ທ່ານລຽນ ທິແກ້ວ ສັ່ງຢຸດຕິຊົ່ວຄາວການສີດພົ່ນຢາຂ້າເຊື້ອໃສ່ພາຫະນະ ແລະເຊົາເກັບຄ່າບໍລິການ

ຫ້ອງວ່າການສຳນັກງານນາຍົກລັດຖະມົນຕີ ໄດ້ອອກແຈ້ງການເລກທີ 1809/ຫສນຍ.ກສສ ລົງວັນທີ 17 ພະຈິກ 2016 ຕາມການຕົກລົງ ແລະ ຊີ້ນຳຂອງທ່ານ ນາຍົກລັດຖະມົນຕີ ເຖິງກະຊວງກະສິກຳ ແລະປ່າໄມ້ ໂດຍເຫັນດີໃຫ້ສືບຕໍ່ສີດຢາຂ້າເຊື້ອພະຍາດໃສ່ພາຫະນະຢູ່ຕາມບັນດາດ່ານຊາຍແດນທີ່ມີການລະບາດຂອງພະຍາດ ຢູ່ໃນປະເທດເພື່ອນບ້ານ, ສ່ວນເວລາ ແລະ ດ່ານຊາຍແດນທີ່ບໍ່ມີການລະບາດພະຍາດ ກໍ່ບໍ່ຈຳເປັນສີດ;ການສີດແມ່ນບໍ່ໃຫ້ເກັບເງິນນຳເຈົ້າຂອງພາຫະນະ ຄວນນຳໃຊ້ງົບປະມານຂອງລັດ ເພາະຜ່ານມາ ມີຊ່ອງຫວ່າງຫຼາຍ ແລະ ມີຫາງສຽງຈາກສັ່ງຄົມຈົ່ມວ່າຫຼາຍ. ມອບໃຫ້ກະຊວງກະສິກຳ ແລະ ປ່າໄມ້ ໄລ່ລຽງຄືນວ່າ ງົບປະມານນຳໃຊ້ຕໍ່ປີເທົ່າໃດ ແລ້ວລາຍງາຍລັດຖະບານເພື່ອພິຈາລະນາ.

ພາຍຫຼັງທີ່ໄດ້ມີແຈ້ງການດັ່ງກ່າວ ປະຊາຊົນຜູ້ທີ່ເດີນທາງເຂົ້າ-ອອກ ໂດຍສະເພາະແມ່ນຂາເຂົ້າ ດ່ານຂົວມິດຕະພາບລາວໄທແຫ່ງທີ 1 ຕ່າງກໍພາກັນດີໃຈວ່າຈະບໍ່ໄດ້ເສຍຄ່າບໍລິການດັ່ງກ່າວ ແຕ່ກົງກັນຂ້າມ ເຖິງຈະມີແຈ້ງການອອກມາເກືອບເດືອນແລ້ວກໍຕາມ ແຕ່ຍັງໄດ້ເກັບຄ່າບໍລິການຕາມປົກກະຕິ.
ໃນວັນທີ 13 ທັນວາ 2016 ທ່ານລຽນ ທິແກ້ວ ລັດຖະມົນຕີກະຊວງກະສິກຳ ແລະ ປ່າໄມ້ ໄດ້ໃຫ້ສຳພາດ ຕໍ່ສື່ມວນຊົນ ກ່ຽວກັບການຈັດຕັ້ງປະຕິບັດແຈ້ງການດັ່ງກ່າວວ່າ: ພວກເຮົາກໍໄດ້ມີແຜນປັບປຸງລະບົບສີດພົ່ນຢາຂ້າເຊື້ອພະຍາດໃສ່ພາຫະນະໃຫ້ທັນສະໄໝຄືນໝົດ ໂດຍເວລາສີດຈະເຮັດໃຫ້ປະຊາຊົນທີ່ຜ່ານໄປມາບໍ່ຮູ້ສຶກວ່າໄດ້ມີການສີດຢາ ແຕ່ໂຕຈິງໄດ້ມີການສີດຢາແທ້ ແລະ ຈະຢຸດເກັບຄ່າບໍລິການເດັດຂາດທຸກດ່ານທົ່ວປະເທດໃນໄວໆນີ້.
ທ່ານ ກ່າວຕື່ມວ່າ: ໃນໄລຍະຜ່ານມາ ບໍ່ມີງົບປະມານ ສະນັ້ນ ຈຶ່ງຈຳເປັນຕ້ອງໄດ້ເກັບເປັນຄ່າທຳນຽມ , ການເກັບແມ່ນຄັ້ງລະ 5 ພັນກີບ. ເງິນຄ່າທຳນຽມທີ່ໄດ້ມານັ້ນ ສ່ວນໜຶ່ງແມ່ນນຳໃຊ້ຊື້ຢາ, ໃຊ້ເຂົ້າໃນການບໍລິຫານ ແລະ ນຳໃຊ້ເຂົ້າຄ່າໃຊ້ຈ່າຍຕ່າງໆທີ່ຈຳເປັນ ແລະ ສ່ວນໜຶ່ງແມ່ນໃຊ້ຈ່າຍຢູ່ດ່ານອື່ນໆນຳ.
ມາໃນວັນທີວັນທີ14 ທັນວາ2016 ທ່ານລັດຖະມົນຕີ ກະຊວງກະສິກຳແລະປ່າໄມ້ ໄດ້ອອກຄຳສັງ ເລກທີ 3773/ກປ ເຖິງທ່ານຫົວໜ້າກົມປູກຝັງ, ທ່ານຫົວໜ້າກົມລ້ຽງສັດ ແລະ ການປະມົງ,ທ່ານຫົວໜ້າພະແນກກະສິກຳ ແລະ ປ່າໄມ້ປະຈຳແຂວງ, ນະຄອນຫຼວງວຽງຈັນ,ທ່ານຫົວໜ້າເຈົ້າໜ້າທີ່ກັກກັນພືດ ແລະ ຫົວໜ້າເຈົ້າໜ້າທີ່ສັດຕະວະແພດ ປະຈຳດ່ານສາກົນ ໃນຂອບເຂດທົ່ວປະເທດ ເລື່ອງການຢຸດຕິຊົ່ວຄາວ ການສີດພົ່ນຢາຂ້າເຊື້ອພາຫະນະທົ່ວໄປທີ່ເຂົ້າມາ ສປປ ລາວ.
ໃນຄຳສັ່ງໄດ້ລະບຸວ່າ:
1. ໃຫ້ຢຸດຕິຊົ່ວຄາວການສີດພົ່ນຢາຂ້າເຊື້ອພາຫະນະທົ່ວໄປ ທີ່ບໍ່ໄດ້ຂົນສົ່ງສັດ, ຜະລິດຕະພັນສັດ ຫຼື ພືດ, ຜະລິດຕະພັນພືດ ຢູ່ບັນດາດ່ານຊາຍແດນໃນຂອບເຂດທົ່ວປະເທດ ຈົນກວ່າຈະໄດ່ຮັບແຈ້ງການຢ່າງເປັນທາງການຈາກກະຊວງກະສິກຳ ແລະ ປ່າໄມ້,
2.ສຳລັບພາຫະນະຂົນສົ່ງສະເພາະສັດ, ຜະລິດຕະພັນສັດ, ພືດ ຫຼື ຜະລິດຕະພັນທີ່ເຂົ້າມາໃນສປປ ລາວ, ແມ່ນອະນຸຍາດໃຫ້ສີດພົ່ນຕາມຫຼັກວິຊາການ;
3.ໃຫ້ຢຸດເຊົາການເກັບຄ່າບໍລິການ ສີດພົ່ນຢາຂ້າເຊື້ອໃສ່ພາຫະນະທຸກປະເພດທີ່ເຂົ້າມາ ສປປ ລາວ (ພາຫະນະທົ່ວໄປ ແລະ ພາຫະນະຂົນສົ່ງສັດ, ຜະລິດຕະພັນສັດ, ພຶດ ຫຼື ຜະລິດຕະພັນພືດ);
4.ໃນໄລຍະຢຸດຕິຊົ່ວຄາວນີ້, ໃຫ້ກົມປູກຝັງ ແລະ ກົມລ້ຽງສັດ ແລະ ການປະມົງ ສົມທົບກັບ ພະແນກກະສິກຳ ແລະ ປ່າໄມ້ປະຈຳແຂວງ ແລະ ນະຄອນຫຼວງວຽງຈັນ ເອົາໃຈໃສ່ປະຕິບັດບາງວຽກຈຸດສຸມ ດັ່ງນີ້:
4.1.ສຳລັບເຈົ້າໜ້າທີ່ກັກກັນພືດ ແລະ ເຈົ້າໜ້າທີ່ສັດຕະວະແພດ ປະຈຳດ່ານ ແມ່ນໃຫ້ສືບຕໍ່ປະຕິບັດການກວດກາ ສັດ ແລະ ພືດ ຕາມທີ່ໄດ້ກຳນົດໄວ້ໃນກົດໝາຍ ແລະ ລະບຽບການ;
4.2.ສືບຕໍ່ບົວລະບັດຮັກສາ ເຄື່ອງມືອຸປະກອນ ເປັນຕົ້ນ ເຄື່ອງສິດພົ່ນຢາຂ້າເຊື້ອພາຫະນະ ໃຫ້ຢູ່ໃນສະພາບຮັບປະກັນໃຊ້ງານໄດ້;
4.3.ສຳລັບດ່ານທີ່ຍັງບໍ່ໄດ້ມາດຕະຖານນັ້ນ ໃຫ້ສ້າງເປັນໂຄງການ ເພື່ອນຳສະເໜີຂັ້ນເທິງພິຈາລະນາອະນຸມັດຈັດຕັ້ງປະຕິບັດ;
4.4.ຂຶ້ນແຜນງົບປະມານ ເພື່ອຈັດຊື້ຢາ (ສຳລັບສີດພົ່ນ), ຄ່າສິ້ນເປືອງອື່ນໆ ເພື່ອກະກຽມແຜນສຸກເສີນ ກຽມພ້ອມຮັບມືໃນກໍລະນີທີ່ມີການລະບາດຂອງພະຍາດສັດ ຫຼືພືດ.
5.ໃຫ້ກົມປູກຝັງ ແລະ ກົມລ້ຽງສັດ ແລະ ການປະມົງ ເປັນເຈົ້າການຕິດຕາມ, ປະເມີນຄວາມສ່ຽງ ແລະ ເຝົ້າລະວັງສະພາບການລະບາດຂອງສັດຕູພືດ ແລະ ພະຍາດສັດ ຢູ່ບັນດາປະເທດໃກ້ຄຽງ, ຂົງເຂດ, ພາກພື້ນ ແລະ ສາກົນ ຢ່າງໃກ້ຊິດ. ໃນກໍລະນີມີຄວາມຈຳເປັນຕ້ອງໄດ້ປະຕິບັດມາດຕະການສີດພົ່ນຢາຂ້າເຊື້ອພາຫະນະທົ່ວໄປນັ້ນ, ກະຊວງກະສິກຳ ແລະ ປ່າໄມ້ ຈະເປັນຜູ້ອອກແຈ້ງການ ຕາມຄວາມຈຳເປັນ ໃນແຕ່ລະໄລຍະ.