ມະຫະກຳລົດນາໆຊາດຄັ້ງທີ 33 ຈະເລີ່ມຂຶ້ນມື້ນີ້ ທີ່ບາງກອກ ປະເທດໄທ

ມະຫະກຳລົດ ຄັ້ງທີ 33 ຫຼື THE 33rd THAILAND INTERANTIONAL MOTOR EXPO 2016 ຈະເລີ່ມຂຶ້ນມື້ນີ້ ( 1 ທັນວາ ) ທີ່ IMPACT challenger Muang Thong Thani ບາງກອກ ປະເທດໄທ, ພາຍໃນງານມີ ລົດໃຫຍ່ ແລະ ລົດຈັກ ຫຼາຍສິບຍີ່ຫໍ້ທີ່ມີຊື່ສຽງ ແລະ ອຸປະກອນຕົກແຕ່ງລົດຫຼາຍກວ່າ 300 ລາຍການເຂົ້າຮ່ວມ.
ທ່ານ ຂວັນໄຊ ປະພັດພົງ ປະທານຈັດງານມະຫະກຳລົດ ຄັ້ງທີ 33 ກ່າວວ່າ: ງານປີນີ້ ມີ ລົດໃຫຍ່ 36 ຍີ່ຫໍ້ທີ່ຜະລິດຈາກ ¬9 ປະເທດ, ລົດຈັກ 19 ຍີ່ຫໍ້ ທີ່ມາຈາກ 8 ປະເທດຜູ້ຜະລິດ ແລະ ອຸປະກອນຕົກແຕ່ງລົດຫຼາຍກວ່າ 300 ລາຍການເຂົ້າຮ່ວມ. ພ້ອມນັ້ນ, ຍັງມີລົດຕົ້ນແບບມາສະແດງອີກ. ສ່ວນຍອດຈອງລົດພາຍໃນງານ ຄາດວ່າຢູ່ທີ່ປະມານ 50 ພັນຄັນ ແລະ ລົດຈັກທຸກລຸ້ນປະມານ 4 ພັນຄັນ ແລະຈະມີຜູ້ເຂົ້າມາຮ່ວມງານບໍ່ຕໍ່າ 1.4 ລ້ານຄົນ; ພາຍໃນງານຍັງຈະມີຫຼາກຫຼາຍກິດຈະກຳຄືນກຳໄລໃຫ້ຜູ້ເຂົ້າຮ່ວມງານ.
ສຳລັບລົດທີ່ເຂົ້າຮ່ວມໃນງານ ນຳໂດຍຄ້າຍລົດ ເບັນ, ຊູຊູກິ, ຟອດ, ເຊັບໂຣເລັດ,ນິສສັນ, ເອັມຈີ, ຮອນດາ, ມາສດາ, ບີເອັມດັບເບິນຢູ, ມິນີ, ຊູບາຣຸ, ຮຸນໄດ, ໂຕໂຢຕ້າ ແລະ ຍີ່ຫໍ້ຊັ້ນນຳອື່ນໆອີກ.
ທ່ານກ່າວຕື່ມອີກວ່າ: ຕະຫຼາດລົດທຸກປະເພດໃນປະເທດໄທເຕັມໄປດ້ວຍຄວາມຫຼາກຫຼາຍ ທັງຍີ່ຫໍ້, ມາດຕະຖານການຜະລິດ, ຄຸນນະພາບ ແລະ ລາຄາ ຍາກແກ່ການເລືອກຊື້ຂອງຜູ້ບໍລິໂພກ ໂດຍສະເພາະຜູ້ທີ່ຕ້ອງການໃຊ້ເງິນຢ່າງກຸ້ມຄ່າ ເພື່ອໃຫ້ໄດ້ລົດທີ່ມີຄຸນນະພາບ ແລະ ປະໂຫຍດໃຊ້ຕາມຕ້ອງການ ພາຍໃຕ້ເງື່ອນໄຂການຊື້ – ຂາຍທີ່ຍຸຕິທຳ.
ຂໍ້ຈຳກັດຂອງຜູ້ບໍລິໂພກ ຄືບໍ່ສາມາດປຽບທຽບຂໍ້ມູນຕ່າງໆ ຂອງລົດແຕ່ລະຍີ່ຫໍ້ ແຕ່ລະລຸ້ນໄດ້ຢ່າງທົ່ວເຖິງໃນເວລາອັນຈຳກັດ. ຂະນະທີ່ຜູ້ຜະລິດ ແລະ ຜູ້ຈຳໜ່າຍເອງ ກໍ່ປະສົບບັນຫາເຊັ່ນດຽວກັນ ເປັນຕົ້ນແມ່ນ ບໍ່ສາມາດນຳສະເໜີສິນຄ້າ ແລະ ບໍລິການ ຕະຫຼອດຈົນຂໍ້ມູນ – ຂ່າວສານຕ່າງໆໄປສູ່ກຸ່ມລູກຄ້າຈຳນວນມະຫາສານໄດ້. ສະນັ້ນ, ມະຫະກຳລົດຍົນ ຄັ້ງທີ 33 ຈະເປັນຂົວຕໍ່ລະຫວ່າງຜູ້ຊື້ ແລະ ຜູ້ຂາຍ ໃຫ້ໄດ້ຮັບຮູ້ກັນຫຼາຍຂຶ້ນ.
ທ່ານກ່າວຕື່ມອີກວ່າ: ສຳລັບຕົວເລກຍອດຈອງໃນການຈັດງານ ປີ 2015 ຜ່ານມາ ລົດໃຫຍ່ ມີຈຳນວນທັງໝົດ 43 ພັນຄັນ, ລົດຈັກ ມີ 5,749 ຄັນ ແລະ ມີຜູ້ເຂົ້າຮ່ວມງານ 1.3 ລ້ານຄົນ.
ງານມະຫະກຳລົດນານາຊາດ ຄັ້ງທີ 33 ຈະຈັດຂຶ້ນ ນັບແຕ່ວັນທີ 1 – 12 ທັນວາ 2016.