງົບ, ຄວາມເປັນລະບຽບຮຽບຮ້ອຍໃນສັງຄົມ ດ້ວຍຄວາມເປັນເຈົ້າການ, ມີສະຕິລະວັງຕົວ ຕໍ່ກົນອຸບາຍ ຂອງພວກທີ່ບໍ່ຫວັງດີ, ສະກັດກັ້ນ ແລະ ແກ້ໄຂບັນດາປະກົດການຫຍໍ້ທໍ້ຕ່າງໆ ໃຫ້ໄດ້ຢ່າງທັນການ ຕິດພັນກັບ ການປົກປັກຮັກສາປ່າໄມ້ ແລະ ສິ່ງແວດລ້ອມ ໃຫ້ມີຄວາມຍືນຍົງ; ເອົາໃຈໃສ່ວຽກລົງກໍ່ສ້າງຮາກຖານຢ່າງແຂງແຮງ, ຕິດແທດກັບປະຊາຊົນ ຢ່າງແທ້ຈິງ ແລະ ສ້າງບ້ານໃຫຍ່ ໃຫ້ກາຍເປັນຕົວເມືອງນ້ອຍໃນຊົນນະບົດ ໃຫ້ເພີ່ມຂຶ້ນເປັນກ້າວໆ; ເພີ່ມທະວີຄວາມສາມັກຄີ ໃຫ້ເປັນປຶກແຜ່ນແໜ້ນໜາ, ພ້ອມກັນປົກປັກຮັກສາ ແລະ ສ້າງສາພັດທະນາເມືອງຂອງຕົນ ໃຫ້ກາຍເປັນເມືອງພັດທະນາດີເດັ່ນ ພາຍໃນ 5 ປີຂ້າງໜ້າ.

ໃນມື້ດຽວກັນ, ຄະນະຂອງທ່ານນາຍົກລັດຖະມົນຕີ ຍັງໄດ້ໄປຢ້ຽມຢາມ ໂຮງສີເຂົ້າທັນສະໄໝ ຂອງວິສາຫະກິດຫຸ້ນສ່ວນລາວ-ອິນໂດຈາຍນາ ຈຳກັດ ແລະ ສວນໝາກມ່ວງຫິມະພານ ຂອງບໍລິສັດ ດັກລັກ ຣັບເບີ ຈໍາກັດ ທີ່ຢູ່ພາຍໃນເມືອງໂຂງ ຕື່ມອີກ.

ແຫລ່ງ: ກົມປະຊາສຳພັນ ຫສນຍ