ເສັ້ນທາງແຕ່ສາມແຍກຈີ່ນາຍໂມ້-ບ້ານຊາຍຟອງ ການສັນຈອນພົບຄວາມຫຍຸ້ງຍາກແຮງ

ເສັ້ນທາງແຕ່ສາມແຍກຈີ່ນາຍໂມ້ ຫາ ບ້ານຊາຍຟອງ ເມືອງຫາດຊາຍຟອງ ນະຄອນຫຼວງວຽງຈັນຜ່ານມາເຄີຍເປັນເສັ້ນທາງປູຢາງສອງຊັ້ນແຕ່ນຳໃຊ້ມາດົນ ຈຶ່ງເຮັດໃຫ້ເສັ້ນທາງດັ່ງກ່າວຊຸດໂຊມເປ່ເພ, ເປັນບວກ, ເປັນຂຸມ ແລະ ມີຂີ້ຝຸ່ນໄຫງ່. ຢ່າງໃດກໍຕາມ ລັດຖະບານໄດ້ຕັດສິນໃຈປັບປຸງຍົກລະດັບເປັນທາງປູເປຕົງເສີມຫລັກ ເຊິ່ງເລີ່ມລົງມືກໍ່ສ້າງມາແຕ່ເດືອນເມສາຜ່ານມາ.

ຢ່າງໃດກໍຕາມປັດຈຸບັນສະພາບເສັ້ນທາງແມ່ນມີຄວາມຫຍຸ້ງຍາກຫຼາຍ ເນື່ອງຈາກເປັນລະດູຝົນສົມທົບກັບມີລົດບັນທຸກທຽວບໍ່ຂາດສາຍ ຈຶ່ງເຮັດໃຫ້ເສັ້ນທາງດັ່ງກ່າວເປ່ເພໜັກກວ່າເກົ່າ, ການສັນຈອນໄປມາຂອງພໍ່ແມ່ປະຊາຊົນໃນເຂດດັ່ງກ່າວແມ່ນພົບກັບຄວາມຫຍຸ້ງຍາກຫຼາຍ ໂດຍສະເພາະແມ່ນເຂດ ບ້ານໄຊສະຖານ ຫາ ບ້ານໂພນສະຫວ່າງ ຍາວປະມານ 1 ກິໂລແມັດເປັນຂຸມເປັນຂີ້ຕົມເປື້ອນເຮັດໃຫ້ການໄປມາພົບຄວາມລຳບາກ.
ກ່ອນຫນ້ານັ້ນ ທາງໂຄງການກໍ່ສ້າງວ່າມີແຜນຈະປັບໜ້າທາງ ເພື່ອອຳນວຍຄວາມສະດວກໃຫ້ປະຊາຊົນໃນລະດູຝົນ ແຕ່ມາຮອດປັດຈຸບັນຍັງບໍ່ທັນໄດ້ລົງມືຈັດຕັ້ງປະຕິບັດເທື່ອ.

ສະພາບເສັ້ນທາງແຕ່ສາມແຍກຈີ່ນາຍໂມ້ ບ້ານໄຊສະຖານ ຫາ ບ້ານໂພນສະຫວ່າງ

ສະພາບເສັ້ນທາງແຕ່ສາມແຍກຈີ່ນາຍໂມ້ ບ້ານໄຊສະຖານ ຫາ ບ້ານໂພນສະຫວ່າງ

ຊາວບ້ານທ່ານາ ເມືອງຫາດຊາຍຟອງ ກ່າວວ່າ: ເສັ້ນທາງນີ້ແມ່ນເປ່ເພມາດົນແລ້ວ ແຕ່ມາຮອດປັດຈຸບັນນີ້ເຫັນວ່າເປ່ເພໜັກຂຶ້ນ ໂດຍສະເພາະແມ່ນມີຂຸມໃຫຍ່, ນ້ອຍ ຫຼາຍກວ່າເກົ່າ, ເຮັດໃຫ້ການໄປມາພົບຄວາມຍຸ້ງຍາກ ແລະ ໄລຍະນີ້ກໍ່ເປັນຊ່ວງຝົນຕົກສົມທົບການມີໂຄງການກໍ່ສ້າງທາງ ເຮັດໃຫ້ການໄປມາຂອງປະຊາຊົນພົບຄວາມຫຍຸ້ງຍາກ ໂດຍສະເພາະແມ່ນເຂດບ້ານໄຊສະຖານ ຫາ ບ້ານໂພນສະຫວ່າງປັດຈຸບັນທາງເປື້ອນຫຼາຍ ລົດຈົກສ່ຽງຕໍ່ການມື່ນລົ້ມ ເພາະທາງເປັນຕົມສູງ.
ແມ່ຄ້າຊາວບ້ານໄຊສະຖານ ເມືອງສີສັດຕະນາກ ກ່າວວ່າ: ເມື່ອປີຜ່ານມາເສັ້ນທາງກໍ່ເປ່ເພແຕ່ກໍ່ຍັງສາມາດໄປມາໄດ້ ລູກຄ້າກໍ່ສາມາດມານັ່ງກິນອາຫານຢູ່ຮ້ານເຮົາໄດ້ ແຕ່ມາຮອດປັດຈຸບັນເສັ້ນທາງເປ່ເພໜັກຂຶ້ນ ລູກຄ້າກໍ່ຫຼຸດລົງ, ບາງຄົນເຄີຍມານັ່ງກິນກໍ່ຈະຊື້ກັບໄປກິນຢູ່ເຮືອນ ຍ້ອນວ່າຂີ້ຝຸ່ນຫຼາຍໂພດ ການເຂົ້າອອກບໍ່ສະດວກ.

# ເສດຖະກິດ ການຄ້າ/ແຫຼ່ງຄວາມຮູ້ຄູ່ສັງຄົມ