ລາວ-ຫວຽດນາມ ຈະສ້າງ​ເສັ້ນທາງ​ດ່ວນ​ວຽງ​ຈັນ​-ຮ່າ​ໂນ້ຍ

 

ກອງປະຊຸມພົບປະສອງຝ່າຍ ລະຫວ່າງກະຊວງ ​ໂຍທາ​ທິການ ​ແລະ ຂົນ​ສົ່ງ ແຫ່ງ ສປປ ລາວ ແລະ ກະຊວງຄົມມະນາຄົມ-ຂົນ​ສົ່ງ ແຫ່ງ ສສ ຫວຽດນາມ ​ໄດ້​ຈັດ​ຂື້ນ​ທີຫ້ອງ​ປະຊຸມ​ໃຫຍ່ກະຊວງ ​ໂຍທາ​ທິການ ​ແລະ ຂົນ​ສົ່ງ ເມື່ອບໍ່ດົນຜ່ານມາ ໂດຍການ​ເຂົ້າ​ຮ່ວມ​ຂອງ​ ສະຫາຍ  ບຸນ​ຈັນ ສິນ​ທະ​ວົງ ກຳມະການ​ສູນ​ກາງ​ພັກ ປະຊາຊົນ​ປະຕິວັດ​ລາວ, ​ລັດຖະມົນຕີ​ກະຊວງ ​ໂຍທາ​ທິການ ​ແລະ ຂົນ​ສົ່ງ ແຫ່ງ ສປປ ລາວ ພ້ອມ​ດ້ວຍ​ຄະນະ ​ແລະ ສະຫາຍ ​ເຈືອງ ກວາງ ​ເງ້ຍ ກຳມະການ​ສູນ​ກາງ​ພັກຄອມ​ມູນິດ ຫວຽດນາມ, ​ລັດຖະມົນຕີ​ກະຊວງຄົມມະນາຄົມ-ຂົນ​ສົ່ງ ​ແຫ່ງ ສສ ຫວຽດນາມ ພ້ອມ​ດ້ວຍ​ຄະນະ.

ກອງປະຊຸມພົບປະສອງຝ່າຍ ລະຫວ່າງ ກະຊວງ ​ໂຍທາ​ທິການ ​ແລະ ຂົນ​ສົ່ງ ແຫ່ງ ສປປ ລາວ ແລະ ກະຊວງຄົມມະນາຄົມ-ຂົນ​ສົ່ງ ແຫ່ງ ສສ ຫວຽດນາມໃນຄັ້ງນີ້ ເພື່ອເປັນການສືບຕໍ່ຈັດ ຕັ້ງຜັນຂະຫຍາຍບົດບັນທຶກສອງ​ລັດຖະບານ ລາວ-ຫວຽດນາມ ກ່ຽວກັບຍຸດທະສາດການຮ່ວມມື ດ້ານຄົມມະນາຄົມ-ຂົນສົ່ງ ໄລຍະແຕ່ປີ 2016-2025, ວິ​ໄສທັດຮອດປີ 2030, ທົບທວນການຈັດຕັ້ງປະຕິບັດ ບັນດາໂຄງການທີ່ສອງກະຊວງ ກໍ່ຄືສອງຂະແໜງ ການຄົມ ມະນາຄົມ-ຂົນສົ່ງ ທີ່ໄດ້ຕົກລົງນຳກັນຜ່ານມາ, ລວມທັງແຜນການຮ່ວມມືໃນຕໍ່ໜ້າ ຈຸດປະສົງຕົ້ນຕໍຂອງການພົບປະ ລະຫວ່າງ ສອງກະຊວງໃນຄັ້ງນີ້ແມ່ນເພື່ອສຸມໃສ່ ຜັນຂະຫຍາຍເນື້ອໃນການຕົກລົງຮ່ວມມື ລະຫວ່າງ ສອງລັດຖະບານ ລາວ-ຫວຽດນາມ ໃຫ້ປະກົດຜົນເປັນຈິງ. ພ້ອມ​ດຽວ​ກັນ​ນັ້ນ ທັງ​ສອງຝ່າຍ​ຍັງ​ພັດ​ປ່ຽນ​ກັນ​ສະ​ເໜີ​ສະພາບ​ການ​ຮ່ວ​ມມື ດ້ານ​ຄົມມະນາຄົມ-ຂົນ​ສົ່ງ ລະຫວ່າງ ລາວ ​ແລະ ຫວຽດນາມ ທີ່​ພົ້ນ​ເດັ່ນ​ໃນ​ໄລຍ​ະຜ່ານ​ມາ​ໃຫ້​ທັງ​ສອງ​ຝ່າຍໄດ້​ຮັບ​ຊາບ​ຄື: ສະພາບ​ການ​ພັດທະນາ​ດ້ານ​ເສດຖະກິດ-ສັງຄົມ, ຂະ​ແໜງ​ການ​ຄົມມະນາຄົມ-ຂົນ​ສົ່ງ ຂອງ​ສອງ​ປະ​ເທດ ​ໃນ​ໄລຍະ​ຜ່ານ​ມາ, ​ເພື່ອແນ່​ໃສ່​ເຮັດ​ໃຫ້ການ​ຄົມມະນາຄົມ-ຂົນ​ສົ່ງ ຂອງ​ສອງ​ປະ​ເທດ​ສາມາດ​ເຊື່ອມ​ໂຍ​ງ​ເຂົ້າກັນ.

 

ຫຼັງຈາກ​ນັ້ນ​ ຝ່າຍ​ລາວ​ຍັງ​ໄດ້​ລາຍ​ງານການ​ເຊັນ​ເອກະສານ 2 ສະບັບ​ຄື: ຂໍ້​ຕົກລົງ​ວ່າ​ດ້ວຍ​​ແຜນການ​ຮ່ວມ​ມື​ດ້ານ​ຄົມມະນາຄົມ-ຂົນ​ສົ່ງ ລາວ-ຫວຽດນາມ ​ໄລຍະ 5 ປີ(2016-2020) ​ແລະ ຂໍ້ຂໍ້​ຕົກລົງ​ວ່າ​ດ້ວຍ​​ການ​ລົງທຶນ​ກໍ່ສ້າງ​ເສັ້ນທາງ​ດ່ວນ​ວຽງ​ຈັນ​-ຮ່າ​ໂນ້ຍ; ​ເອກະສານ​ສອງ​ສະບັບ​ດັ່ງກ່າວ ​ແມ່ນ​ມີ​ຄວາມ​ສຳຄັນ​ເປັນ​ຢ່າງ​ຍິງ ຊຶ່ງ​ເປັນ​ເອກະສານ​ນິຕິ​ກຳ​ໃຫ້​ແກ່​ສອງ​ກະຊວງ ນຳ​ມາ​ເປັນ​ບ່ອນ​ອີງ​ໃນ​ການ​ຜັນ​ຂະຫຍາ​ຍວຽກ​ງານ​ຮ່ວມ​ມືດ້ານ​ຄົມມະນາຄົມ-ຂົນ​ສົ່ງ ລາວ-ຫວຽດນາມ ​ໃນ​ໄລຍະ 5 ປີ ​ແລະ ປະຈຳ​ປີ 2017;

ໂດຍສະ​ເພາະໂຄງການກໍ່ສ້າງເສັ້ນທາງດ່ວນ ວຽງຈັນ-ນະຄອນຫຼວງຮ່າໂນ້ຍ ທີ່​ຈຳ​ເປັນ​ຕ້ອງ​ໄດ້​ສຸມ​ກຳລັງ​ແຮງ ​ໃນ​ຫຼາຍ​ດ້ານ​ຮ່ວມ​ກັນ​ທັງ​ສອງ​ຝ່າຍ ​ເພື່ອ​ໃຫ້ສາມາດຈັດ​ຕັ້ງ​ປະຕິບັດ​ໂຄງການດັ່ງກ່າວ ໃຫ້ປະກົດຜົນເປັນຈິງ; ​ແລວ​ທາງ​ດ່ວນ​ເຊື່ອມ​ຕໍ່ ວຽງ​ຈັນ-ປາກ​ຊັນ-ນ້ຳ​ອ່ອນ-​ແທັງ​ຖຸຍ-ຮ່າ​ໂນ້ຍ;ໂຄງການກໍ່ສ້າງ​ເສັ້ນທາງແຕ່ພູທິດເຜິ້ງ ຫາ ນາຊອນ; ໂຄງການກໍ່ສ້າງເສັ້ນ ທາງແຕ່ຊຳໃຕ້-ທ່າເຫຼົ້າ ແລະ ນາຊາງ-ທົ່ງທູ້ ແຂວງຫົວພັນ; ຂໍ້ສະເໜີໂຄງການຍົກລະດັບ ແລະ ປັບປຸງ ທາງຫຼວງເລກທີ 18B ຂອງອຳນາດການປົກຄອງ ແຂວງອັດຕະປື (ລາວ) ແລະ ຄະນະກຳມະການປະຊາຊົນ ແຂວງກອນຕູມ (ຫວຽດນາມ); ສະໜາມບິນໜອງຄ້າງ ແຂວງຫົວພັນ;​ ຂໍ້ສະເໜີຂອງບໍລິສັດ ຫວຽດເຈັດແອ ເພື່ອດຳເນີນທຸລະກິດການບິນ ຢູ່ ສປປ ລາວ; ການສົ່ງເສີມບໍລິສັດຂອງທັງສອງຝ່າຍຮ່ວມທຸລະກິດການຂົນສົ່ງສິນຄ້າຮ່ວມກັນ (ການເປີດ​ເສັ້ນທາງຂົນ​ສົ່ງ​ໂດຍສານ​ປະຈຳ​ທາງ ຮ່າຕິ້ງ(ສສ ຫວຽດນາມ)-ຄຳ​ມ່ວນ (ສປປ ລາວ)-ນະຄອນ​ພະນົມ(ປະ​ເທດ​ໄທ) ​ແລະ​ ກັບຄືນ; ການ​ຊຸກ​ຍູ້​ສົ່ງ​ເສີມ ​ໃຫ້​ບັນດາ​ດ່ານ​ຊາຍ​ແດນ ລາວ-ຫວຽດນາມ ​ເພີ່​ມຊົ່ວ​ໂມງ​ເຮັດ​ວຽກຂື້ນ​ຕື່ມ; ການ​ບໍລິການ ”ຈຸດ​ດຽວ, ປອງ​ດຽວ” ທີ່​ດ່ານ​ຊາຍ​ແດນ ​ແດນ​ສະຫວັນ-ລາວ​ບາວ; ກາ​ນຕິດຕາມ​ວຽກ​ງານ​ຄຸ້ມ​ຄ້ອງທ່າເຮືອຫວຸ້ງອ່າງ ແຂວງຮ່າຕິ້ງ, ສສ ຫວຽດນາມ; ການ​ປັບປຸງ​ແຜນຜັງ​ແມ່​ບົດ​ຂອງ​ທ່າ​ເຮືອ​ຮອນ​ລາ ​ແລະ ລະບົບທໍ່​ສົ່ງ​ນ້ຳມັນ ​ແຕ່​ແຂວງ​ກວາງ​ບິງ-​ແຂວງ​ຄຳ​ມ່ວນ ​ແລະ ການສ້າງຂີດຄວາມສາມາດ ໃຫ້ແກ່ບຸກຄະລາກອນ ຂອງຂະແໜງການໂຍທາທິການ ແລະ ຂົນສົ່ງ ສປປ ລາວ.

 

ຮູບພາບ ແລະແຫລ່ງຂ່າວຈາກ:

http://www.mpwt.gov.la/