ຜູ້ປະກອບການທີ່ໄດ້ຮັບລາງວັນນັກທຸລະກິດດີເດັ່ນໃນປີ 2016

+ ບໍລິສັດ ສີເມືອງກຣຸບ ຈຳກັດ

ເມື່ອທ້າຍເດືອນ ກໍລະກົດ 2016 ຜ່ານມາ, ສະພາການຄ້າ ແລະ ອຸດສາຫະກຳແຫ່ງຊາດລາວ ( ສຄອ ) ຈັດງານມອບລາງວັນໃຫ້ຜູ້ທີ່ມີຜົນງານດີເດັ່ນໃນການປະກອບສ່ວນສ້າງສາພັດທະນາ ສປປ ລາວ ຄົບຮອບ 40 ປີ ແລະ ມອບລາງວັນໃຫ້ກັບນັກທຸລະກິດດີເດັ່ນ ເພື່ອເປັນຂວັນ ແລະ ກຳລັງໃຈໃຫ້ແກ່ຜູ້ທີ່ມີຜົນງານໄດ້ສືບຕໍ່ສ້າງຜົນງານຂອງຕົນໃຫ້ດີຂຶ້ນກວ່າເກົ່າ ເຊິ່ງລາງວັນນັກທຸລະກິດດີເດັ່ນປະຈໍາປີ¬ 2016 ມີຈຳນວນ 46 ລາງວັນ. ໃນນັ້ນ, ບໍລິສັດ ສີເມືອງ ກຣຸບ ຈຳກັດ ກໍ່ເປັນໜຶ່ງໃນຈຳນວນບໍລິສັດດັ່ງກ່າວທີ່ໄດ້ຮັບລາງວັນອັນຊົງກຽດນີ້.
ທ່ານ ເອກະພັນ ພະພິທັກ ປະທານ ບໍລິສັດ ສີເມືອງກຣຸບ ຈຳກັດ ໃຫ້ສຳພາດວ່າ: ສຳລັບຜົນງານພົ້ນເດັ່ນນັບແຕ່ສ້າງຕັ້ງບໍລິສັດມາແຕ່ປີ 2000 ມາເຖິງປັດຈຸບັນ ກໍ່ໄດ້ສ້າງຜົນງານຫຼາຍດ້ານໃນການປະກອບສ່ວນເຂົ້າໃນການພັດທະນາສ້າງສາປະເທດຊາດ ເປັນຕົ້ນແມ່ນ: ການປະກອບສ່ວນທາງດ້ານພື້ນຖານໂຄງລ່າງ, ຖະໜົນຫົນທາງ ແລະ ຂະຫຍາຍທຸລະກິດຮອບດ້ານ; ມາຮອດປັດຈຸບັນພວກເຮົາມີ 8 ບໍລິສັດໃນເຄືອປະກອບມີ: ບໍລິສັດຮັບເໝົາກໍ່ສ້າງຂົວທາງ, ບໍລິສັດ ສຳຫຼວດ – ອອກແບບ, ບໍລິສັດທີ່ປຶກສາກົດໝາຍ ແລະ ການລົງທຶນ, ບໍລິສັດ ລາວອິນເຕີ ໂອໂຕກຣຸບ, ບໍລິສັດ ອະສັງຫາລິມະຊັບ, ບໍລິສັດ ທີ່ປຶກສາວິສະວະກຳພະລັງງານ ແລະ ບໍ່ແຮ່, ທະນາຄານຮ່ວມພັດທະນາ ແລະ ບໍລິສັດ ວຽງຈັນປະກັນໄພ. ນອກນັ້ນ, ຍັງມີບໍລິສັດການຄ້າຂາເຂົ້າ – ຂາອອກ ແລະ ເຂື່ອນໄຟຟ້ານ້ຳຕົກໃນແຫ່ງຕ່າງໆຕາມທິດທາງຂອງລັດຖະບານໃຫ້ປະເທດລາວກາຍເປັນໝໍ້ໄຟແຫ່ງອາຊຽນ ເຊິ່ງເຂື່ອນໄຟຟ້ານ້ຳຕົກໄດ້ກໍ່ສ້າງສຳເລັດຢູ່ແຂວງບໍລິຄຳໄຊ, ສ່ວນເຂື່ອນໄຟຟ້ານ້ຳຮຸ່ງ ແຂວງໄຊຍະບູລີ ກໍ່ກຳລັງກໍ່ສ້າງຢູ່ ແລະ ອີກໜຶ່ງເຂື່ອນແມ່ນເຂື່ອນໄຟຟ້າເຊລະນອງ ແຂວງສະຫວັນນະເຂດ

 

ທ່ານ ທະນົງສັກ ສຸກສະວັດ ( ຊ້າຍມື )

+ ບໍລິສັດ ລາວໄອທີພັດທະນາ ຈຳກັດ

ບໍລິສັດ ລາວໄອທີພັດທະນາ ຈຳກັດ ເປັນບໍລິສັດໃຫ້ບໍລິການທາງດ້ານໄອທີ ລົງເລິກສະເພາະພັດທະນາຊ໊ອຟແວຣ໌ເປັນເປົ້າໝາຍຫຼັກ ເພື່ອຕອບສະໜອງ ຄວາມຕ້ອງການຂອງລູກຄ້າ ບໍ່ວ່າຈະເປັນແອັບພລິເຄຊັນ, ລະບົບຖານຂໍ້ມູນ, ລະບົບຄຸ້ມຄອງເອກະສານ, ລະບົບຈັດການອິນເຕີເນັດ, ໂປຣແກຣມນຳໃຊ້ສະເພາະດ້ານ, ພັດທະນາເວັບໄຊຕ່າງໆໃຫ້ກັບພາກລັດ ແລະ ເອກະຊົນ. ນອນນັ້ນ, ຍັງພັດທະນາຊ໊ອຟແວຣ໌ທີ່ເປັນພາສາລາວ ເພື່ອໃຫ້ຄົນລາວນຳໃຊ້ສະດວກສະບາຍຍິ່ງຂຶ້ນ. ຈາກຜົນງານພົ້ນເດັ່ນທີ່ຢູ່ພາຍໃນ ແລະ ການແຂ່ງຂັນໃນລະດັບໂລກ ຈຶ່ງເປັນທີ່ຮູ້ຈັກຢ່າງ ກວ້າງຂວາງຂອງຜູ້ນຳໃຊ້ລະບົບໄອທີ ເຮັດໃຫ້ຖືກຄັດເລືອກເປັນໜຶ່ງໃນຈຳນວນ 46 ບໍລິສັດ ທີ່ໄດ້ຮັບລາງວັນນັກທຸລະກິດດີເດັ່ນປະຈຳປີ 2016.
ທ່ານ ທະນົງສັກ ສຸກສະວັດ ຜູ້ອຳນວຍການ ບໍລິສັດ ລາວໄອທີພັດທະນາ ຈຳກັດ ກ່າວວ່າ: ບໍລິສັດພວກເຮົາສ້າງຕັ້ງຂຶ້ນໃນປີ 2010 ຜ່ານການດຳເນີນທຸລະກິດມາເຖິງ 6 ປີ ເຮົາມີຜົນງານພົ້ນເດັ່ນຫຼາຍດ້ານ ໂດຍສະເພາະໃນເດືອນພະຈິກ 2012, ບໍລິສັດໄດ້ຮັບລາງວັນ ໂລ້ຄຳ ຈາກການປະກວດ ASEAN ICT Awards 2012 ທີ່ປະເທດຟີລິບປິນ ໂດຍຜົນງານທີ່ໄດ້ຮັບແມ່ນວາລະສານ ອີ – ຄໍເນີ ( e – Corner Online Magazine ) ໃນປະເພດ Digital Contents ແລະ ຜົນງານດັ່ງກ່າວຍັງໄດ້ຖືກຄັດເລືອກໃຫ້ເປັນຜົນງານຂອງປະເທດລາວ ໄປຮ່ວມງານແຂ່ງຂັນລະດັບໂລກໃນງານ World Summit Award 2013 ໃນໝວດ e – Media & Journalism; ໃນ 2015 ພວກເຮົາກໍ່ໄດ້ສົ່ງຜົນງານ www.handtalklao.org ເຂົ້າປະກວດໃນງານ World Summit Award ( WSA ) ໃນປະເພດ e – Health & Well Being ເຊິ່ງເປັນຜົນງານທີ່ໂດດເດັ່ນໃນຂົງເຂດອາຊີຕາເວັນອອກສ່ຽງໃຕ້ ຖືກສະເໜີຊື່ ໂດຍຜູ້ຊ່ຽວຊານຈາກທົ່ວໂລກໃຫ້ຜ່ານເຂົ້າຮອບ ແລະ ໄດ້ລາງວັນ ໂດຍມີພຽງແຕ່ 5 ບໍລິສັດໃນອາຊຽນ ຄື: ສິງກະໂປ 3 ບໍລິສັດ, ຟີລິບປິນ 1 ບໍລິສັດ ແລະ ສປປ ລາວ ກໍ່ແມ່ນບໍລິສັດເຮົາ, ສ່ວນງານແຂ່ງຂັນແມ່ນຈັດຂຶ້ນປີ 2015 ແຕ່ພິທີຮັບລາງວັນແມ່ນຈັດຂຶ້ນໃນປີ 2016. ນອກນັ້ນ, ພວກເຮົາກໍ່ຍັງມີຜົນງານດ້ານການພັດທະນາຊ໊ອຟແວຣ໌ ແລະ ຮັບໃຊ້ງານສຳຄັນຕ່າງໆຂອງຊາດທີ່ລາວເຮົາເປັນເຈົ້າພາບຕື່ມອີກ.