ເຈົ້າໜ້າທີ່ການຄ້າແຂວງບໍລິຄຳໄຊ ກວດພົບເຫັນສິນຄ້ານຳເຂົ້າມີສານພິດເຈືອປົນ ແລະ ເສຍຄຸນ ໃນທ້ອງຕະຫຼາດ

 

ໃນວັນທີ 20-21 ທັນວານີ້ ເຈົ້າຫນ້າທີ່ກວດກາສິນຄ້າຂະແໜງການຄ້າພາຍໃນ ພະແນກອຸດສາຫະກຳ ແລະ ການຄ້າແຂວງບໍລິຄຳໄຊ ນຳໂດຍ ທ່ານ ລິດທະນາ ຄຳຈັນດີ ຫົວໜ້າໜ່ວຍງານປົກປ້ອງຜູ້ຊົມໃຊ້ ແລະ ທ່ານ ປາໂມດ ເລືອງຕະກຸນ ຫົວໜ້າໜ່ວຍງານກວດກາການຄ້າ ສົມທົບກັບຄະນະກຳມະການປົກປ້ອງຜູ້ຊົມໃຊ້ຂັ້ນແຂວງ, ເມືອງປາກຊັນ ແລະ ພະນັກງານຈາກພະແນກການທີ່ກ່ຽວຂ້ອງໄດ້ ໄດ້ລົງກວດກາສິນຄ້ານຳເຂົ້າ ແລະ ສິນຄ້າໝົດອາຍຸໃນທົ່ວເທດສະບານເມືອງປາກຊັນ ເປັນຕົ້ນ ສະຖານທີ່ຕະຫຼາດປາກຊັນໃໝ່,ຕະຫຼາດປາກຊັນເກົ່າບ້ານໂພໄຊ,ຫ້າງຮ້ານ ແລະ ຮ້ານຂາຍເຂົ້າໜົມຕາມໂຮງຮຽນອະນຸບານໃນເທດສະບານແຂວງ.
ໃນນັ້ນຄະນະກຳມະການໄດ້ແບ່ງເປັນ 2 ທີມງານຄື: ທີມງານ 1 ແມ່ນກວດກາສະເພາະສິນຄ້າປະເພດເຄື່ອງໃນສັດ, ຊີ້ນສົດ,ປາທະເລສົດ,ເຫັດເຂັມສົດ,ຕາຊັ່ງຜອງທີ່ບໍ່ໄດ້ມາດຕະຖານ ແລະ ທີມທີ່ 2 ກວດກາເຄື່ອງບໍລິໂພກເຊັ່ນ: ເຂົ້າໜົມ, ນົມ, ເຄື່ອງດືມປະເພດນ້ຳຫວານ ແລະ ອື່ນໆ.. ຜ່ານການກວດກາຕົວຈິງໄດ້ພົບເຫັນສິນຄ້ານຳເຂົ້າທີ່ມີສານຜິດເຈືອປົນ ແລະ ໝົດອາຍຸ-ເສຍຄຸນຈຳນວນຫຼາຍເປັນຕົ້ນ:ປາມຶກສົດ 30 ກວ່າກິໂລກະລາມ,ເຫັດເຂັມສົດ100 ກວ່າກິໂລກະລາມ ແລະ ຕາຊັ່ງຜອງທີ່ດັດແປງນໍ້າໜັກບໍ່ໄດ້ມາດຕະຖານ 6 ໜ່ວຍ.ໃນນີ້ຍັງມີເຄື່ອງດື່ມ,ເຄື່ອງສຳອາງ,ເຂົ້າໜົມ,ໝີ່ສຳເລັດຮູບ ແລະ ເຄື່ອງປະກອບອາຫານເປັນຈຳນວນຫຼາຍ.


ເຄື່ອງອຸປະໂພກ ບໍລິໂພກ ທີ່ໄດ້ກວດພົບ ທາງເຈົ້າໜ້າທີ່ໄດ້ຢຶດເກັບໄວ້ຢູ່ພະແນກອຸດສາຫະກຳ ແລະ ການຄ້າແຂວງເພື່ອລໍຖ້າຜູ້ປະກອບການ ນຳໄປປ່ຽນຢູ່ຕົວແທນທີ່ນຳເຂົ້າ ຖ້າຫາກກາຍກຳນົດ 10 ວັນແມ່ນທຳລາຍຕາມລະບຽບການ. ສ່ວນຜູ້ປະກອບການແມ່ນໄດ້ສຶກສາອົບຮົມການເມືອງແນວຄິດໃຫ້ຮັບຮູ້ ແລະ ເຂົ້າໃຈເຖິງລະບຽບກົດໝາຍໃນບັນດານິຕິກຳທີ່ກ່ຽວຂ້ອງ ພ້ອມເຮັດບົດບັນທຶກໄວ້ເປັນຫຼັກຖານ ແລະ ປັບໃຫມ ຕາມລະບຽບຂອງລັດ.